Po o le a Amata Mai i Isaraelu le Taua o Amaketo?—O le ā le Manatu o le Tusi Paia?

I le Tusi Paia, e lē o faamatalaina ai Amaketo o se taua e aafia ai na o se vaega patino o le lalolagi, ae o se taua o le a tauina i le lalolagi atoa i le vā o faigāmalo faaletagata uma ma le Atua.

• “O faamatalaga ia mai i temoni . . . ua latou ō atu i tupu o le lalolagi uma, ina ia faapotopoto i latou i le taua o le aso tele o le Atua o Lē e ona le malosi uma lava. Ua latou faapotopoto foʻi iā i latou i le mea ua igoa i le upu Eperu o Amaketo.”—Faaaliga 16:14, 16.

O le upu “Amaketo” e mai i le upu Eperu Har Meghid·dohnʹ, lea e uiga atu i le “Mauga o Mekito.” O Mekito o se aai i Isaraelu anamua. O le māfuaaga lea e manatu ai nisi tagata, o le a tauina le taua o Amaketo i Isaraelu. Peitaʻi, e lē mafai ona ofi “tupu o le lalolagi uma” ma a latou ʻautau, pe a faapotopoto i Mekito po o se isi lava vaipanoa i Sasaʻe Tutotonu.

Na tusia le tusi o Faaaliga i se gagana faafaatusa, pe ina ia faailoa mai ai ni “faailoga.” (Faaaliga 1:1) E lē faasino atu Amaketo i se nofoaga moni, ae e faasino atu i le mea o le a tupu i le lalolagi aoao, pe a faapotopoto atunuu uma i le latou taumafaiga mulimuli ina ia tetee atu i le Atua.—Faaaliga 19:11-16, 19-21.