O E Faia le Finagalo o le Atua?

I LE la faiva mai lea fale i lea fale, na feiloai ai ni Molimau a Ieova e toalua ma se faifeau o le Lotu Episcopal. Sa ia foliga mai o se tamaloa lelei, e iai sana ʻava, pe tusa ma le 60 tausaga le matua, o loo ofuina se mitiafu o tusia ai le igoa o lana lotu. I se mānava e tasi, na ia faapea mai: “Maimau pe ana maelega sui o la matou lotu e pei o outou i le faasalalauina o le Upu, ae e tatau ona ou fai atu ia te outou e aua neʻi toe asia maia loʻu aiga.”

Ioe, o loo iai le toatele o tagata o ē e mataia fiafia le galuega a Molimau a Ieova, ma faamālō ia i latou mo lo latou maelega ma le aasa. Ae, e matuā lē naunau lava i latou i mea o faia e Molimau, pe latou te manatunatu foi e faia e i latou lava le galuega. Ae peitai, o lenei tulaga o le feeseeseai o manatu e lē o se mea fou. Sa silafia lelei e Iesu i ona aso, ma sa ia ave i fale le manatu e ala i se faatusatusaga faatupu manatu.

“Pe ni a fa outou? O le tasi tagata e toalua ona atalii; ua alu atu ia i le ulumatua, ua faapea atu, Sole, ina alu ia i le asō, seʻi e galue i laʻu tovine. Ona tali mai ai lea o ia, ua faapea mai, Ou te musu; a e mulimuli ane ua salamo ia, ua alu. Ona alu atu ai lea o ia i le tasi, ua faapea foi lana upu ia te ia. Ona tali mai ai lea o ia, ua faapea mai, Le alii e, ou te alu; a ua le alu lava ia. O ai ea so laua na faia le loto o lo la tama?”—Mataio 21:28-31.

E manino le tali. I le pei o tagata o ē na faalogo ia Iesu, o le a tatou tali atu: “O le ulumatua.” Ae e sili atu i lena, e ala i lea faatusatusaga, sa faauai e Iesu i o tatou mafaufau e faapea, o le faia o le mea na manao i ai le tamā o le mea taulia lea. E ui ina sa faapea mai le ulumatua e musu, ae sa ia faia pea ma sa faamālō i ai ona o lena. O le faia o le ituaiga saʻo o galuega e matuā tutusa lona tāua. Na gaoioi le ulumatua i le galue i le tovine a lona tamā; na te leʻi alu e galue i lana lava tovine.

O le ā le uiga o nei mea uma mo i tatou? O le ā o loo manaomia e le Atua mai ē tapuai i aso nei? O le ā e mafai ona tatou aʻoaʻoina mai le olaga o Iesu, o le a fesoasoani ia i tatou e faia le finagalo o lona Tamā? O fesili tāua nei, ma o lo tatou mauaina o tali saʻo, o le a uiga lea i lo tatou lelei tumau, talu ai “o lē fai le finagalo o le Atua, e tumau lea e faavavau.”—1 Ioane 2:17; Efeso 5:17.

O le ā le “Finagalo o le Atua”?

E silia ma le 80 taimi o loo lisia ai le nauna “finagalo” i le Comprehensive Concordance of the New World Translation o le Holy Scriptures. Pe tusa ma le 60 taimi e tulai mai ai (po o le tusa ma le 75 pasene o le taimi) o loo faatatau i le finagalo o le Atua. E 20 taimi e aliai mai ai faaupuga nei e pei o le “finagalo o le Atua,” ma le “finagalo o loʻu Tama.” Ua mafai ona tatou iloa mai i lenei mea e faapea, o le finagalo o le Atua e tatau ona matuā tāua ia i tatou. O le faia o le finagalo o le Atua e tatau ona avea ma mataupu sili o o tatou olaga.

I le faa-Peretania o le uiga o le nauna “finagalo” o le ‘faanaunauga, manaoga, maumauai, se mea e tuinanau i ai, ae faapitoa lava i se filifiliga po o se maumauai o se tasi o loo iai le pule po o le malosi.’ O lea la, o Ieova, le Pule Silisili Ese, e iai se finagalo, se faanaunauga po o le maumauai. O le ā lea? Ua taʻu mai e le Tusi Paia ia i tatou i se vaega, e “finagalo [le Atua] ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) Na galulue Iesu Keriso ma uluai Kerisiano ma le loto atoa ina ia aumaia lenei poto saʻo i isi.—Mataio 9:35; Galuega 5:42; Filipi 2:19, 22.

O ai o loo faia le finagalo o le Atua i aso nei? I totonu o le toeitiiti lua piliona o tagata o ē e faapea mai o soʻo o Iesu Keriso, e toafia ua pei o le atalii ulumatua i le tala faafaatusa a Iesu, o lē na alu ma faia le finagalo o lona tamā? E lē faigata ona maua le tali. O soʻo moni e mulimuli i tulagaaao o Iesu Keriso o le a faia le galuega na ia fai mai latou te faia: “Ia muai talaʻiina foi le tala lelei i nuu uma lava e ao ai.” (Mareko 13:10) O Molimau a Ieova, ua silia i le fa ma le ʻafa miliona le aofai i le lalolagi aoao, o loo talaʻia malosi le tala lelei o le Malo o le Atua ma aʻoaʻoina isi, faasino i le Malo ua na o le pau lea o le faamoemoe mo le filemu ma le saogalemu. O iai ea sou sao atoatoa i le faia o le finagalo o le Atua? O e talaʻia ea le tala lelei o le Malo e pei ona sa faia e Iesu?—Galuega 10:42; Eperu 10:7.

Mauaina le Olioli i le Faia o le Finagalo o le Atua

E ui e iai le olioli i le aʻoaʻo po o le ā le finagalo o le Tamā, ae e iai le olioli e sili atu i le aʻoaʻoina o isi i le finagalo o le Atua. Na maua e Iesu le olioli i le aʻoaʻoina o tagata e faatatau i lona Tamā. Sa pei o meaʻai ia te ia. (Ioane 4:34) O i tatou foi o le a olioli i le fiafiaga moni pe afai tatou te faia e pei ona sa faia e Iesu, i se isi faaupuga, talaʻi ma aʻoaʻo mea na ia aʻoaʻoina, mea na ia maua mai lona Tamā. (Mataio 28:19, 20) E pei ona sa folafola e Iesu, “Afai ua outou iloa ia mea, amuia outou pe a outou faia.”—Ioane 13:17.

Ina ia faataitaia: Na faapea mai se tinā o lē faatoʻā toe ulu atu i le faiva paeonia faataimi atoa: “I le vaai atu i le pupula malamalama mai o foliga o se tagata aʻoga o le Tusi Paia a o pāʻia le loto i upu moni eseese o se fiafiaga tele! Maeu se olioli ia te aʻu i le vaai i se tagata aʻoga patino e toatasi o loo tusilima atoa uma mau a o leʻi amata le suesuega, ma faia faamaumauga a o faagasolo le suesuega ina ia mafai ona ia taliina so o se fesili autalu e mulimuli mai.” O se isi o ana tagata aʻoga o le Tusi Paia sa iai ni fesootaiga ma le upu moni i ona uluai tausaga talavou. I le taimi nei, ua faaipoipo ma popole e faatatau i ni faafitauli totino, sa ia faanaunau e maua ia Molimau. Maeu se fiafia ina ua maua e le tuafafine paeonia o ia! Sa iai le agaga fiafia i le tamaitai talavou e toe amata lana suesuega faale-Tusi Paia.

Faatumauina le Olioli i le Faia o le Finagalo o le Atua

O le tupu o Tavita o Isaraelu anamua sa o se tasi o lē na saili e faia le finagalo o le Atua i lona olaga atoa. E ui i le tele o faigata ma omiga na aumaia e faasaga ia te ia, na faagaeeina o ia e faapea mai: “Loʻu Atua e, ou te fiafia e fai lou finagalo; o loo i totonu lava ia te au lau tulafono.” (Salamo 40:8) O le faia o le finagalo o le Atua sa i totonu o lona solu, i lona lava tagata. O le mea lilo lena o lona olioli lē maluelue i le auauna ia Ieova. O le faia o le finagalo o Ieova sa lē o se toatuga ia Tavita. Na i lo o lea, sa o se fiafiaga, se mea sa sau mai i lona loto. I lona olaga atoa, na ia tauivi e faia le mea lelei na te mafaia e auauna ai i lona Atua, o Ieova, e ui sa iai taimi na ia agasala ma masei ai.

I nisi tulaga, atonu e mou atu ai lo tatou olioli. Atonu tatou te faavaivai pe loto mafatia. Atonu o se faafitauli ia i tatou i lo tatou olaga ua tuanai, faalavelavea e lo tatou loto fuatiaifo i tatou i se gaoioiga sese na faia i le taimi ua mavae. E masani ona mafai ona tatou manumalo i nei lagona i se suesuega maeaea o le Afioga a le Atua. E mafai ona tatou tausinio e tamau tulafono a le Atua i “totonu” o i tatou, pei o Tavita. Afai tatou te taumafai e faia le finagalo o le Atua ma le loto atoa, o lona uiga, i le silisili o lo tatou tomai, o le a ia tauia i tatou e tusa ai, auā e faamaoni o ia.—Efeso 6:6; Eperu 6:10-12; 1 Peteru 4:19.

O se mea faatupu manatu, i le Eperu 10:5-7, na sii mai e le aposetolo o Pauro upu a Tavita i le Salamo 40:6-8 ma faatatau atu ia Iesu Keriso. I le faia faapea, na faasino atu ai e Pauro le vavalalata sa iai Iesu i lona Tamā. O le upu Eperu mo le “finagalo,” ua tauaveina ai manatu nei, fiafia, manaoga, loto malie, pe faafiafiaina.’ O lea la, atonu e faitauina le Salamo 40:8 e faatatau ia Keriso e faapea: “Loʻu Atua e, O le faia o lou fiafiaga, Ou te fiafia iai.”a Sa manao Iesu e faia le mea na faafiafiaina ai lona Tamā. Na faia e Iesu mea e sili atu na i lo o mea na siligia ai o ia. Sa ia faia le mea sa pele i le finagalo o lona Tamā, ma na ia fiafia e fai.

Na siomia le olaga atoa o Iesu i le aʻoaʻoina o isi po o le ā le finagalo o le Atua, ma po o le ā e ao ona latou faia ina ia maua faamanuiaga a le Atua. Sa o ia o se tagata talaʻi faataimi atoa ma maua le olioli tele i le faia o lena galuega. O lea la o se iuga talafeagai le faapea, o le tele o lo tatou faia o le galuega a Ieova, o le tele foi lea o le olioli tatou te maua. E mafai ea ona e auauna faataimi atoa i le galuega talaʻi ina ia mafai foi ona faateleina lou olioli?

O se fesoasoani atili i le faatumauina o le olioli i le faia o le finagalo o le Atua o le mataia pea lea o le lumanai. O le mea lena na faia e Iesu. “O le na onosai i le satauro, na faatauvaa ia te ia le mā, ona o le olioli sa tuu i ona luma.” Mo ia, o le olioli sa o le faamaonia lea o lona faamaoni i le Atua seia oo i le iuga, ona maua lea o le taui o le avea ma tupu i le itu taumatau o lona Tamā.—Eperu 12:2.

Manatu faalemafaufau i le lumanai fiafia o le a maua e i latou o ē faaauau ona faia le finagalo o le Atua. O le a latou vāai i le faaumatiaga o i latou o ē faatalatu i le faia pea o o latou manatu faapito, e tusa pe faapogaia e lenei mafatiaga ia i latou o ē pulunaunau e faia le finagalo o le Atua. (2 Tesalonia 1:7, 8) Mafaufau i le olioli o ē pele o le a toe faatutu mai i le mauaina o le avanoa e aʻoaʻo ma faia le finagalo o le Atua. Po o le manatunatu i le fuafuaga a le Atua e toe faafoisia le lalolagi e avea ma Parataiso. Ma mulimuli lava, manatu faalemafaufau i le saolotoga o le a iu i ai mai le faaumatiaina atoatoa o Satani, o lē tetee i le finagalo o Ieova.

Ioe, o le faia o le finagalo o le Atua i aso nei e mafai ona aumaia ai le olioli sili i le taimi nei ma le fiafiaga lē motusia i le lumanai. Tusa lava po o le ā se tali tatou te maua mai i le galuega talaʻi, seʻi tatou faataitai i le faaaoaoga a Iesu i le fiafia i le faia o le finagalo o lona Tamā.

[Faaopoopoga i lalo]