E Tumau e Faavavau le Alofa o le Atua

1-2. O le ā se faafitauli o loo feagai ma le toʻatele o Kerisiano?

SEʻI mafaufau i se vaa o loo iai i se sami sousou. E mautinoa o le a tafea ese lenā vaa, pe afai e faaauau ona felafoaʻiina solo e galu malolosi. Peitaʻi, pe afai e togi i lalo le taula o le vaa, o le a fesoasoani lenā e taofia ai le vaa mai i le tafea ese.

² I le pei o se vaa o loo felafoaʻiina solo e galu, e ono faapena lou tulaga pe a fesouaʻiina lou olaga i faafitauli. Atonu e fesuisuiaʻi ou faalogona mai i lea taimi i lea taimi. O isi aso e te matuā mautinoa i le alofa ma le fesoasoani a Ieova, a o isi aso ua e fesiligia po o silafia mai e Ieova ou mafatiaga. (Sala. 10:1; 13:1) O se faataʻitaʻiga, atonu e faalaeiauina oe e sau uō ma e lagona ai le faafouina. (Faata. 17:17; 25:11) Peitaʻi, i se taimi mulimuli ane, e ono toe lofitūina oe i faalogona lē mautonu, ma e toe fesiligia ai po o silasila alofa mai Ieova iā te oe. O le ā la se mea e mafai ona avea e pei o se taula mo oe i taimi faapena? I nisi faaupuga, o le ā e fesoasoani iā te oe ina ia e mautinoa ai pea i le alofa ma le fesoasoani a Ieova?

3. (a) O le ā le uiga o le faaupuga “alofa faamaoni” o loo taʻua i le Salamo 31:7 ma le 136:1? (e) Aiseā e faapea atu ai o Ieova o le faaaʻoaʻoga silisili o le alofa faamaoni? (Tagaʻi foʻi i le ata.)

³ O se tasi o mea e mafai ona avea o se taula mo i tatou pe a feagai ma tulaga faigatā, o le manatua lea o le alofa faamaoni o Ieova. (Faitau le Salamo 31:7; 136:1.) O le faaupuga “alofa faamaoni,” e uiga atu i se faiā e matuā māfana ma tumau i le vā o se tasi ma se isi. O Ieova le faaaʻoaʻoga silisili o le alofa faamaoni. Ua faamatalaina o ia i le Tusi Paia, “e tele lona alofa faamaoni.” (Eso. 34:​6, 7) Ae ua taʻua atili foʻi i le Tusi Paia e faatatau iā Ieova: “E tele foʻi lou alofa faamaoni iā i latou uma e valaau atu iā te oe.” (Sala. 86:5) O le ā le uiga o na manatu? E lē mafai ona tuulafoaʻiina e Ieova ana auauna faamaoni! O le manatuaina e faamaoni Ieova, e mafai ona avea o se taula pe a fesouaʻiina o tatou olaga i faigatā.—Sala. 23:4.

O LE ALOFA O IEOVA O SE AʻOAʻOGA FAAVAE O LE TUSI PAIA

4. O ā ni faataʻitaʻiga o aʻoaʻoga faavae o le Tusi Paia, ma aiseā e tatou te lē fesiligia ai le moni o na aʻoaʻoga?

⁴ O se isi mea e mafai ona avea o se taula i taimi faigatā, o le manatuaina lea, o le alofa faamaoni o Ieova o se aʻoaʻoga faavae mai i le Tusi Paia. O le ā e masani ona tau i ai lou mafaufau pe a taʻu “aʻoaʻoga faavae o le Tusi Paia”? Atonu e te mafaufau i upu moni mai i le Tusi Paia, e pei o le suafa o le Atua o Ieova, o Iesu o le Alo e toʻatasi o le Atua, e lē toe iloa e tagata ua maliliu se mea, ma o le a ola e faavavau tagata i se lalolagi parataiso. (Sala. 83:18; Fai. 9:5; Ioa. 3:16; Faaa. 21:​3, 4) O le taimi lava na e talitonu ai i na aʻoaʻoga faavae, e leʻi toe iai lava se mea na faaluafesasi ai lou mafaufau. O le māfuaaga, ona ua e talitonu po ua e iloa lelei upu moni e faavae mai ai na aʻoaʻoga. Seʻi o tatou talanoa la, pe aiseā e tāua ai ona tatou vaai i le alofa faamaoni o Ieova o se aʻoaʻoga faavae o le Tusi Paia, ma pe e faapefea i lenā mea ona fesoasoani e ʻalofia ai le fesiligia po o silasila alofa mai Ieova i o tatou mafatiaga.

5. E faapefea ona tatou teena ni aʻoaʻoga sesē?

⁵ Ina ua faatoʻā e suʻesuʻeina le Tusi Paia, o le ā na fesoasoani iā te oe ina ia teena ai aʻoaʻoga sesē? Atonu na fesoasoani iā te oe le faatusatusa o aʻoaʻoga sa e talitonu i ai, ma aʻoaʻoga mai i le Tusi Paia. O se faataʻitaʻiga, seʻi faapea na e talitonu muamua o Iesu o le Atua lava lea. A o e suʻesuʻeina le Tusi Paia, atonu na e taumānatu pe e saʻo lenā aʻoaʻoga. Ina ua e faamaonia mai i le Tusi Paia le sesē o lenā aʻoaʻoga, na e teena loa ae ua e talitonu o Iesu “o le ulumatua o foafoaga uma,” ma o le “Atalii e toʻatasi o le Atua.” (Kolo. 1:15; Ioa. 3:18) O le mea moni, e lē faigofie ona liaʻieseina ni aʻoaʻoga ua “matuā mautū” iā i tatou. (2 Kori. 10:​4, 5) Peitaʻi, o le taimi lava e te liaʻieseina ai na aʻoaʻoga sesē, e lē taitai ona e toe talitonu i ai.—Fili. 3:13.

6. Aiseā e te mautinoa ai e “tumau e faavavau” le alofa faamaoni o Ieova?

⁶ Pe a e feagai ma se tulaga faigatā ma ua e fesiligia po o silasila alofa mai Ieova iā te oe, o se mea lelei foʻi lou faatusatusa o ou faalogona ma aʻoaʻoga o le Tusi Paia. Ia iloilo po o ōgatusa ou faalogona ma le alofa faamaoni o Ieova o loo taʻua i le Salamo 136:​1, lea e autū i ai lenei suʻesuʻega. Ia fesili ifo, ʻAiseā e faapea atu ai e “faamaoni” le alofa o Ieova? O le ā le māfuaaga ua taʻua ai i lenā salamo le faaupuga “e tumau e faavavau lona alofa faamaoni” mo le 26 taimi?’ E pei ona taʻua muamua, o le alofa faamaoni o Ieova o se aʻoaʻoga faavae o le Tusi Paia, e pei lava o isi aʻoaʻoga ua e talitonu i ai. E matuā sesē lava le manatu e faapea, e lē alofa Ieova iā i tatou. O lea, ia teena lenā manatu, e pei lava ona e teena isi aʻoaʻoga sesē uma.

7. O ā ni mau o le Tusi Paia e faamaonia mai ai le alofa faamaoni o Ieova?

⁷ O loo i le Tusi Paia le tele o faamaoniga o le alofa faamaoni o Ieova. Na fetalai Iesu e faapea: “E sili atu ona tāua [oe] nai lo o tamaʻi manulele e tele.” (Mata. 10:31) Na fetalai foʻi Ieova lava ia: “Ou te faamalosi iā te oe, ma ou te matuā fesoasoani iā te oe, ou te matuā lagolagoina oe i loʻu lima taumatau o le amiotonu.” (Isa. 41:10) Ia mātau le faamautinoaga o loo iai i na mau. E leʻi tau ina faapea mai Iesu, ʻE tāua oe’ pe fetalai foʻi Ieova ʻOu te fesoasoani iā te oe.’ Nai lo o lea, na la faapea mai, “E sili atu ona tāua [oe]” ma “Ou te matuā fesoasoani iā te oe.” O lea, pe afai e te fesiligia le alofa o Ieova pe a feagai ma faigatā, o le a fesoasoani na mau e lē gata e te lagona ai le alofagia o oe e Ieova, ae e te talitonu atoatoa ai foʻi i lona alofa faamaoni. O loo faavae mai na manatu i ni upu moni maufaatuatuaina. O le faaalu o se taimi e tatalo ma manatunatu loloto ai i na mau, o le a tatou ioe ai i upu o loo i le 1 Ioane 4:16: “Ua tatou iloa ma talitonu i le alofa o le Atua iā i tatou.”a

8. O le ā e mafai ona e faia, pe a fai ma e fesiligia le alofa o Ieova iā te oe?

⁸ Ae e faapefea pe a fai ma e fesiligia le alofa o Ieova? Ia faatusatusa ou faalogona ma mea ua e iloaina e faatatau iā te ia. E masani lava ona fesuisuiaʻi o tatou faalogona. Peitaʻi, e lē masuia le alofa o Ieova lea o loo taʻua i le Tusi Paia. Pe afai e faaauau ona tatou fesiligia le alofa o Ieova, e tai pei lenā ua tatou faapea atu e pepelo le manatu o le Tusi Paia, “o le Atua o le alofa lava ia.”—1 Ioa. 4:8.

IA MANATUNATU I LE ʻALOFA FAAPELEPELE O LE TAMĀ IĀ TE OUTOU’

9-10. O le ā sa faatatau atu i ai le fetalaiga a Iesu i le Ioane 16:​26, 27: “E alofa faapelepele le Tamā iā te outou”? (Tagaʻi foʻi i le ata.)

⁹ E tele isi mea e mafai ona tatou aʻoaʻoina e faatatau i le alofa o Ieova, mai i le fetalaiga a Iesu i ona soo e faapea: “E alofa faapelepele le Tamā iā te outou.” (Faitau le Ioane 16:​26, 27.) Ia mātau, e leʻi fai atu e Iesu na upu ina ia maua ai e ona soo le fiafia. Pe a iloiloina le siʻomaga o lenei mau, e tatou te iloa ai e leʻi talanoa o ia e faatatau i faalogona o ona soo, ae sa talanoa e faatatau i le tatalo.

¹⁰ A o leʻi fetalai Iesu i na upu, na ia faalaeiauina muamua ona soo e ao ona latou tatalo e ala atu iā te ia, ae e lē o le tatalo atu iā te ia. (Ioa. 16:​23, 24) Na tāua ona latou iloa lenā mea. Aiseā? Ina ua toe faatūina Iesu, atonu na mafaufau ona soo e tatau ona latou tatalo atu iā te ia. Talu ai ua latou iloa lelei Iesu ma o ia o sa latou uō, na ono mafaufau la le ʻausoo, o le alofa o Iesu iā i latou o le a ia faafofoga mai ai i a latou tatalo, ma faailoa atu o latou manaʻoga i lona Tamā. Peitaʻi, na fetalai Iesu e lē tatau ona latou mafaufau faapena, auā “e alofa faapelepele le Tamā” iā i latou. Talu ai e alofa faapelepele le Tamā iā i latou, e faafofoga mai la o ia i a latou tatalo. O lenā manatu o se tasi o aʻoaʻoga a le Tusi Paia e faatatau i le tatalo. O le ā le tāua o lenā manatu mo i tatou? O lo tatou suʻesuʻeina o le Tusi Paia, ua tatou iloa lelei ai Iesu ma alolofa iā te ia. (Ioa. 14:21) Peitaʻi, i le pei o soo i le uluaʻi senituri, e tatau ona tatou tatalo atu i le Atua ma le mautinoa “e alofa faapelepele le Tamā iā [i tatou].” E iloa lo tatou maufaatuatuaina o na upu, i taimi uma e tatou te tatalo atu ai iā Ieova.—1 Ioa. 5:14.

MĀFUAAGA E TATOU TE FESILIGIA AI LE ALOFA O IEOVA

11. O le ā le mea e tupu pe a tatou fesiligia le alofa o Ieova?

¹¹ O le ā le māfuaaga e tatou te fesiligia ai le alofa o Ieova? Atonu e te faapea mai e māfua ona o Satani. O le mea moni, e lē sesē lenā manatu auā o loo ia “saʻili se tasi e na te ʻaina,” ma e matuā fiafia o ia pe a tatou fesiligia le alofa o Ieova. (1 Pete. 5:8) Pe a mafaufau i ai, o le alofa tele o Ieova na ia saunia mai ai le togiola. Peitaʻi e manaʻo Satani e tatou te mafaufau e lē tatau iā i tatou le togiola. (Epe. 2:9) O ai la e fiafia pe a tatou fesiligia le alofa o Ieova? O ai e fiafia pe a tatou faavaivai i taimi o faigatā? O Satani. Seʻi mafaufau i le matuā pepelo o Satani! O se tasi o ana “togafiti,” o le taumafai lea e faatalitonu i tatou e taʻusalaina ma e lē alofa Ieova iā i tatou. (Efe. 6:11) Peitaʻi, o Satani, o ia lenā e matuā lē alofa i ai Ieova. Pe a tatou malamalama la i le sini o Satani, o le a tatou maumauaʻi ai e “tetee atu” iā te ia.—Iako. 4:7.

12-13. Aiseā e faapea atu ai o lo tatou tulaga agasala e māfua ai ona tatou fesiligia le alofa o Ieova?

¹² E iai foʻi se isi māfuaaga e tatou te fesiligia ai le alofa o Ieova: O le agasala tuufaasolo lea ua tatou aafia ai. (Sala. 51:5; Roma 5:12) O le agasala ua faaleagaina ai la tatou faiā ma le Atua, ma ua aafia ai foʻi le auala e tatou te mafaufau ai, o o tatou faalogona, ma o tatou tino.

¹³ O le agasala e māfua ai ona oo iā i tatou faalogona e pei o le nofosala, popole, faalumaina, ma le lē mautonu. O faalogona na e masani ona oo iā i tatou pe a tatou faia se agasala. Peitaʻi, e tatou te tauivi foʻi ma na faalogona ona ua tatou aafia i le agasala tuufaasolo, lea e matuā tuufaafeagai lava ma le fuafuaga na foafoaina ai i tatou. (Roma 8:​20, 21) O se faataʻitaʻiga, e lē mafai ona tatou faaaogā atoatoa se taavale pe afai e pā se paʻu. I se tulaga talitutusa, e lē mafai ona atoatoa mea e tatou te faia e pei ona uluaʻi foafoaina ai i tatou e le Atua, ona ua tatou aafia i le agasala. O le mea lea e lē faateʻia ai i tatou, pe afai e iai taimi e tatou te fesiligia ai le alofa o Ieova. Ae pe afai e tupu lenā mea, e tāua ona tatou manatua o Ieova “o le Atua sili ma mataʻutia, o lē e tausia lana feagaiga ma alofa faamaoni i ē e alolofa atu iā te ia ma tausia ana poloaʻiga.”—Nee. 1:5.

14. E faapefea i le manatunatu i le togiola ona fesoasoani e teena ai le manatu e lē alofa Ieova iā i tatou? (Roma 5:8) (Tagaʻi foʻi i le pusa “Ia Mataala i le ʻMalosi Taufaasesē o le Agasala.’”)

¹⁴ O le mea moni, e iai lava taimi e tatou te mafaufau ai e lē tatau iā i tatou le alofa o Ieova. O le mea saʻo lava ia, e lē tatau iā i tatou le alofa o Ieova, ma e lē mafai ona tatou mauaina lona alofa ona o ni a tatou lava taumafaiga. E ui i lea, na tausolomua o ia e faaalia mai le alofa, e ala i le saunia o le togiola e faamagaloina ai a tatou agasala. O le mea lenā e matuā mataʻina ai le alofa o Ieova! (1 Ioa. 4:10) Ia manatua foʻi, na afio mai Iesu e laveaʻiina tagata agasala ae e lē o tagata lelei atoatoa. (Faitau le Roma 5:8.) E leai se isi o i tatou e atoatoa mea e na te faia, ma e lē faatalitalia foʻi i tatou e Ieova e faia faapea. Pe a tatou malamalama la, o lo tatou tulaga agasala e māfua ai ona tatou fesiligia le alofa o Ieova i nisi taimi, o le a tatou maumauaʻi ai e teena na ituaiga o mafaufauga.—Roma 7:​24, 25.

IA TUMAU FAAMAONI

15-16. O le ā e tatou te mautinoa i ai pe afai e tatou te tumau faamaoni iā Ieova, ma aiseā? (2 Samuelu 22:26)

¹⁵ E finagalo Ieova e tatou te faia le filifiliga saʻo, e ala i le “pipii atu iā te ia.” (Teu. 30:​19, 20) Pe a tatou faia faapea, e mautinoa o le a faamaoni Ieova iā i tatou. (Faitau le 2 Samuelu 22:26.) Pe afai e tatou te tumau faamaoni iā Ieova, e mautinoa o le a fesoasoani o ia iā i tatou e onosaia so o se tulaga faigatā e tulaʻi mai.

¹⁶ E pei ona tatou talanoaina, e tele māfuaaga lelei e mafai ona avea e pei o se taula, e fesoasoani iā i tatou e tumau ai pea e ui i faigatā. Ua tatou iloa e alofa faapelepele Ieova iā i tatou, ma o le a ia fesoasoani mai. O le aʻoaʻoga moni lenā mai i le Tusi Paia. Pe a iai taimi e tatou te fesiligia ai lona alofa, ia taumafai e uaʻi atu i mea ua tatou iloa e faatatau iā Ieova, nai lo o le uaʻi i o tatou faalogona. Seʻi faaauau ona tatou talitonu atoatoa, e tumau e faavavau le alofa faamaoni o Ieova e pei ona taʻua i le Tusi Paia.