E Faapefea Ona Atia‘e le Onosa‘i

“O aso ta‘itasi e tofotofoina ai le onosa‘i o se tane ma se avā. A o e nofofua atonu e lē o se faafitauli tele le onosa‘i, ae e matuā tāua lava le onosa‘i i le mauaina o se faaipoipoga e taulau manuia.”—John

• Aiseā e mana‘omia ai ona e onosa‘i?

• E faapefea ona e faaalia le onosa‘i?

• “E matuā tāua le onosa‘i”

Aiseā e mana‘omia ai ona e onosa‘i?

• Talu ai ua e faaipoipo i lau paaga ua e masani lelei la i ana mea sesē.

  “O le taimi lava e te‘a ai le talutalu fou o le faaipoipoga, o le faigofie fo‘i lenā ona e ua‘i atu i masei o lau paaga. O le taimi lava e amata ai ona iā te oe na uiga lē lelei, o le faigofie fo‘i lenā ona mou ese lou onosa‘i.”—Jessena.

• O le lē onosa‘i e māfua ai ona e tautala e aunoa ma le mafaufau muamua.

  “E vave lava ona faaali atu o‘u faalogona ma o nisi taimi ou te fai atu ai se tala sa lē tatau ona ou faia. Pe ana ou onosa‘i, e mafai ai ona ou mafaufau muamua pe e tatau ona ou fai atu ai se tala, ma atonu ou te iloa ai e lē tatau.”—Carmen.

  Ua faapea mai le Tusi Paia: “E faapalepale ma e agalelei le alofa.” (1 Korinito 13:4) E foliga mai e matuā talafeagai lava ona faaalia le onosa‘i e ni tagata se to‘alua e alofa le tasi i le isi. Ae e lē o le mea lenā e tupu i taimi uma. E pei ona faamatalaina e John lea na ta‘ua i le amataga, “E pei lava le onosa‘i o isi uiga lelei, e faigofie ona faaitiitia nai lo o le faateleina. E mana‘omia taumafaiga ina ia faateleina ai le onosa‘i.”

E faapefea ona e faaalia le onosa‘i?

• Pe a tupu faafuase‘i se mea e tofotofoina ai lou onosa‘i.

  Faata‘ita‘iga: Ua fai atu e lau paaga se tala e faatigā ai iā te oe. E vave lava ona oso a‘e iā te oe le fai atu fo‘i o se tala faatigā.

  Mataupu Silisili o le Tusi Paia: “Aua ne‘i vave ona tigā lou loto, auā o ē e vālea o i latou ia e tigā o latou loto.”—Failauga 7:9.

  Auala e faaalia ai le onosa‘i: Ia faatali mo sina taimi. Ae e te le‘i tali atu, taumafai e iloa e le‘i fuafua lau paaga e faatigā iā te oe. Ua ta‘ua i se tusi Fighting for Your Marriage “O le to‘atele o i tatou e tali atu ona o lo tatou faauiga sesē o mea na fai mai ai lau paaga, nai lo o le uiga moni o lana tala.”

  

  E tusa lava fo‘i pe na taumafai lau paaga e faatigā iā te oe, ae o le faaalia o le onosa‘i e ala i lou lē tauimasui o le a faaitiitia ai le femisaa‘i. Ua faapea mai le Tusi Paia, “E mate le afi pe a leai ni fafie.”—Faataoto 26:20.

  “Pe a amata ona tupu a‘e ni ou lagona lē fiafia i lau avā, ia nofo i lalo ma mafaufau i māfuaaga na e alofa ai iā te ia ma vave ona e taumafai e fai se mea lelei mo ia.”—Ethan.

  Mea e mafaufau i ai:

  • O le ā e te faia pe a fai mai e lau paaga se tala, pe fai fo‘i se mea e te tigā ai?

  • E faapefea ona e matuā faaalia le onosa‘i i se taimi e toe tupu ai?

• Pe a toe tupu mai se mea e tofotofoina ai lou onosa‘i.

  Faata‘ita‘iga: Ua fai ma masani a lau paaga le tuai, ma e te matuā ita ai ona o lou fiu e faatali.

  Mataupu Silisili o le Tusi Paia: “Ia faaauau ona onosa‘i le tasi i le isi, ma ia fefaamagaloa‘i ma le lotoatoa.”—Kolose 3:13.

  Auala e faaalia ai le onosa‘i: Ia taumafai e faamuamua mana‘oga o lau paaga nai lo o ou mana‘oga. Ia fesili ifo, ‘⁠Po o le taua‘imisa i lenei mataupu, e faaleleia pe e faaleagaina ai le ma faiā?’ E tatau ona manatua, “e sesē i tatou uma i mea e tele.” (Iakopo 3:2) O lona uiga, e iai fo‘i mea e mana‘omia ona e galue e faaleleia.

  “I nisi taimi e sili atu lo‘u onosa‘i i a‘u uō nai lo o lo‘u onosa‘i i la‘u tane. Ou te iloa, ua ou malamalama lelei i vaivaiga o la‘u tane ona e tele atu le taimi e ma te faifaimea faatasi ai. Peita‘i, o le onosa‘i o se vala o le alofa ma o se faailoga o le faaaloalo. O lea, e matuā tāua tele le onosa‘i i la‘u faaipoipoga.”—Nia.

  Mea e mafaufau i ai:

  • O le ā le tele o lou onosa‘i i vaivaiga o lau paaga?

  • E faapefea ona e matuā faaalia le onosa‘i i le lumana‘i?