Fesili Mai le Au Faitau

◼ Pe sa fetalai tuusaʻo Ieova le Atua ia Atamu, pe sa ia fetalai atu e ala i le Upu, le Alo pele e toatasi o le Atua?

E lē o aumaia e le Tusi Paia ia i tatou se tali maʻoti e uiga i lenei fesili. E moni ona sa mafai e le Atua ona fetalai tuusaʻo i lona atalii lelei atoatoa faaletagata i Etena, ae atonu sa Ia fesootai ma Atamu e ala i le Upu.

E masani lava ona tautala le Tusi Paia i le faia e le Atua o se mea ae o le mea moni na ia faia e ala i se tasi pe sili atu foi o agelu. Mo se faataʻitaʻiga, ua taʻu mai e le Kenese 1:1 ia i tatou e faapea: “Na faia e le Atua le lagi ma le lalolagi i le amataga.” Pe ona pau lena o mea na taʻua e le Tusi Paia faatatau i le amataga o le vateatea, o le a tatou faia ai se faaiʻuga faapea na foafoaina tuusaʻo e le Atua le vateatea, e pei lava sa faia e ona aao. Ae peitai ua faalauteleina e Tusitusiga Kerisiano Eleni lo tatou malamalamaga. Ua tatou faitau ai: “Auā na faia e ia [le Alo o le Atua] o mea uma lava, o mea i le lagi ma mea i le lalolagi, o mea o vaaia ma mea e le o vaaia . . . na faia e ia mea uma lava, na faia foi mo ia.” (Kolose 1:16, 17) Ua faamautinoa foi e isi mau le vaega a le Alo i le foafoaina o le vateatea. (Ioane 1:3, 10; Eperu 1:1, 2) Peitai, o lana vaega sa avea e pei o se tagata faigaluega e lagolago atu ia Ieova, o lē na fuafuaina le foafoaga i le amataga, na faamalosia, ma taʻitaʻia.—Salamo 19:1.

Na fetalai le Atua i le uluai tagata: “O laau uma o i le faatoaga e te ʻai ai.” (Kenese 2:16, 17) Sa leʻi manaomia e Ieova se masini po o se meafaigaluega faaeletise, e pei o se mekafoni po o se leitiō. E pei ona faapea mai Le Olomatamata faa-Peretania o Aokuso 1, 1989: “E leʻi iloa e le tagata lē o loo fetalai mai. O le leo na sau mai i se mea e lē vaaia, i se nofoaga e lē vaaia, ma sa fai agaʻi atu ia te ia. O le leo o Lē na Faia le tagata, o Lē na Foafoaina o ia! . . . Sa leʻi tau manaomia e le tagata se leitiō faasaienitisi faaonaponei e faalogologo atu ai i le siufofoga o lē tauatua. O le Atua sa talanoa tuusaʻo lava ma ia.”

Pe sa fetalai le Atua e ala i se agelu, pe atonu o le Lokou, o lē na avea o Iesu? E matuā mafai lava lena mea. Ona sa leʻi faia faamalosia, na tusi ai C. T. Russell: “O Iesu atonu sa o le Sui o le Atua i le Faatoaga i Etena faatasi ma Atamu.” (Le Olo Matamata faa-Peretania Fepuari 1, 1915) O le Alo ulumatua o le Atua sa auauna mo se taimi umi i se tulaga maualuga e avea o le “Upu,” a lona Tamā po o le Fofoga Fetalai i agelu ma tagata. (Ioane 1:1; 12:49, 50; Faaaliga 1:1, 2) O lea e tusa lava pe o le faamatalaga a le Kenese o loo faafesootai mai ai se faaupuga faapea sa fetalai tuusaʻo le Atua ia Atamu e toatasi, ua lē faapea la ua faaleaogāina ai Lana fetalaiga e ala i se agelu, e aofia ai le Upu, le Alo faalelagi o Ieova. Ae maise lava pe o se mea e matuā manatu mamafa i ai faapea na faaaogāina e Ieova le Lokou e foafoaina le tagata i le uluai nofoaga, ma o ia lenei ‘sa olioli i mea sa aafia ai le fanau a tagata.’—Faataoto 8:22, 31; Ioane 1:3.

Mo se faaaʻoaʻoga, seʻi manatu i le mea na tupu ina ua alu aʻe Mose i luga o le Mauga o Sinai. Ua faamatala mai e le Esoto 19:21-24: “Ona fetalai lea o Ieova ia Mose . . . A ua tali atu Mose ia Ieova . . . Ona fetalai lea o Ieova ia te ia.” I lea o le faamatalaga e uiga i le tuuina mai o Tulafono e Sefulu ua faailoa mai i lenei auala: “Ona fetalai mai lea o le Atua i nei upu uma lava.” (Esoto 20:1) Pe foliga mai i le faalogo faapea sa fetalai totino atu e le Atua upu o le Tulafono? O se faaupuga faapena e mafai ona maua le lagolagosua i le mea ua taʻu mai ia i tatou faapea na fetalai le Atua ia Mose i se tulaga o loo “fesagai lava.”—Esoto 33:11.

O loo tumau pea ona iai se isi faaaliga atili o lenei mea. Na tusi le aposetolo o Paulo e uiga i le Tulafono: “Sa saunia e agelu na aumaia e le tautuu upu [puluvaga].” (Kalatia 3:19) Mulimuli ane, sa matuā faatusatusa maʻoti e Paulo faatonuga na saunia e le Atua e ala i le Tulafono ma le mea na maua e Kerisiano e ala ia Iesu: “Afai na faamauina le upu na molia mai e agelu, taitasi foi soli tulafono ma faalogogata ma oo i ai le taui . . . , pe sao faapefea i tatou pe a faatamala i le olataga e matuā tele? sa muai fetalaia mai e le Alii [Iesu], ona faamaonia mai lea ia i tatou e i latou sa faalogo ia te ia.” (Eperu 2:2, 3) O lea e leʻi fetalaia e le Atua upu o le Tulafono i lona lava siufofoga totino, na te leʻi faaaogāina foi le Lokou. Na i lo o lea, sa ia filifili e faaaogā isi agelu.

O lea, o le ā le manatu autū? E masani ona tatou matauina pe a tatou faitau e uiga i le Atua o fetalai i tagata, tatou te iloa ai sa ia faia faapea e ala i mea faiola agaga usiusitai o ē na tautala mo ia. (Faatusatusa Kenese 18:2, 3, 33; 19:1; Esoto 3:2-4; Faamasino 6:11, 12, 20-22.) O le tofia o Iesu e avea o le Upu ua fautuaina ai faapea o ia o lē sa masani ona faaaogāina e le Atua e fesootai ai ma isi o ana mea faiola. Pe sa aofia ai le atalii lelei atoatoa o le Atua o Atamu? Ai lava e faapena.—Luka 3:38.

E moni e faapea ina ua oo mai mulimuli ane le Lokou i le lalolagi, sa fetalai faatolu le Tamā i se leotele na mafai ai e lenei “Atamu mulimuli” ona lagona lelei. (1 Korinito 15:45; Mataio 3:16, 17; 17:1-5; Ioane 12:28-30) I nei mea, aiseā e ao ai i le Atua ona fetalai i lona pe e uiga i lona Alo pele e ala i se agelu e faasalavei ane? E sili lava ona manino, atonu sa fetalai tuusaʻo Ieova i lona Alo lelei atoatoa, ma e oo lava i tagata lē lelei atoatoa sa latalata ane, na faalogo i le siufofoga o le Atua lava ia. O lea ina ua foafoaina Atamu lelei atoatoa, sa mafai e lona Tamā alofa ona feutagai tuusaʻo ma lenei foafoaga lelei atoatoa fou. Ae peitai, i le manatu e uiga i le agaʻi atu i luma, e foliga mai sa ia faaaogā le Upu.