O le ā le Manatu o le Tusi Paia i le Foaʻi Atu?
Tali a le Tusi Paia
O loo faalaeiauina i le Tusi Paia le faia o foaʻi tauofo, ma faia i se uunaʻiga saʻo. O na foaʻi, e maua uma ai e lē o loo foaʻi atu, ma lē o loo taliaina le fiafia. (Faataoto 11:25; Luka 6:38) Na faapea mai Iesu “E sili le fiafia e maua i le foaʻi atu i lo o le talia mai.”—Galuega 20:35.
E faapefea ona maua aogā i le foaʻi atu?
E maua aogā i le foaʻi atu pe a faia faatauofo. Ua faapea mai le Tusi Paia: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.”—2 Korinito 9:7.
O foaʻi e faia ma le lotomalie, o se vaega o la tatou “tapuaʻiga” lea e talia e le Atua. (Iakopo 1:27) O le tagata e faaalia le limafoaʻi iā i latou e manaʻomia le fesoasoani, o loo la galulue faatasi ma le Atua. E silasila le Atua i se tasi e faaalia le limafoaʻi, e peiseaʻī o loo nonō atu iā te ia. (Faataoto 19:17) Ua faailoa mai i le Tusi Paia, o le a tauia e le Atua lē e foaʻi atu.—Luka 14:12-14.
E faapefea ona lē maua le finagalo malie o le Atua i le foaʻi atu?
Pe a faia i se uunaʻiga manatu faapito. E aofia ai le manaʻo e:
Viiviia o ia e tagata.—Mataio 6:2.
Toe maua mai se totogi.—Luka 14:12-14.
Faatau mai ai le faaolataga.—Salamo 49:6, 7.
Pe afai e lagolagoina ai ni gaoioiga po o amioga e inosia e le Atua. Mo se faataʻitaʻiga, e sesē le avatu i se tasi o se tupe e taalo ai i taaloga faitupe pe faatau ai ni fualaau faasāina po o le ʻava malosi. (1 Korinito 6:9, 10; 2 Korinito 7:1) E lē talafeagai foʻi ona foaʻi atu i se tagata e lē fia galue e tausia ona manaʻoga tau tupe, e ui o loo mafai lava ona ia faia faapea.—2 Tesalonia 3:10.
Pe afai ua lē faataunuuina ai o tatou tiute tauave mai le Atua e tatau ona fai. Ua aʻoaʻo mai i le Tusi Paia, e tatau i ulu o aiga ona tausia manaʻoga o o latou aiga. (1 Timoteo 5:8) E lē tatau i ulu o aiga ona soona foaʻi atu i isi, ae lē lelei ai le tausiga o lona aiga. Na taʻusalaina foʻi e Iesu i latou na mumusu e tausia o latou mātua ua matutua, e ala i le faapea mai o mea uma ua iā i latou, “o le meaalofa e ave i le Atua.”—Mareko 7:9-13.