Ia E Mautinoa e Alofa Ieova iā te Oe

1. Aiseā na e filifili ai e tuuina atu lou ola iā Ieova? (Tagaʻi foʻi i le ata.)

INA ua e iloa Ieova ma alofa iā te ia, na e filifili ai e tuuina atu lou ola iā te ia. E faapeʻī ou faalogona ina ua e faia faapea? E mautinoa na e taʻutino atu o le a e faamuamua le finagalo o Ieova i lou olaga, ma faaauau ona alofa iā te ia ma lou lotoatoa, ola atoa, mafaufau ma le malosi atoa. (Mare. 12:30) A o faagasolo taimi, na faamalosia ai lou alofa mo ia. O lea, pe a fesili atu se tasi pe e te alofa moni iā Ieova, e mautinoa e vave ona e tali mai: “E sili atu ona ou alofa iā Ieova nai lo o so o se isi lava po o so o se mea.”

2-3. O le ā e finagalo Ieova e tatou te mautinoa i ai, ma o le ā o le a tatou talanoaina i lenei suʻesuʻega? (Ieremia 31:3)

² E ui e tatou te alolofa iā Ieova, ae e iai taimi e tatou te ono masalosalo ai pe e alofa moni mai Ieova iā i tatou. O se faataʻitaʻiga, o se tuafafine na ola aʻe i se siʻomaga e na te leʻi lagona ai le alofa. Na ia faapea mai: “E lē fesiligia ou te alofa iā Ieova. Ae e masani ona ou tau mafaufau pe e mafai moni ona alofa mai Ieova iā te aʻu.” O lea, e faapefea ona tatou iloa faalogona moni o Ieova iā i tatou?

³ E finagalo Ieova ina ia e mautinoa e alofa iā te oe. (Faitau le Ieremia 31:3.) E faamaonia le moni o lenā manatu, auā na ia tosina atu oe iā te ia. Ina ua e tuuina atu foʻi ma papatisoina, na e maua ai se meaalofa tautele, o lona alofa faamaoni. O lona uiga, e alofa faapelepele mai o ia ma e lē mafai ona ia tuulafoaʻia oe. O le mea lenā e silasila ai o ia iā i tatou taʻitoʻatasi o ni ana “oloa tāua.” (Mala. 3:​17, fpl.) E finagalo Ieova ina ia e mautinoa e alofa mai o ia iā te oe, e pei foʻi ona mautinoa i ai le aposetolo o Paulo. O le mea lea na ia faapea mai ai: “Ua ou mautinoa, e lē mafai e le oti, po o le ola, po o agelu, po o malo, po o mea ua iai nei, po o mea e oo mai, po o ē e malolosi, po o le maualuga, po o le loloto, po o se isi lava foafoaga, ona faateʻaeseina i tatou mai i le alofa o le Atua.” (Roma 8:​38, 39) I lenei suʻesuʻega, o le a talanoaina ai māfuaaga e tāua ai lo tatou mautinoa e alofa mai Ieova, ma auala e faamalosia atili ai lenā mautinoa.

AISEĀ E TĀUA AI ONA TATOU MAUTINOA I LE ALOFA O IEOVA?

4. E faapefea ona tatou tetee atu i se tasi o togafiti a Satani?

⁴ O lo tatou mautinoa e alofa mai Ieova iā i tatou, e fesoasoani e teena ai “togafiti” a Satani. (Efe. 6:11) O loo taumafai Satani e faia so o se mea e taofia ai i tatou mai i le auauna iā Ieova. O se tasi o ana togafiti, o le taumafai lea e faatalitonu i tatou e lē alofa mai Ieova. Ae ia manatua, o Satani o sē e suʻe suʻe avanoa e pei o se leona o loo saʻilia se taimi talafeagai, e osofaʻia ai se manu ua vaivai. (1 Pete. 5:​8, 9) E na te faia faapea i taimi e tatou te matuā lotovaivai pe mafatia ai, atonu ona o ni mea na tutupu i le taimi ua teʻa, o ni luʻi o loo tatou fesagaʻia i le taimi lenei, po o ni popolega foʻi e faatatau i le lumanaʻi. (Faata. 24:10) O le sini o Satani, ia matuā faavaivaia i tatou ma lē toe auauna ai iā Ieova. Peitaʻi, e mafai ona tatou “tetee atu i le Tiapolo,” pe a faamalosia lo tatou mautinoa e alofa mai Ieova iā i tatou.—Iako. 4:7.

5. O le ā le tāua o lo tatou lagona e alofagia i tatou e Ieova?

⁵ Pe a tatou mautinoa e alofa Ieova iā i tatou, o le a tatou vavalalata atu ai iā te ia. Aiseā? Na foafoaina i tatou e Ieova ma le faanaunauga e faaalia atu le alofa, ma ia lagona foʻi le alofagia. Pe a alofagia i tatou e isi, e masani lava ona tatou toe faaali atu i ai le alofa. O lea, o le tele lava e tatou te lagona ai le alofagia e Ieova, o le atili foʻi lenā ona tatou alolofa iā te ia. (1 Ioa. 4:19) A o faalolotoina lo tatou alofa mo Ieova, o le a atili ai foʻi ona alofa mai o ia iā i tatou. O le māfuaaga lea ua taʻua ai i le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8) E faapefea la ona faamalosia atili lo tatou mautinoa, e alofa mai Ieova?

O LE Ā E FESOASOANI IĀ I TATOU E MAUTINOA AI I LE ALOFA O IEOVA?

6. O le ā e mafai ona e faia pe afai e te lē mautinoa pe e alofa Ieova iā te oe?

⁶ Ia tatalo pea iā Ieova e fesoasoani mai, ina ia e malamalama i māfuaaga e alofa ai iā te oe. (Luka 18:1; Roma 12:12) O nisi taimi atonu e manaʻomia ona faatele ona e tatalo iā Ieova i se aso, ina ia fesoasoani mai ia e vaai iā te oe lava e pei o lana silasila. Pe afai e masani ona taʻusalaina oe e lou loto, atonu la e faigatā ona e talitonu e alofa Ieova iā te oe. Ae ia e manatua, e sili atu Ieova nai lo o o tatou loto. (1 Ioa. 3:​19, 20) O loo silasila mai Ieova i o tatou uiga lelei, lea atonu e tatou te lē o iloaina. (1 Samu. 16:7; 2 No. 6:30) O lea, ia aua le faatalatū e “sasaa atu” ou faalogona iā te ia. Ia talosaga atu mo lana fesoasoani, ina ia e mautinoa ai e alofa o ia iā te oe. (Sala. 62:8) E lē gata i lea, ia gaoioi e ōgatusa ma au tatalo, e ala i le faatatauina o manatu o loo mulimuli mai.

7-8. E faapefea ona faamautinoa mai i le Salamo e alofa Ieova iā i tatou?

⁷ Ia e talitonu i fetalaiga a Ieova. Na ia faagaeeina i latou na tusia le Tusi Paia, e faamatala mai ma le saʻo ona faalogona e faatatau iā i tatou. Seʻi mātau le auala mataʻina na faamatalaina ai Ieova e le faisalamo o Tavita. Na ia faapea mai: “E latalata mai Ieova i ē e lotomomomo; e faaola e ia o ē ua lotonutimomoia.” (Sala. 34:18) Pe a lagona le matuā mafatia, e masani ona tatou mafaufau ua tuua na o i tatou pe e leai se isi e malamalama i o tatou faalogona. Peitaʻi, ia manatua o taimi faapena e sili ona latalata mai ai Ieova iā i tatou. Na taʻua foʻi e Tavita i se isi salamo: “Ia e utuina oʻu loimata i lau fagupaʻu.” (Sala. 56:8) Pe a iai se tasi i se toafa, e matuā faapelepele o ia i le vai o loo i lana faguvai. I se tulaga taitutusa, e matuā faapelepele pe tautele iā Ieova o tatou loimata e maligi, ona o ni tulaga faigatā e tatou te pagatia ai. Ioe, e silafia lelei e Ieova taimi uma e te mafatia ai. I le Salamo 139:​3, na faapea atu ai Tavita iā Ieova: “Ua e masani i oʻu ala uma.” E ui e silafia e Ieova o tatou ala uma, ae e na o mea lelei e uaʻi mai ai o ia. (Epe. 6:10) O le māfuaaga, ona e tautele iā te ia a tatou taumafaiga uma ina ia faafiafia o ia.a

⁸ Pe a tatou faitau i mau faamāfanafanaloto o loo i le Afioga faagaeeina a Ieova, e tai pei o loo fetalai mai ai Ieova: “Ou te manaʻo ia e iloa ou te alofa tele iā te oe ma e tāua oe iā te aʻu.” Ae i le isi itu, o loo taumafai foʻi Satani e faatalitonu oe, e lē alofa mai Ieova. Pe a iai la taimi e te tau masalosalo ai pe e alofa Ieova iā te oe, ia faaalu se taimi e mafaufau ai pe e te talitonu iā Satani le “tamā o le pepelo,” po o Ieova “le Atua faamaoni.”—Ioa. 8:44; Sala. 31:5.

9. O le ā ua folafola mai e Ieova iā i latou e alolofa iā te ia? (Esoto 20:​5, 6)

⁹ Ia mafaufau i faalogona o Ieova i ē e alolofa atu iā te ia. O se faataʻitaʻiga, ia mātau ana fetalaiga iā Mose ma le nuu o Isaraelu. (Faitau le Esoto 20:​5, 6.) Na folafola mai e Ieova o le a faaauau ona ia faaalia le alofa faamaoni i ē e alolofa iā te ia. Talu ai e faamaoni Ieova, e mautinoa la e alofa mai o ia iā i latou e alolofa atu iā te ia. (Nee. 1:5) Pe a iai se taimi e te masalosalo ai pe e alofa Ieova iā te oe, ia manatua, pe afai e te alofa iā Ieova ma o loo e taumafai e faafiafia lona finagalo, e mautinoa la e alofa mai o ia iā te oe. (Tani. 9:4; 1 Kori. 8:3) I nisi faaupuga, pe afai e lē fesiligia lou alofa iā Ieova, e lē fesiligia foʻi la le alofa mai o Ieova iā te oe.

10-11. O le ā e finagalo Ieova ia tatou manatua e faatatau i le togiola? (Kalatia 2:20)

¹⁰ Ia manatunatu loloto i le togiola a Iesu Keriso. O le togiola, o le meaalofa silisili lea mai iā Ieova mo tagata uma. (Ioa. 3:16) Ae pe e te talitonu na saunia patino foʻi e Ieova le togiola mo oe? Seʻi mafaufau i le faaaʻoaʻoga a le aposetolo o Paulo. Na ia faia le tele o mea sesē matuiā, ma e oo lava ina ua avea o ia ma Kerisiano, na faaauau pea ona ia tauivi ma ona vaivaiga. (Roma 7:​24, 25; 1 Timo. 1:​12-14) Peitaʻi, na talitonu Paulo o le togiola o se meaalofa na saunia patino e Ieova mo ia. (Faitau le Kalatia 2:20.) Na faagaeeina e Ieova o ia e tusia na faaupuga, ina ia tatou maua ai foʻi aogā. (Roma 15:4) O lea, ua faailoa mai i upu a Paulo faalogona moni o Ieova mo oe. E finagalo o ia ina ia e vaai i le togiola, o sana meaalofa na saunia patino mo oe po o i tatou taʻitoʻatasi. O le mafaufau faapena, o le a atili ai ona e mautinoa e alofa Ieova iā te oe.

¹¹ E tatou te faafetai iā Ieova ona o lona auina mai o Iesu e maliu mo i tatou. Peitaʻi, na afio mai foʻi Iesu ina ia faailoa atu i isi upu moni e faatatau i le Atua, e aofia ai faalogona o Ieova mo i tatou o lana fanau.—Ioa. 18:37.

UA FAAMAUTINOA MAI E IESU E ALOFA IEOVA IĀ I TATOU

12. Aiseā e tatou te maufaatuatuaina ai faamatalaga uma a Iesu e faatatau iā Ieova?

¹² A o iai Iesu i le lalolagi, na fiafia o ia e faamatala i tagata le ituaiga o Atua e iai Ieova. (Luka 10:22) E mafai ona tatou maufaatuatuaina faamatalaga uma a Iesu e faatatau iā Ieova. Aiseā? Talu ai e faitau piliona tausaga na mafuta ai Iesu ma lona Tamā i le lagi. (Kolo. 1:15) Na ia tofo totino ma vaaitino foʻi i le alofa faapelepele o Ieova i ana auauna faamaoni. Na faapefea ona fesoasoani Iesu i isi ina ia mautinoa e alofa Ieova iā i latou?

13. O le ā e finagalo Iesu ia tatou iloa e faatatau i faalogona o Ieova?

¹³ E finagalo Iesu ia tatou iloa faalogona moni o Ieova mo i tatou. I tusi o Evagelia, e silia ma le 160 taimi na faaaogā ai e Iesu le taʻu Tamā, e faasino atu iā Ieova. Ina ua fetalai atu foʻi i ona soo, na ia faaaogā faaupuga e pei o “lo outou Tamā.” (Mata. 5:16; 6:26) A o leʻi afio mai Iesu i le lalolagi, na masani ona faaaogā e auauna a Ieova faalupega mamalu e faamatala ai Ieova, e pei o “Lē e ona le malosi uma lava,” o le “Silisili Ese,” ma ʻLē e Sili na Foafoaina i tatou.’ Peitaʻi, na faaaogā e Iesu le faaupuga faigofie “Tamā,” e faamatilatila mai ai faalogona māfana o Ieova mo ona tagata tapuaʻi. Ua faailoa manino mai e Iesu i inei, e alofa Ieova iā i tatou e pei ona alofa se Tamā lelei i lana fanau pele. Seʻi o tatou iloiloina ni taimi se lua na faaaogā ai e Iesu le taʻu Tamā.

14. Na faapefea ona faamatilatila mai e Iesu, e tautele i tatou taʻitoʻatasi i le silafaga a lo tatou Tamā i le lagi? (Mataio 10:​29-31) (Tagaʻi foʻi i le ata.)

¹⁴ Muamua, ia mātau fetalaiga a Iesu i le Mataio 10:​29-31. (Faitau.) E ui e lē mafai ona alolofa pe auauna ni tamaʻi manulele iā Ieova, ae e tāua na manulele iā te ia ma e na te silafia lelei pe a paʻū se manulele i le eleele. Pe afai e tautele i le silafaga a Ieova se tamaʻi manulele, e sili atu la ona tautele ma manatu mamafa o ia iā i tatou, o ē o loo alolofa ma tapuaʻi iā te ia. Na taʻua atili e Iesu, “e oo foʻi i o outou lauulu, ua faitaulia uma.” Pe afai e silafia e Ieova nei mea lāiti e pei o tatou lauulu, ua lava ma totoe lenā e taʻu mai ai le naunau moni o Ieova iā i tatou. Ioe, na manaʻo Iesu e faamatilatila mai, e tautele i tatou taʻitoʻatasi i le silafaga a lona Tamā.

15. O le ā ua tatou iloa mai i fetalaiga a Iesu i le Ioane 6:44 e faatatau i lo tatou Tamā i le lagi?

¹⁵ Lona lua, o fetalaiga a Iesu i le Ioane 6:44. (Faitau.) O Ieova lava ia na ia tosina mai ma le agalelei oe i le upu moni. Aiseā? Talu ai na ia silasila mai i se mea lelei i lou loto. (Galu. 13:48) Atonu na faasino atu le faamatalaga a Iesu i upu a Ieremia o loo i le mau autū: “Na ou tosina mai ai oe i loʻu alofa faamaoni [po o le, na ou faaali atu ai pea le alofa faamaoni iā te oe].” (Iere. 31:3; fpl.; faatusatusa i le Hosea 11:4.) O lona uiga, o loo faaauau pea ona silasila mai Ieova i ou uiga lelei, lea atonu e te lē o iloaina.

16. (a) O le ā ua aʻoaʻoina ai i tatou e Iesu, ma aiseā e tāua ai ona tatou talitonu iā te ia? (e) O le ā e fesoasoani iā te oe ina ia mautinoa, e leai se isi Tamā e sili atu nai lo o Ieova? (Tagaʻi i le pusa “Tamā e Manaʻomia e i Tatou Uma.”)

¹⁶ O le taʻua e Iesu e faapea, o Ieova o lo tatou Tamā, e tai pei ua ia faapea mai, “E lē gata o Ieova o loʻu Tamā, ae o ia foʻi o lou Tamā. Ou te manaʻo la ia e mautinoa, e alofa tele ma e matuā manatu mamafa o ia iā te oe.” Pe afai la e iai se taimi e te masalosalo ai pe e alofa Ieova iā te oe, ia manatua fetalaiga a Iesu ma ia talitonu i ai, auā e moni ma faamaoni ana fetalaiga uma, ma e na te silafia lelei lo tatou Tamā.—1 Pete. 2:22.

IA E MAUTINOA PEA E ALOFA IEOVA IĀ TE OE

17. Aiseā e tāua ai ona faia pea taumafaiga uma ina ia tatou mautinoa ai e alofa Ieova iā i tatou?

¹⁷ Ia faaauau ona tatou faia mea uma ina ia mautinoa ai pea, e alofa Ieova iā i tatou. E pei ona taʻua muamua, o loo taumafai malosi Satani e faavaivaia i tatou mai i le auauna iā Ieova. O loo ia faia taumafaiga uma e faatalitonu ai i tatou, e lē o alofa mai Ieova. Peitaʻi, ia tatou maumauaʻi ina ia manumalo iā Satani!—Iopu 27:5.

18. O ā mea e mafai ona e faia ina ia e mautinoa atili ai e alofa Ieova iā te oe?

¹⁸ I lenei suʻesuʻega, na e aʻoaʻoina ai mea e mafai ona fai ina ia e mautinoa atili ai e alofa Ieova iā te oe. Ia tatalo iā Ieova e fesoasoani mai ina ia e iloa ou uiga lelei o loo ia mātauina. Ia manatunatu loloto i auala o loo faamatala ai e i latou na tusia le Tusi Paia, faalogona o Ieova e faatatau iā i tatou. Ia e mautinoa e alofa mai Ieova i ē e alolofa iā te ia. Ia vaai foʻi i le togiola o se meaalofa na saunia patino e Ieova mo oe. E lē gata i lea, ia aua neʻi galo le faamautinoaga a Iesu, o Ieova o lou Tamā i le lagi. Pe a fesili atu la se tasi pe e alofa moni mai Ieova iā te oe, o le a e tali atu ma le mautinoa: “Ioe, e alofa Ieova iā te aʻu, ma ou te taumafai foʻi e fai le mea sili i aso uma e faaali atu ai loʻu alofa iā te ia.”