UA FESILI MAI TALAVOU
Foafoaga po o le Evolusione?—Vaega 3: Aiseā e Talitonu ai i le Foafoaga?
“Pe a e talitonu i le foafoaga, e ono faapea tagata e leʻi lava au aʻoga, po o talitonuga na e aʻoaʻo ai e mātua a latou fanau a o lāiti, po ua faasesēina foʻi oe e le tou lotu.”—Jeanette.
Pe e tutusa lua manatu ma Jeanette? Afai o lea, e foliga mai ua e lē mautonu i ou talitonuga e faatatau i le foafoaga. O le mea moni, e tatou te lē mananaʻo e manatu tagata e tatou te leʻi aʻoʻoga. O le ā se fesoasoani mo oe?
Manatu e tetee i le foafoaga
1. Pe a e talitonu i le foafoaga, o le a manatu tagata e te lē talitonu i le faasaienisi.
“Na fai mai loʻu faiaʻoga, o tagata e talitonu i le foafoaga e augatatā e suʻesuʻe e faatatau i le lalolagi ma meafaiola o loo iai.”—Maria.
Le mea e tatau ona e iloa: O i latou e faia na faamatalaga, e latou te lē o iloa le mea moni. E oo lava i saienitisi lauiloa e pei o Galileo ma Isaac Newton na talitonu e iai Sē na foafoaina mea. E leʻi feteenaʻi o latou talitonuga ma lo latou naunau i le faasaienisi. E faapena foʻi nisi saienitisi i aso nei, e latou te ioe e lē feteenaʻi le faasaienisi ma le talitonuga o le foafoaga.
Ia faataʻitaʻi: I le pusa e suʻe ai i Lomiga Faale-Tusi Paia I LE INITANETI, ia tā i totonu le faaupuga “faamatala lona faatuatua” (e aofia ai faailoga mo upu sii) ina ia maua ai faaaʻoaʻoga o fomaʻi ma saienitisi e talitonu i le foafoaga. Mātau po o le ā na fesoasoani iā i latou e talitonu ai i le foafoaga.
Le manatu autū: O le talitonu i le foafoaga, e lē faapea ai ua e tetee i le faasaienisi. Nai lo o lenā, o le tele o mea e te aʻoaʻoina mai i mea o le natura, e mafai ona faamalosia ai lou talitonuga i le foafoaga.—Roma 1:20.
2. Pe a e talitonu i le tala a le Tusi Paia e faatatau i le foafoaga, o le a manatu tagata o oe o sē e mapolotu.
“E toʻatele tagata ua fai mai o tala i le foafoaga ua na o se fagogo. E latou te manatu o le tala i le Kenese ua na o se talafatu.”—Jasmine.
Le mea e tatau ona e iloa: E masani ona sesē manatu o tagata i tala a le Tusi Paia e faatatau i le foafoaga. O se faataʻitaʻiga, ua faapea mai nisi e talitonu i le foafoaga, e leʻi leva ona foafoaina le lalolagi, pe na foafoaina le lalolagi ma meafaiola uma i ni aso se ono e taʻi 24 itula. E lē lagolagoina e le Tusi Paia na talitonuga.
Ua taʻua manino i le Kenese 1:1: “Na foafoaina e le Atua le lagi ma le lalolagi i le amataga.” E lē feteenaʻi lenā mau ma faamaoniga faasaienisi ua faitau piliona tausaga o iai le lalolagi.
O le upu “aso” o loo faaaogāina i le Kenese, e mafai ona faasino atu i ni vaitaimi uumi. E pei o le Kenese 2:4, o loo faasino atu ai le upu “aso” i aso uma e ono na foafoaina ai mea.
Le manatu autū: E lagolagoina e tala o le Tusi Paia e faatatau i le foafoaga faamaoniga faasaienisi.
Ia mafaufau i mea o loo e talitonu ai
O le talitonu i le foafoaga, e lē o ni manatu e lē faavaea. Ae e faavae i le mafaufau lelei i mea moni. Seʻi mafaufau i le manatu lenei:
O le tulaga masani lava o le olaga, afai e iai se meafaitino, e iai foʻi sē na faia. Pe a e vaai i se meapuʻeata, se vaalele, po o se fale, e mautinoa e te mafaufau e iai se tasi na faia na mea. Pe e te lē mafaufau foʻi la faapena pe a e vaai i le mata o le tagata, se manulele i le lagi, po o lo tatou lalolagi paneta?
Ia mafaufau i le mea lenei: E masani ona kopi e inisinia mea o le natura ina ia faaleleia ai mea e latou te fausia, ma e mananaʻo e amanaʻia e isi a latou galuega. Pe e talafeagai la le amanaʻia o le inisinia ma ana galuega, ae e tatou te lē amanaʻia Lē na foafoaina mea ma ana foafoaga e sili atu le ofoofogia?
Pe e talafeagai le faapea atu e iai sē na faia le vaalele, ae e leai sē na foafoaina le manulele?
Meafaigaluega e fesoasoani iā te oe e iloilo ai faamaoniga
E mafai ona faamalosia lou talitonuga i le foafoaga, e ala i le iloilo o faamaoniga o mea o loo i le natura.
Ia faataʻitaʻi: I le pusa e suʻe ai i Lomiga Faale-Tusi Paia I LE INITANETI, ia tā i totonu le faaupuga “pe na teʻi lava ua iai” (e aofia ai faailoga mo upu sii). Filifili nisi o ulutala e te fiafia i ai mai i le faasologa o mataupu “Pe na Teʻi Lava ua Iai?” i le Ala Mai! I mataupu taʻitasi, ia mātau se vala mataʻina o se mea o le natura o loo e faitau ai. E faapefea ona faamalosia ai lou talitonuga e iai Sē na foafoaina mea?
Saʻiliʻili atili: Faaaogā polosiua nei e iloilo atili ai faamaoniga o le foafoaga.
Was Life Created?
E saʻo lelei le tulaga o le lalolagi i le vateatea, ma ua lava saunia ina ia maua ai pea le ola.—Tagaʻi i le itulau 4-10.
Faataʻitaʻiga o mea na fausia na kopi mai i mea o le natura.—Tagaʻi i le itulau 11-17.
O le tala a le Tusi Paia o le foafoaga o loo i le Kenese, e ōgatusa ma le faasaienisi.—Tagaʻi i le itulau 24-28.
The Origin of Life—Five Questions Worth Asking
E leʻi faafuaseʻi ona maua le ola mai i se mea e leai se ola.—Tagaʻi i le itulau 4-7.
Pe a fua i le tulaga lavelave o meafaiola, e lē mafai ona faapea atu na teʻi lava ua iai.—Tagaʻi i le itulau 8-12.
E sili mamao atu ona tele faamatalaga o loo i le DNA nai lo o faamatalaga o teuina i masini faaonapōnei.—Tagaʻi i le itulau 13-21.
E leʻi amata le ola mai i se meafaiola e tasi. E lagolagoina e faamaumauga o toēga o manu na maua mai i le eleele, le aliaʻe faafuaseʻi mai o le tele o manu o ituaiga eseese i se vaitaimi e tasi, nai lo o le faasolosolo ona sui o meafaiola.—Tagaʻi i le itulau 22-29.
“Ua atili ona ou talitonu o loo soifua le Atua, pe a ou mātauina mea o le natura e pei o manu o loo ola i le lalolagi, ma le auala maopoopo o faatulagaina ai le vateatea.”—Thomas.