Auala o le a Faaiʻuina ai Taua ma Fevaevaeaʻiga

O LE A AVEESEA E LE ATUA FAIGĀMALO A TAGATA

Ua faailoa mai i le Tusi Paia o le a aveesea e le Atua faigāmalo a tagata e ala i le taua o Amaketo.a (Faaaliga 16:16) O le taimi lenā o le a faapotopoto faatasi ai “tupu o le lalolagi uma” mo “le taua o le aso tele o le Atua o Lē e ona le malosi uma lava.” (Faaaliga 16:14) O Amaketo, o le taua mulimuli lea o le a tupu i le lalolagi.

O le a suia e le Atua faigāmalo a tagata i lona Malo. O le a pule lona Malo mai i le lagi, ma e tumau e faavavau. (Tanielu 2:44) Ua filifilia e le Atua lona Alo o Iesu Keriso e avea ma Tupu o lenā Malo. (Isaia 9:​6, 7; Mataio 28:18) Na aʻoaʻo foʻi e Iesu ona soo e tatalo ina ia oo mai lenā Malo.b (Mataio 6:​9, 10) E ala i le taʻitaʻiga a Iesu, o le a autasia ai tagata uma i le pulega a le Malo o le Atua.

E ese mai i pulega a tagata, o le a lē faaaogāina e Iesu lana pule i se auala manatu faapito. Talu ai e lē faailoga tagata o ia, o le a leai la se isi e feagai ma faiga lē tonu ona o lona lanu po o le atunuu na fanau ai. (Isaia 11:​3, 4) O le a lē toe finau foʻi tagata mo a latou aiā tatau, auā e tutusa lava le auala e feutagaʻi ai Iesu ma tagata taʻitoʻatasi. “E laveaʻi e ia le tagata mativa o loo alaga mo se fesoasoani, atoa foʻi ma lē e faatauvaa ma lē ua leai sona fesoasoani. . . . E laveaʻiina e ia i latou mai i le pule sauā ma faiga sauā.”—Salamo 72:​12-14.

O le a tafiesea e le Malo o le Atua auupega mo taua. (Mika 4:3) E lē gata i lea, o le a tafiesea tagata amioleaga o loo faatupuina fevaevaeaʻiga. (Salamo 37:​9, 10) E mautinoa o le a tatou lagona le saogalemu i so o se vaega o le lalolagi e tatou te iai.—Esekielu 34:28.

O le a aveesea faafitauli ia e māfua ai fetauaʻiga e pei o le tulaga mativa, le fia ʻai, ma le leai o ni fale e nonofo ai. O le a maua e tagata uma se olaga faamalieina i le pulega a le Malo o le Atua, auā o le a fau ma soloi meaʻai ma o le a latou fausia o latou lava fale ma nonofo ai.—Salamo 72:16; Isaia 65:​21-23.

Pe a pule le Malo o le Atua, o le a aveesea aafiaga leaga uma e māfua mai i taua. E aofia ai aafiaga ogaoga i le tino, mafaufau ma faalogona ona o mea matuiā na tutupu i taua. E oo lava iā i latou na maliliu ai o le a toetutū mai i le lalolagi ma toe faatasi ma o latou aiga. (Isaia 25:8; 26:19; 35:​5, 6) E latou te lē toe manatuaina aafiaga mataʻutia ona o taua, auā o na mea o le a aofia ai i ʻmea muamua ua mavae atu.’—Faaaliga 21:4.

O LE A AVEESEA E LE ATUA LE AGASALA

E ala i le Malo o le Atua, o le a autasi tagata uma e tapuaʻi i le Atua moni e toʻatasi o Ieovac, “le Atua o le alofa ma le filemu.” (2 Korinito 13:11) O le a aʻoaʻoina tagata i le auala e nonofo faatasi ai ma le filemu. (Isaia 2:​3, 4; 11:9) Pe a usiusitaʻi tagata i le Atua, o le a latou saʻoloto mai i aafiaga o le agasala ma avea ma tagata lelei atoatoa.—Roma 8:​20, 21.

O LE A AVEESEA E LE ATUA SATANI MA ANA TEMONI

O le a faaumatia aʻiaʻi e le Malo o le Atua ia Satani ma ana temoni, o ē o loo faapogaia taua. (Faaaliga 20:​1-3, 10) O le a ʻtele le filemu’ ona o le a lē toe iai a latou taaʻiga leaga.—Salamo 72:7.

E iai iā Ieova le mana ma le faanaunauga e tafiesea atoatoa ai taua. E tatou te mautinoa la, o le a ia faataunuuina lana folafolaga e faaiʻuina taua.

• E iai iā Ieova le atamai ma le mana e faaiʻuina ai taua ma fevaevaeaʻiga. (Iopu 9:4) E leai se mea e mafai ona taofia ai o ia mai i le faataunuuina o lona finagalo.—Iopu 42:2.

• E lē fiafia le finagalo o Ieova i le silasila mai i le mafatia o tagata. (Isaia 63:9) ʻE inosia foʻi e Ia le tagata e fiafia i le faasauā.’—Salamo 11:5.

• E tausisi Ieova i ana folafolaga ma e lē tala pepelo o ia.—Isaia 55:​10, 11; Tito 1:2.