E faapefea ona ou feagai ma popolega?

O ā mea e faapopoleina ai oe?

Pe e atagia i faamatalaga o loo mulimuli mai ou faalogona i nisi taimi?

“Ou te mafaufau pea: ‘Ae ā pe a . . . ?’ ‘Ae ā pe afai e lavea le matou taavale?’ ‘Ae ā pe a lavea le vaalele?’ Ou te popole i mea e lē o popole tele i ai le toʻatele o tagata.”​—Charles.

“Ou te popole i taimi uma, e tai pei aʻu o se hamster o loo tamoʻe i totonu o se uili o loo taamilo ae e leai se mea o alu i ai. Ua alu uma loʻu taimi ma le malosi i laʻu galuega ae e leai se mea o faataunuuina ai.”​—Anna.

“Pe a faaamuia mai tagata i loʻu iai pea i le aʻoga, ou te faapea ifo, ‘E latou te lē o iloa mai le tele o omiga o loo iai i le aʻoga.’ ”​—Daniel.

“Ou te lagona o loo oʻu feagai pea ma omiga. Ou te popole i taimi uma po o le ā le isi mea o le a tupu po o le isi foʻi mea e manaʻomia ona ou faia.”​—Laura.

Mea moni: Ua tatou ola i le vaitaimi o loo taʻua i le Tusi Paia o “aso e sili ona faigatā.” (2 Timoteo 3:1) O le māfuaaga lea e mafai ai ona aafia talavou i popolega, e pei foʻi ona aafia ai tagata matutua.

Pe e leaga i taimi uma le popole?

O le tali, e leai. Ua taʻua i le Tusi Paia e talafeagai ona popole tagata, ina ia faafiafiaina ai ē e latou te alolofa i ai.​—1 Korinito 7:​32-34; 2 Korinito 11:28.

E mafai foʻi ona avea le popole ma uunaʻiga malosi. O se faataʻitaʻiga, seʻi faapea o le a suʻe sau suʻega i le aʻoga i le vaiaso fou. O le popole e ono uunaʻia ai oe e sauniuni lelei i lenei vaiaso, ma atonu o le a fesoasoani lenā iā te oe e maua ai ni togi e sili atu ona lelei.

O sina popolega e mafai foʻi ona lapataʻia ai oe i se tulaga e lamatia ai. Ua faapea mai se talavou e igoa iā Serena: “E te ono lagona le popole talu ai e te iloa o loo sesē lau gaoioiga o loo fai, ma e manaʻomia ona e faia ni suiga ina ia maua ai se lotofuatiaifo lelei.”​—Faatusatusa i le Iakopo 5:14.

Mea moni: E mafai ona lelei le popole mo oe, pe afai e uunaʻia oe e faia se gaoioiga lelei.

Ae faapefea pe afai e maileia oe i le popole ma iʻu ai ina sesē ou mafaufauga?

Faataʻitaʻiga: Ua faapea mai Richard o se talavou e 19 tausaga: “Ou te popole pe a ou mafaufau i auala eseese e ono iʻu i ai se tulaga o loo oʻu mafatia ai. Ou te mafaufau pea i lenā tulaga seʻia oo lava ina ou lagona ai le matuā popole.”

Ua faapea mai le Tusi Paia, “o le loto e toʻafilemu o le ola lea o le tino o le tagata.” (Faataoto 14:30) Ae i le isi itu, e mafai foʻi e le popole ona faatupuina le tele o maʻi i le tino, e aofia ai le tigā o le ulu, tigā o le manava, ma le tātāvale o le fatu.

O ā mea e mafai ona e faia pe a foliga mai e iai itu e lē lelei ai le popole mo oe, nai lo o itu e lelei ai?

Mea e mafai ona e faia

• Iloilo po o talafeagai le māfuaaga e te popole ai. “E ese le popole i ou tiute tauave; ese le soona popole. Ou te manatua ai se faaupuga e faapea, O le popole e tai pei o se nofoa faalue. E te fiu e faalue ai ae o loo tumau lava i le mea e tasi.”​—Katherine.

  Manatu o le Tusi Paia: “O ai ea se tasi o outou e mafai e lona popole ona toe faaopoopo ni nai aso i lona olaga?”​—Mataio 6:27.

  Le uiga: Afai e lē foʻia e le popole se faafitauli, e na o le faateteleina ai o le faafitauli pe avea foʻi ma ou faafitauli.

• Uaʻi i popolega o le aso lava ia. “Ia mafaufau lelei. Po o le a iai se aafiaga o mea o loo e popole ai i le aso a taeao? masina fou? tausaga fou? po o le isi lima tausaga?”​—Anthony.

  Manatu o le Tusi Paia: “Ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—Mataio 6:34.

  Le uiga: E leai se aogā o le popole i faafitauli o le isi aso, atonu o nisi o na popolega e lē taitai tutupu.

• Ia lotomalie i le tulaga o mea o loo iai. “O le mea sili e te faia o le nofosauni lea e fai le mea e gata ai lou mafai, ae ia talia le mea moni e iai tulaga e lē mafai ona e suia.”​—Robert.

  Manatu o le Tusi Paia: “E lē manumalo pea i le tausinioga o ē e saosaoa, . . . pe e aloaʻia foʻi i latou ua popoto; auā e tutupu faafuaseʻi mea iā i latou uma i le taimi e leʻi faatalitalia.”​—Failauga 9:11.

  Le uiga: O nisi taimi e lē mafai ona e suia le tulaga o mea, ae e mafai ona sui le auala e te vaai ai i na tulaga.

• Ia iai se vaaiga saʻo. “E manaʻomia ona ou malamalama lelei i le tulaga moni o mea, ae aua le soona popole i mea lāiti. E manaʻomia ona ou filifili po o ā mea e sili ona tāua ma faaaogā loʻu malosi e faia ai na mea.”​—Alexis.

  Manatu o le Tusi Paia: ‘Ia faamautinoa mea e sili ona tāua.’​—Filipi 1:10.

  Le uiga: O tagata e iai le vaaiga saʻo i o latou popolega, e faigatā ona lofitūina i le lotovaivai.

• Talanoa i se isi. “Ina ua sefulu tasi oʻu tausaga, e tele ina tuua mai le aʻoga ou te lagona le matuā popole ma na ou fāʻatu e toe foʻi i le aso na sosoo ai. Na faalogologo lelei loʻu tinā ma loʻu tamā a o sasaa atu iai oʻu faalogona. Na ou fiafia i lo la fesoasoani mai. Na ou maufaatuatuaina i laʻua ma saʻoloto laʻu talanoa atu iā i laʻua. Na fesoasoani lea iā te aʻu e fesagaʻia ai mea o le a tutupu i le aso e sosoo ai.”​—Marilyn.

  Manatu o le Tusi Paia: “O popolega i le loto o le tagata e faavaivai ai le loto, a o tala lelei e olioli ai le loto.”​—Faataoto 12:25.

  Le uiga: Atonu e mafai ona avatu e se matua po o se uō ni fautuaga aogā iā te oe, i le auala e faaitiitia ai lou popole.

• Tatalo. “O le tatalo, aemaise le tatalo leotele ina ia lagona loʻu leo, e fesoasoani lea iā te aʻu. O lea auala e mafai ai ona faaleo atu mea o loo oʻu popole ai, nai lo o le mafaufau pea i ai. E fesoasoani foʻi iā te aʻu e iloa ai e sili atu Ieova nai lo o oʻu popolega.”​—Laura.

  Manatu o le Tusi Paia: “Ia taʻu atu o outou popolega uma [i le Atua], auā o loo manatu mamafa mai o ia iā te outou.”​—1 Peteru 5:7.

  Le uiga: O le tatalo e lē na o se auala e faatoʻafilemu ai le mafaufau. Ae o le auala lea e fesootaʻi ai ma Ieova le Atua o lē na folafola mai: “Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe.”​—Isaia 41:10.