O le Soifuaga o Iesu ma Lana Faiva

Le Amataga o se Aso Faigata

INA UA tuua e Iesu Ierusalema i le afiafi po o le Aso Gafua, ua toe foi atu o ia i Petania i le malifa i le itu i sasae o le Mauga o Olive. Ua faaiʻuina aso mulimuli e lua o lana faiva i Ierusalema. E lē taumatea ua toe faaalu foi e Iesu le po faatasi ma lana uo o Lasalo. Talu mai lona taunuu mai Ieriko i le Aso Faraile, o le po lona fa lenei i Petania.

O lenei, i le taeao po o le Aso Lua, Nisani 11, ua toe aga atu ai o ia ma ona soʻo i le auala. Ua faamaonia e lenei mea o se aso faigata o le faiva a Iesu, o se aso aupito sili atu ona pisi. O le aso mulimuli lenei na ulu atu ai o ia i le malumalu. Ma o le aso mulimuli lenei o lana faiva i le lautele a o leʻi oo i ona puapuaga ma le faaoosalaina o ia.

Ua latou ui atu i le auala lava lea i le Mauga o Olive agaʻi atu i Ierusalema. I lena auala mai Petania, ua iloa ai e Peteru le laau na fetuu e Iesu i le taeao muamua atu. “Rapi e, faauta!” ua ia alaga atu ai ma le ofo, “i le mati na e tuʻituʻia ua mago.”

Ae aiseā na faamate ai e Iesu le laau? Ua ia faailoa mai le pogai ina ua ia fetalai atili mai: “E moni, ou te fai atu ia te outou, Afai ua ia te outou le faatuatua, ma outou le masalosalo, ona faia lea e outou e le na o le mea ua faia i le mati, a e afai tou te fai atu i lenei mauga, [le Mauga o Olive lea o loo latou tutū ai], Ia siitia oe, ma lafoina i le sami, ona faia lava lea. O mea uma foi tou te ole mai ai i le tatalo ua i ai le faatuatua, e maua lava e outou.”

O lea e ala i le faamateina o le laau, ua saunia ai e Iesu mo ona soʻo se lesona sili i le manaomia ona latou maua le faatuatua i le Atua. E pei ona ia taʻua: “O mea uma foi tou te ole mai ai i le tatalo ua i ai le faatuatua, e maua lava e outou.” Maeu se lesona tāua mo i latou e aʻoaʻoina,ae maise lava i le manatu i tofotofoga mataʻutia ua lē o pine ae oo mai! Peitai, e iai se isi fesootaiga i le va o le mate o le laau o le mati ma le uiga o le faatuatua.

O le nuu o Isaraelu i le pei o lenei laau o le mati, e iai se foliga taufaasese. E ui lava ua iai le nuu i se faiā faalefeagaiga ma le Atua ma atonu e foliga mai i fafo lo latou usiusitai i ana tapulaa, ae ua faamaonia le leai o se faatuatua, le lē taulau ona fua mai ni fua lelei. Ona o le leai o se faatuatua, ua oo ai i le tulaga o le teena o le Alo lava o le Atua! O lea, e ala i le faamateina o le laau o le mati ona o le lē fua mai, ua faataʻitaʻia ai ma le tonu e Iesu le iʻuga o lenei nuu e leai ni fua, e lē faatuatua.

E leʻi pine, ae oo atu loa Iesu ma ona soʻo i Ierusalema, ma e tusa ai o la latou tu, ua latou ō atu i le malumalu, o i inā ua amata ona aʻoaʻo atu ai Iesu. E lē taumatea o loo manatua pea e ositaulaga sili ma toeaina o le nuu le gaoioiga a Iesu na faia i le uluai aso ua mavae faasaga i tagata suitupe, ona latou luʻia ai lea o ia: “O le a ea le pule e te fai ai na mea? o ai foi na na tuuina atu ia te oe lenei pule?”

I le tali atu na fetalai ai Iesu: “Ou te fesili atu foi aʻu ia te outou se upu e tasi; afai tou te taʻu mai lea ia te au, ona ou taʻuina atu lea le pule ou te fai ai nei mea. Se papatisoga ea a Ioane mai fea? mai le lagi ea, pe mai tagata?”

Ona felafolafoai lea o faitaulaga ma toeaina pe o le a faapefea ona latou tali atu. “Afai tatou te fai atu, Mai le lagi; ona fai mai ai lea o ia ia te i tatou, Se a foi le mea tou te lei talitonu ai ia te ia? Afai foi tatou te fai atu, Mai tagata; ua tatou fefefe i le motu o tagata; auā o la latou lea taofi uma ia Ioane, o le perofeta ia.”

Ua lē iloa e taʻitaʻi lotu po o le ā o le a latou tali atu ai. O lea ua latou tali atu ia Iesu: “Matou te le iloa.”

Ona tali fetalai atu lea o Iesu: “Ou te le taʻu atu foi ia te outou le pule ou te fai ai nei mea.” Mataio 21:19-27; Mareko 11:19-33; Luka 20:1-8.

◆ O le ā le uiga faapitoa i le Aso Lua, Nisani 11?

◆ O ā lesona ua saunia e Iesu ina ua ia faamateina le laau o le mati?

◆ O le ā le tali a Iesu ia i latou o ē na fesili mai po o le pule a ai ua ia faia ai ia mea?