O le Soifuaga o Iesu ma Lana Faiva

Na ia Paʻi Atu i Lona Ofu

UA oo atu le tala i Kapanaumi ua toe foi mai Iesu mai Tekapoli, ona faapotopoto atu ai lea o le motu o tagata e toatele i le matafaga e faafefiloai atu ia te ia. E lē taumate sa latou faalogo i lona faailemuina o le afā, ma na ia faamalōlō foi se tagata na uluitinoina e se temoni. Ua ia maliu atu nei i le laueleele, ua latou lolofi ane ia te ia i le naunau ma le faatalitali.

O se tasi o i latou ua fia vaai ia Iesu o Iairo, o se alii taʻitaʻi o le sunako. Ua ia faapaū i aao o Iesu ma aioi atu pea ia te ia: “O le a oti nei lava si oʻu afafine, ina e maliu atu, ma ia e faaeʻe ou aao i luga ia te ia e malolo ai, ona ola ai lea o ia.” Talu ai ona e na o le pau lea o lona afafine ma e na o le 12 foi ona tausaga, atonu ua pele ai lava o ia ia Iairo.

Ua tali atu Iesu ma agaʻi atu loa ile fale o Iairo, a e ua mulimuli atu ai ma le motu o tagata. E mafai ona tatou manatunatu ai i le fiafia tele o tagata a o latou tulimataia atu foi se isi vavega. A e o se tasi o fafine sa i ai faatasi ma le motu o tagata, ua mafaufau lava o ia i lona faafitauli matuiā.

Mo le 12 tausaga sa maua ai lenei fafine i le puna toto. Sa alu atu o ia mai lea fomaʻi i lea fomaʻi, ua tele ai ana tupe e alu i togafitiga. A e sa ia leʻi maua lava se fesoasoani; na i lo o lea, ua oo ina leaga tele lona faafitauli.

E pei lava ona tatau ona e talisapaia, e lē gata ina vaivai tele ai lona tino, a e o lona maʻi ua avea ma mea e mā ai, ma o se mea foi e faatoilaloina ai o ia. E lē mafai foi ona soona talanoa ai se tasi e uiga i lea maʻi i le lautele. E lē gata i lea, i lalo o le Tulafono a Mose, o se fafine o maʻi faapea i le puna toto, ua lē māmā ai o ia, ma so o se tasi lava la e paʻi atu ia te ia po o ona lavalava ua pisipisia i le toto, e tatau ona taele ma e lē mamā ai o ia seia oo i le afiafi.

Ua faalogo la lenei fafine e uiga i vavega a Iesu, ma ua alu atu nei e saili ia te ia. I le manatu i lon lē māmā, sa ia faavavā faalilolilo atu ai i sona auala i le motu o tagata ma faapea ifo i lona loto: “Afai ou te paʻi atu tau lava o ona ofu, ona ou malolo ai lea.” Ina ua ia faia faapena, ona ia lagona faafuasei ai lea ua utu lona palapala!

“O ai na na paʻi mai ia te aʻu?” Pagā lona gatete i na upu a Iesu! Na mafai faapefea ona ia silafia? Ua tali mai Peteru: ‘Le Alii e, ua fetaomi ma fetuleni mai le motu o tagata ia te oe, a e ete fetalai mai ea, “O ai na na paʻi mai ia te au?”

Ua silasila solo Iesu mo le fafine, ma faapea atu: “Na paʻi mai lava se tasi ia te aʻu; auā ua ou iloa ua alu atu le mana nai ia te au.” O le mea moni, e lē o se paʻi e na ona fai, auā o le faamalōlōga na iʻu i le aveesea ai o le mana o Iesu.

I lona iloa ua le o toe lilo o ia, ona sau ai lea o le fafine ua mataʻu ma gatete ma faapaū i luma o Iesu. Ua ia faamatala atu i luma o tagata uma le tala moni e uiga i lona maʻi, ma le faapefea ona faatoā faamalōlōina o ia.

Ina ua uunaʻia Iesu i le faamatalaga atoa a le fafine, ona ia faamafanafana atu lea ma le alofa ia te ia ua faapea atu: “Loʻu afafine e, ua e ola i lou faatuatua; ina alu ia oe, ma le manuia, ma ia e malolo i lou maʻi tiga.” Maeu le lelei o le iloa, o Lē ua filifilia e le Atua e pulea le lalolagi o se tagata e mafana, ma agaalofa, o lē e lē gata ina manatu i tagata, a e i ai foi le mana e fesoasoani ai ia i latou! Mataio 9:18-22; Mareko 5:21-34; Luka 8:40-48; Levitiko 15:25-27.

◆ O ai Iairo, ma ai se ā ua ia sau ai ia Iesu?

◆ O le ā le faaffitauli ua i ai i se tasi fafine, ma ai se ā ua faigata tele ai mo ia ona sau ia Iesu mo se fesoasoani?

◆ Ua faapefea ona faamaloloina le fafine, ma ua faapefea ona faamafanafana Iesu ia te ia?