Po o Molimau a Ieova o ni Kerisiano Moni?

I le avea ai o ni Molimau a Ieova, e matou te talitonu o i matou o Kerisiano moni. Aiseā? Seʻi iloilo le faavae o o matou talitonuga, o le igoa e tuese ai i matou, ma le alofa e faaalia e le tasi i le isi.

1. O le ā e faavae ai talitonuga o Molimau a Ieova?

Na fetalai Iesu: ʻO le afioga a le Atua o le upu moni lea.’ (Ioane 17:17) I le pei o Iesu, e faavae talitonuga o Molimau a Ieova mai le Afioga a le Atua. Seʻi iloilo le talafaasolopito o Molimau a Ieova. I se vaitaimi o le tausaga 1870, na amata ai ona suʻesuʻe ma le faaeteete e se vaega o tagata aʻoga le Tusi Paia. Na faavae o latou talitonuga i le Tusi Paia, e ui o na talitonuga na ese mai i aʻoaʻoga a lotu. Ona amata loa lea ona latou faailoa atu na upu moni o le Tusi Paia i isi.a

2. Aiseā ua taʻua ai i matou o Molimau a Ieova?

E taʻua e Ieova ona tagata tapuaʻi o ana molimau, ona e latou te taʻu atu le upu moni e faatatau iā te ia. (Eperu 11:4–​12:1) Mo se faataʻitaʻiga, i aso anamua, na taʻu atu e le Atua i ona tagata: “O outou o aʻu molimau.” (Faitau le Isaia 43:10.) Ua taʻua Iesu o “le Molimau Faamaoni.” (Faaaliga 1:5) O lea i le 1931, na taʻua ai i matou o Molimau a Ieova. E matou te mitamita e tauave lenā igoa.

3. E faapefea ona faaaʻoaʻo Molimau a Ieova i le alofa o Iesu?

Na matuā alofa Iesu i ona soo, ma pei ai i latou o se aiga iā te ia. (Faitau le Mareko 3:​35.) I se tulaga talitutusa, e autasi Molimau a Ieova e pei o se aiga i le lalolagi aoao. O le māfuaaga lenā e taʻua ai i matou o uso ma tuafāfine. (Filemoni 1, 2) E matou te usiusitaʻi foʻi i le faatonuga lenei: “Ia alolofa i le ʻauuso atoa.” (1 Peteru 2:​17) E faaalia e Molimau a Ieova lenei alofa i le tele o auala, e pei o le fesoasoani i o matou uso tapuaʻi i so o se vaega o le lalolagi pe a manaʻomia.

SAʻILIʻILI ATILI

4. E faavae o matou talitonuga i le Tusi Paia

Na folafola mai e Ieova o le a faasolo ina manino atili le malamalamaga i upu moni o le Tusi Paia. Faitau le Tanielu 12:​4 ma le faamatalaga pito i lalo, ona talanoa lea i le fesili lenei:

• O le ā o le a “faatuputeleina” i tagata o le Atua a o faaauau ona latou saʻiliʻili i le Tusi Paia?

Iloilo pe na faapefea ona suʻesuʻe e se vaega o tagata aʻoga o le Tusi Paia e aofia ai ma Charles Russell, le Afioga a le Atua. Faaali le VITIŌ, ona talanoa lea i le fesili lenei:

VITIŌ: Toe Faafoʻisia Upu Moni o le Tusi Paia (7:​45)

• I le vitiō, na faapefea ona suʻesuʻeina e Charles Russell ma ana aumea le Tusi Paia?

E te silafia?

O nisi taimi, e toe fetuunaʻi ai nisi o a matou talitonuga. Aiseā? E pei lava o le oso aʻe o le lā ma faasolosolo ona iloa atu ai se laufanua, e faapena foʻi ona faasolosolo ona aumaia e le Atua le malamalamaga e faatatau i lana Afioga. (Faitau le Faataoto 4:18.) O lea, e ui e lē suia le Tusi Paia, ae e fetuunaʻi o matou talitonuga a o faasolo ina manino atili le malamalamaga o le Tusi Paia.

5. E matou te ola e tusa ma lo matou igoa

VITIŌ: O se Igoa e Iloa ai i Matou (2:​40)

• Aiseā ua talafeagai ai le igoa Molimau a Ieova?

Aiseā ua filifilia ai e Ieova tagata e avea ma ana molimau? Ina ia mafai ona latou faailoa atu o ia o le Atua moni, ona ua tele pepelo ua faia e faatatau iā te ia. Seʻi iloilo nisi o na pepelo.

E aʻoaʻo e nisi lotu a latou tagata lotu, e finagalo le Atua e faaaogā tupua i a latou tapuaʻiga. Ae seʻi faitau le Levitiko 26:​1, ma talanoa i fesili nei:

• O le ā le upu moni o loo taʻua i lenei mau? O ā faalogona o Ieova e faatatau i tupua?

O nisi taʻitaʻi lotu e latou te aʻoaʻoina o Iesu o le Atua. Ae seʻi faitau le Ioane 20:​17, ma talanoa i fesili nei:

• O le ā le upu moni o loo taʻua i lenei mau? Pe e tutusa le Atua ma Iesu?

• O ā ni ou faalogona i le iloaina, na auina atu e Ieova ana Molimau e talaʻi le upu moni e faatatau iā te ia ma lona Alo?

6. E matou te faaalia le alofa o le tasi i le isi

Ua faatusa e le Tusi Paia Kerisiano i itutino eseese o le tino o le tagata. Faitau le 1 Korinito 12:​25, 26, ona talanoa lea i fesili nei:

• O le ā le auala e tatau ona tali atu ai Kerisiano moni, pe a mafatia isi Kerisiano?

• O le ā se mea ua e mātauina e faatatau i le alofa e faaalia e Molimau a Ieova?

Pe a mafatia Molimau a Ieova i se isi itu o le lalolagi, e vave lava ona tali atu Molimau a Ieova i le lalolagi aoao. Seʻi vaai i se faataʻitaʻiga. Faaali le VITIŌ, ona talanoa lea i le fesili lenei:

VITIŌ: Auala na Onosaia ai e Haiti le Afā o Matthew (5:​29)

• E faapefea ona avea galuega laveaʻi a Molimau a Ieova, o ni faamaoniga o le alofa?

AOTELEGA

O Molimau a Ieova o ni Kerisiano moni. O i matou o se ʻauaiga i le lalolagi aoao, o ni tagata tapuaʻi e faavae o matou talitonuga i le Tusi Paia, ma faailoa atu le upu moni e faatatau iā Ieova.

Fesili Autalu

• Aiseā ua taʻua ai i matou o Molimau a Ieova?

• E faapefea ona matou faaalia le alofa o le tasi i le isi?

• Pe e te manatu o Molimau a Ieova o ni Kerisiano moni?

MANATU FAAOPOOPO

Tagaʻi i se faaaʻoaʻoga o le auala e faaalialia ai e Molimau a Ieova aʻoaʻoga sesē.

Faamamaluina e Tagata o le Atua Lona Suafa (7:​08)

Tali o fesili e te ono tuufesili ai e faatatau i Molimau a Ieova.

“Fesili e Masani Ona Lāgā e Faatatau i Molimau a Ieova” (Vaega o mataupu i le jw.org)

Na aafia Stephen i soligatulafono ona o le faailogalanu. Seʻi vaai po o le ā na ia mātauina i Molimau a Ieova, na uunaʻia ai o ia e faia suiga.

“Sa Faasolo Ina Matuā Leaga Loʻu Olaga” (Le Olomatamata, Iulai 1, 2015)