O Ai e Ō i Seoli?

Le tali a le Tusi Paia

O seoli e faasino atu i le tuugamau, ae e lē o se nofoaga e faapuapuagatia ai i se afi. O ai e ō i seoli? O tagata lelei ma tagata amioleaga. (Iopu 14:13; Salamo 9:​17) O loo taʻua i le Tusi Paia o lenei nofoaga faafaatusa ua momoe ai le toʻatele o tagata ua maliliu, o “le faleʻie o le feiloaʻiga o tagata ola uma.”​—Iopu 30:23.

Na alu foʻi Iesu i seoli ina ua maliu. Peitaʻi, e leʻi “tuua o ia i Seoli,” auā na toe faatūina o ia e le Atua.​—Galuega 2:​31, 32, The Bible in Basic English.

Pe e faavavau ona iai seoli?

O tagata uma e ō atu i seoli, o le a toe ō mai pe a faatutū i latou e Iesu e ala i le mana o le Atua. (Ioane 5:​28, 29; Galuega 24:15) Ua taʻua i le valoaga e faatatau i le toetū i le lumanaʻi i le Faaaliga 20:13, “ua avae foʻi e le oti ma seoli e na oti sa i ai.” (Tusi Paia Samoa—Lomiga 1969) Pe a toe faatutūina uma tagata oti na iai i seoli, ona lē toe iai lea o seoli, ma o le a lē toe alu atu foʻi i ai se tasi, auā o le a “lē toe iai se oti.”​—Faaaliga 21:​3, 4; 20:14.

E lē o tagata uma e maliliu e ō atu i seoli. O loo faailoa mai i le Tusi Paia, o le a iai tagata e faaauau pea ona faia mea leaga e aunoa ma le salamō. (Eperu 10:26, 27) Pe a maliliu i latou na, e latou te lē ō atu i seoli, ae e ō atu i Kena, lea o loo faaata mai ai le faaumatiaga e faavavau. (Mataio 5:​29, 30) O se faataʻitaʻiga, na faailoa mai e Iesu, o le a ō atu i Kena nisi o taʻitaʻi lotu faafiaamiotonu i ona aso.​—Mataio 23:27-​33.