‘Aveina i Fale o le Poto e Uiga i le Atua ma Iesu’
“O LE ola e faavavau lenei, o lo latou aveina i fale o le poto e uiga ia te oe, le Atua moni e toatasi, atoa ma lē na e auina mai, o Iesu Keriso lea.” (Ioane 17:3, NW) Na faapena ona ole atu ai Iesu i lana tatalo i lona Tamā faalelagi, ma i lenei auala na ia faaalia ai se manaoga matuā tāua mo le mauaina o le ola e faavavau. Peitai, aiseā ua aumaia ai e le New World Translation lenei fasi fuaiupu “aveina i fale o le poto e uiga . . . [i] le Atua” na i lo o le “iloa . . . o le Atua,” e pei ona faaalia ai i le tele o isi faaliliuga o le Tusi Paia?—Tagai foi i le faamatalaga i lalo i le Ioane 17:3.
O le upu Eleni i inei ua faaliliuina i le ‘ave i fale o le poto’ po o le “iloa,” o se ituaiga o le veape gi·noʹsko. Ma o le faaaogāina i le New World Translation ua fuafuaina ina ia aumaia ai i se tulaga atoatoa e mafai ai le uiga o lena upu. O le uiga faavae o le upu gi·noʹsko ia “iloa,” ae o le upu Eleni e iai isi faauigaga eseese. Ia matau faamatalaga ia o loo mulimuli mai:
O le “GINŌSKŌ (γινωσκω) ua faailoaina ai le aveina i fale o le poto, oo ina iloa, iloa lelei, malamalama, po o le malamalama atoatoa.” (Expository Dictionary of New Testament Words, W. E. Vine) O lea, o le faaaogāina o le gi·noʹsko e faapea ‘ave i fale o le poto’ e lē o ‘suiina ai le Tusi Paia,’ e pei ona tuuaʻia ai e le au faitio o le New World Translation. I se talanoaga o faauigaga eseese na mafai ona siomia ai le upu, ua taʻua ai e se tagata lauiloa i le tusia o lomifefiloi o James Hope Moulton e faapea: “O le upu sili ona faigofie i le taimi nei γινωσκειν, e tumau umi, ‘o le aveina i fale o le poto.’”—A Grammar of New Testament Greek.
Ua faamatala mai e le A Grammatical Analysis of the Greek New Testament le gi·noʹsko e pei ona aliaʻi mai ai i le Ioane 17:3 e pei o loo “faaalia ai se faasologa faifai pea.” O se isi faamatalaga atili e uiga i lenei upu Eleni o loo aliaʻi mai i le Word Studies in the New Testament, a Marvin R. Vincent. Ua faapea mai lenei tusi: “O le ola e faavavau o loo iai i le poto, po o le sailia o le poto, ona talu ai o le taimi nei, ua faailogaina ai le faaauau pea ona faia, o se iloa agaʻigaʻi i luma.” (O upu faasisipa o ana.) Ua fautuaina i le Word Pictures in the New Testament a A. T. Robertson le faaliliuina o le upu faapea “e ao ona faaauau pea ona iloaina.”
O le mea lea, i le faa-Eleni anamua, ua faaalia ai i upu a Iesu i le Ioane 17:3 se taumafaiga faifai pea ina ia oo ina iloa le Atua moni ma lona Alo, o Iesu Keriso, ma ua faaalia lelei mai lenei mea i le faaliliuga a le New World Translation. Tatou te maua lenei poto e ala i le suesueina ma le filigā o le Afioga a le Atua ma e ala i le faafetaui atu ma le usiusitai o o tatou olaga i ana tapulaa. (Faatusatusa i le Hosea 4:1, 2; 8:2; 2 Timoteo 3:16, 17.) O le ā le taui lelei o loo faatali mai mo i latou o ē ua faamasani atu i latou lava ma uiga o le Atua atoa ma lona Alo, ma i lea ua taumafai malosi e faataʻitaʻi ia i laua? O le ola e faavavau!