Tane, e Faapefea Ona Fesoasoani le Tusi Paia i o Outou Popolega?
Pe a faaata i lou mafaufau se tagata o loo feagai ma popolega,a atonu e te mafaufau i se tasi ua pulea i le fefe, ua lē mafai ona toe faia se mea, po o se tasi e talanoa i taimi uma i ona popolega.
E moni e iai nisi e gaoioi faapena pe a feagai ma popolega. Ae ua iloa e tagata suʻesuʻe, atonu e ese le auala e gaoioi ai isi aemaise tamāloloa. Na taʻua e se tasi o lipoti, o tamāloloa “e tele ina latou faaaogā le ʻava malosi ma fualaau faasāina e feagai ai ma popolega, ma foliga mai ai ua pulea i latou e le ʻava malosi ae atonu o le faailoga lenā o le matuā popole. O popolega foʻi i tamāloloa e masani ona faaalia mai i uiga ita ma le inainā.”
Peitaʻi, e lē o tamāloloa uma e gaoioi i lenā auala. Ae po o le ā lava le auala e gaoioi ai se tasi, o popolega o se faafitauli ua faatupulaʻia i nei “aso e sili ona faigatā.” (2 Timoteo 3:1) Pe afai o loo e feagai ma popolega, e mafai ona fesoasoani le Tusi Paia iā te oe.
Fautuaga Aogā i le Tusi Paia e Feagai ai ma Popolega
O loo iai i le Tusi Paia fautuaga maufaatuatuaina e fesoasoani iā i tatou pe a tatou popole. Iloilo faaaʻoaʻoga nei e tolu.
1. “Ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”—Mataio 6:34.
Le uiga: E atamai le aua le soona popole i mea e ono tutupu (pe ono lē tutupu) i le lumanaʻi. E masani lava, o mea e tatou te popole ai e ono lē tutupu. I nisi taimi, e ono suia le tulaga o mea i se tulaga e sili atu ona lelei e leʻi faatalitalia.
Faataʻitaʻi: Ia manatua se taimi na e mautinoa ai o le a tupu se mea leaga ae e leʻi tupu. Ona faatusatusa lea i ou popolega o loo iai, ma faamaoni iā te oe lava pe e ono avea na popolega ma faafitauli telē.
2. “E faamaʻai le uʻamea i le uʻamea. E faapena foʻi ona faamaʻai e le tasi tagata foliga o le isi tagata.”—Faataoto 27:17.
Le uiga: E mafai ona fesoasoani mai isi ina ia tatou feagai ma popolega, pe a tatou faataga i latou e fesoasoani mai. E mafai ona latou aumaia fautuaga aogā e faavae i mea na tutupu iā i latou. E mafai foʻi ona latou fesoasoani mai ia iai se isi vaaiga i le faafitauli.
Faataʻitaʻi: Ia mafaufau i sau uō e taitutusa faafitauli o loo lua fesagaʻia lea atonu e mafai ona maua ai ni fautuaga lelei. Ia fesili i ai po o le ā na fesoasoani pe e leʻi fesoasoani foʻi iā te ia.
3. “Ia taʻu atu o outou popolega uma iā te ia, auā o loo manatu mamafa mai o ia iā te outou.”—1 Peteru 5:7.
Le uiga: O loo manatu mamafa mai le Atua iā i latou o loo mafatia. Ua ia valaaulia i tatou e tatalo atu iā te ia e faatatau i so o se mea e tatou te popole ai.
Faataʻitaʻi: Ia fai se lisi o mea e māfua ai ona e popole. Ona tatalo lea i le Atua e faatatau i na popolega, ia faamatala atu i ai faafitauli taʻitasi ma talosaga mo lana fesoasoani i le auala e taulima ai.
Pe a Lē Toe Iai Popolega
E lē gata o loo faamatalaina mai e le Tusi Paia le auala e feagai ai ma popolega, ae o loo folafola mai ai foʻi se taimi i le lumanaʻi o le a lē toe iai ni popolega ia e tatou te feagai ai i aso nei. E faapefea ona tupu lenā mea?
O le a aveesea e le Malo o le Atua mea e māfua ai popolega. (Faaaliga 21:4) I lalo o le pulega o lenā Malo, o le a lē toe manatua ai popolega o loo lofitūina ai i tatou i aso nei.—Isaia 65:17.
O le lumanaʻi lea e finagalo “le Atua o lē e na te aumaia le filemu” e te mauaina. (Roma 16:20) Ua ia faamautinoa mai: “Ua ou iloa lelei manatu ua ou manatu ai iā te outou, . . . o manatu o le filemu ae e lē o le malaia, ma ia avatu iā te outou se lumanaʻi ma se faamoemoe.”—Ieremia 29:11.