Galulue ma le Faamaoni Faatasi ma Ieova
“Le Atua e, na e aʻoaʻo mai ia te aʻu talu ina ou tama itiiti; ua oo mai foi i nei ona po ua ou faaali atu ou vavega.”—SALAMO 71:17.
1. Aiseā ua mafai ai ona tatou faapea atu o le galue o se meaalofa mai ia Ieova?
O LE GALUE o se tasi o meaalofa a le Atua i le tagata. Na fetalai Ieova i o tatou uluai mātua, o Atamu ma Eva: “Ia tumu ai le lalolagi, ia faatoilalo i ai.” Sa avea o se luʻi lena galuega na tofia atu i ai, ae o se galuega ua talafeagai lelei lena ma o la tomai. O taumafaiga faaletino ma le faalemafaufau sa manaomia, o le a faateleina ai lo la olioli e ola, e sili atu i so o se isi lava mea ua tofo i ai manu o loo i lo la aiga faalelalolagi.—Kenese 1:28.
2, 3. (a) O le ā ua avea ai le galue mo le toatele i aso nei, ma aiseā? (e) O le ā le avanoa i le faia o se galuega faapitoa e manaomia ona tatou manatunatu i ai?
2 E oo lava i lo tatou tulaga lē lelei atoatoa, o ‘galuega mamafa’ e iʻu atu ai i “mea lelei” o le “mea foaiina mai lea e le Atua,” e pei ona sa tusi ai le tagata poto o Solomona. (Failauga 3:13) E manaomia pea e le tagata ona faagaoioi lona mafaufau ma le tino. O le leai o ni galuega e mafatia ai le loto. Peitai, e lē o galuega uma e atoatoa ona mamā pe aogā. Mo le toatele, ua avea le galuega o se mea e fiu ai, ae ua faia lava tau ina ia maua ai mea manaomia e ola ai.
3 Ae peitai, o loo iai se galuega e tauia moni lea ua valaaulia tagata uma ina ia fai ai so latou sao. Ae e toatele ē tetee atoa ma faafitauli e ono foia mo i latou o ē o loo fai se sao i lea galuega. Aiseā e tāua ai lo tatou agavaa mo lenei galuega? E faapefea ona tatou faia faapea? A o leʻi taliina nei fesili, seʻi o tatou iloiloina muamua:
Mo Ai o loo Tatou Galulue i Ai?
4. O le ā le ituaiga o galuega na avatu ai le olioli ma le loto malie ia Iesu?
4 Na fetalai Iesu Keriso: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) O le galue ma le faamaoni mo Ieova na avatu ai ia Iesu le tele o le olioli ma le faamalieina. Na avatu ai ia te ia se fuafuaga i le olaga, ma i le iʻuga o lana faiva e tolu ma le ʻafa tausaga, sa mafai ona ia fai atu moni i lona Tamā faalelagi: “Ua ou tuu atu le viiga ia te oe i le lalolagi; ua ou faaumaina le galuega na e tuuina mai ia te au, ou te faia.” (Ioane 17:4) E pei lava ona maua o le ola i meaʻai faaletino, e faapena foi i galuega o iai se fua faaleagaga. Sa faamamafa e Iesu lenei manatu i se tasi taimi ina ua ia apoapoai atu: “Aua tou te galulue i mea e ʻai e pala, a o mea e ʻai e tumau i le ola e faavavau.” (Ioane 6:27) I le tuufaafeagai ai, o le galuega e lē fua mai faaleagaga e taʻitaʻiina atu i le fiu ma le oti.
5. O ai na tetee i le galuega lelei na faia e Iesu, ma aiseā?
5 “O loo galue loʻu Tamā e oo mai lava i le aso nei; o loo galue foi aʻu.” Sa fetalai atu e Iesu lenei faamatalaga i tagata Iutaia o ē na faitioina o ia ona o le aso Sapati lea na ia faamalōlō ai le tagata o lē na maʻi mo le 38 tausaga. (Ioane 5:5-17) E ui lava sa faia e Iesu le galuega a Ieova, ae sa mumusu lava taʻitaʻi lotu e talia lena mea moni ma na latou faia ai mea uma sa latou mafai ina ia taofia ai o ia. Aiseā? Auā o i latou sa mai i lo latou tamā, o Satani le Tiapolo, o lē ua tetee atu pea i le galuega a Ieova. (Ioane 8:44) Talu ai ona e mafai e Satani ona ‘faaliliuina o ia e fai ma agelu o le malamalama,’ i le faaaogāina ‘o mea taufaasese amioletonu uma,’ ua tatou manaomia ai ona maua le tofa mamao faaleagaga ma le mafaufau manino ina ia iloa ai le uiga moni o ana galuega. Auā a lē faia lea, atonu o le a tatou iloa ane ai ua tatou galulue e tetee atu ia Ieova.—2 Korinito 11:14; 2 Tesalonia 2:9, 10.
O loo Galulue Ē Tetee
6. Aiseā ua avea ai aposetate “ma aufaigaluega faaʻoleʻole”? Faataʻitaʻi.
6 O nisi, i le pei o nisi aposetate patino i aso nei, o loo galulue ma le lē faamaoni e avea o sui a Satani ina ia faatoilaloina le faatuatua o tagata fou faatoʻā auaufaatasi ma le faapotopotoga Kerisiano. (2 Korinito 11:13) Na i lo le na ona faaaogā o le Tusi Paia e avea ma faavae mo aʻoaʻoga moni, ae ua latou uaʻi atu i le taumafai e taʻuleagaina le New World Translation of the Holy Scriptures, e peiseai o loo faalagolago atoatoa atu i ai Molimau a Ieova i lea mo le fesoasoani. Ae lē o lea le tulaga. Mo le toetoe lava atoa le senituri, sa faapitoa ona faaaogāina ai e Molimau le King James Version, le Douay Version a le Katoliko Roma, pe po o ā lava ni faaliliuga sa maua i la latou gagana, ina ia aʻoaʻoina ai le upu moni e uiga ia Ieova ma ana fuafuaga. Ma na latou faaaogāina nei faaliliuga tuai i le faalauiloaina o le upu moni e uiga i le tulaga o tagata oti, le faiā i le va o le Atua ma lona Alo, ma le pogai e ō ai na o se lafu mamoe itiiti i le lagi. O tagata popoto ua latou iloa foi faapea o loo faaauau pea ona faaaogā e Molimau a Ieova le tele o faaliliuga o le Tusi Paia i la latou galuega faaevagelia i le lalolagi aoao. Ae peitai, talu mai le 1961, na faaopoopo ai lo latou olioli i le faaaogāina o le New World Translation, ma ona faaliliuga saʻo lelei, e talafeagai ma le taimi nei, ma faigofie ona faitau i ai.
7. (a) Aiseā ua lē iloa ai e Iesu le toatele o ē na fai mai e faatuatua ia te ia? (e) Aiseā ua tāua ai le utagia o le fautuaga i le 1 Ioane 4:1?
7 Na fetalai Iesu o le a na lē iloa le toatele o ē fai mai e faatuatua ia te ia. Na ia silafia faapea atonu o latou perofeta ane, tutuli temoni, ma “fai ai vavega e tele” i lona suafa. Ae, tumau pea ona ia faailoa nei galuega o galuega o le “amio leaga.” (Mataio 7:21-23) Aiseā? Auā latou te lē o faia le finagalo o lona Tamā faalelagi ma e lē aogā e pei lava foi ona manatu i ai Ieova le Atua. O se mea e lē masani ai, ona e oo lava i galuega e foliga mai e faavavega i aso nei, e mafai pea ona puna mai i le taufaasese sili, o Satani. I le tusiaina e le aposetolo o Ioane o lana uluai tusi faalauaitele pe sili atu i le 60 tausaga ina ua mavae le maliu ma le toetu o Iesu, na ia fautuaina ai faapea e ao i Kerisiano ona “aua le talitonu i faamatalaga faagaeeina uma, a ia tofotofo i faamatalaga faagaeeina ina ia iloa pe mai le Atua.” E manaomia foi ona tatou faia le mea lava lea e tasi.—1 Ioane 4:1, NW.
Galuega e Lē Tauia
8. O le ā e ao ona tatou lagona ai e uiga i galuega o le tino?
8 E tusa lava pe tatou te lē o auai i le galuega e faaitiitia le fua mai faaleagaga, ae o a tatou galuega e lē aogā pe afai e faaauau pea ona faia mea e tusa ma tuʻinanau o le tino agasala. Na faapea mai le aposetolo o Peteru ua lava le taimi i aso ua mavae o le olaga nei ona fai ai e i tatou ‘le manao o le olaga nei . . . i galuega o le faamatāitu, tuʻinanau, inu tele i uaina, poula, inugāava, ma le ifo i tupua e soli ai tulafono.’ (1 Peteru 4:3, 4) O le mea moni, e lē o le uiga o lenei mea, faapea, o i latou uma lava o ē ua avea nei o ni Kerisiano tuuina atu na auai i na gaoioiga, ae o lona uiga faapea o faalogona o i latou o ē sa faia faapea sa tatau ona suia vave a o agaʻigaʻi i luma la latou vaaiga faaleagaga. O le a upu leaga le lalolagi ia i latou ona o lo latou faaliliuina; o le mea lena e ao ona faatalitalia. Peitai, e tatau ona suia pe afai o le a avea i latou o ni ē galulue faamaoni i le auaunaga a Ieova.—1 Korinito 6:9-11.
9. O le ā ua tatou aʻoaʻoina mai le mea na tupu i le Molimau o lē na amata ona aʻoaʻoina e avea ma teine pese i tala faamusika?
9 Ua uma ona tuuina mai e Ieova ia i tatou le tele o meaalofa tatou te olioli ai, o se tasi o ia mea o le musika. Ae peitai, talu ai o “le lalolagi uma o loo nofo toilalo i loo leaga,” o Satani le Tiapolo, pe ua lē aofia ai ea i lenei mea le lalolagi o musika? (1 Ioane 5:19) Ioe, e mafai ona avea musika o se mailei faaʻoleʻole, e pei ona sa iloa ai e Selevana. Sa ia maua se avanoa e aʻoaʻoina ai i Falani e avea o se teine pese o tala faamusika. “Sa iai pea soʻu faanaunauga malosi ina ia auauna ia Ieova,” ua ia faamatala mai ai. “Sa ou olioli i le paeonia lagolago ma sa ou faamoemoe ina ia faaleleia nei itu e lua i loʻu olaga. Ae o le faafitauli muamua sa tatau ona ou faafesagaʻia i le tuliloaina o laʻu galuega, o amioga leaga faaleituaiga. Muamua lava, sa vaavaai mai aʻu aumea ia te aʻu e avea ua na o se tagata talitonugofie pe ana fai sa ou lē faifai mea faatasi ma i latou i le faia o talanoaga ma faaaʻoaʻoga o amioga leaga faaleituaiga. Mulimuli ane, na amata ona faaitiitia lou tetee ona o le siosiomaga iʻuvale, sa oo ai ina ou faataga i mea e inoino i ai Ieova. Sa uunai mai pea se tasi o oʻu faiaʻoga ia te aʻu ina ia ou faia se tapuaiga o aʻu pesepesega, ma sa aʻoaʻoina aʻu ina ia ou faia ni gaoioiga lē fefe i luga o le pulelaa ma ia ou manatu e sili aʻu i tagata uma lava. O nei mea uma sa oo ai ina ou matuā faaletonu lava. Mulimuli ane, sa ou sauniuni mo se faataʻitaʻiga faapitoa. Sa ou tatalo ia Ieova ina ia faamanino mai ia te aʻu po o lē fea auala e tatau ona ou ui ai. E ui lava sa lelei laʻu pese ma iai le lagona mautinoa, ae sa ou lē iai i tagata na filifilia. Mulimuli ane, sa ou iloa ai le pogai—ona ua leva lava ona filifilia faalilolilo iʻuga i se taimi muamua a o leʻi faia le tauvaga. Peitai sa maua ai se tali manino i laʻu tatalo ma na ou filifili loa e tuua le faia o tala faamusika ae aʻoaʻo aʻu pese i le aiga.” Mulimuli ane na faaipoipo atu lenei tuafafine i se toeaina i se faapotopotoga Kerisiano, lea o loo auauna uma ai nei i laua ma le faamaoni i le faaauilumaina o manaoga o le Malo.
10. O le ā lau faaiʻuga mai fetalaiga a Iesu i le Ioane 3:19-21?
10 Na fetalai Iesu: “O i latou uma o e fai mea leaga e ʻinoʻino i latou i le malamalama, e le o mai foi i le malamalama, neʻi faailoa a latou amio.” I le isi itu, “o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.” (Ioane 3:19-21) Maeu se faamanuiaga o le galulue e ōgatasi ma le finagalo ma le fuafuaga a Ieova! Ae ina ia faia ma le manuia, e tatau lava ona tatou faatagaina pea le iloiloina totoʻa o a tatou galuega i le malamalama o le Afioga a le Atua. E leʻi taitai ona tatou matutua naʻuā ma e leʻi taitai lava foi ona tuai ina ia suia ai o tatou auala o le olaga ma ia talia le valaaulia ina ia faia le auaunaga e aogā a Ieova.
Faia “Galuega Lelei” i Aso Nei
11. O le ā ua tuliloaina e le toatele e avea o “galuega lelei,” ma aiseā ua mafai ai e na mea ona taʻitaʻiina atu i le faaumatia ai o le faamoemoe?
11 O galuega e aogā i aso nei e tatau ona atagia ai le faanatinati o o tatou taimi. Ua ioe i ai le toatele o tagata loto faamaoni ma faapisi ai i latou lava i galuega ua masani ona faamatalaina o “galuega lelei,” ua faia mo le manuia o le fanau lautele a tagata pe mo se mafuaaga patino e tasi. E ui i lea, pagā le fiugofie i lenei ituaiga o galuega! I Peretania, na faapea mai ai le CAFOD (Catholic Fund for Overseas Development; Faaputugatupe a le Lotu Katoliko mo Atinaʻe a Atunuu i Fafo) i le lipotia mai o lana fuafuaga mo fesoasoani i oge: “I le tolu tausaga ua mavae . . . na maua ai le faitau miliona o pauni mo fesoasoani i mala. E faitau afe ola na faasaoina. Lenei la, o na ola ua toe iai foi i se tulaga lamatia . . . Ae aiseā? O le ā le mafuaaga na iʻu ai i le leaga?” I le faaauau o lana tala, ua faamatala ai e le CAFOD Journal e faapea o faafitauli mo taimi uumi sa lē taitai lava ona foia ma faapea “o mea sa matuā manaomia mo le atinaʻe o tagata ua faaaogāina e lagolago ai le feteenaiga [taua sivili].” E lē taumatea, ua e faalogo i ni manatu faapena o faaleoina mai e faalapotopotoga mo le fesoasoani i isi sa auai i galuega faapena.
12. Ua na o le ā lava le tali i faafitauli o loo fesagaʻi ma le lalolagi i aso nei?
12 O le oge o se faafitauli faanatinati. Peitai o ai o faailoaina maia mala i aso nei o oge ma taua e avea o le faataunuuina o le valoaga a Iesu Keriso, o loo faasino atu i le iʻuga o le faiga o mea o iai nei? (Mataio 24:3, 7) O ai ua faasalalauina faamaoniga i le faafesootai o nei mea tutupu ma le tietiega a tagata tietie solofanua e toafa lea o loo matuā olaola ona faaatagia mai i le tusi o le Tusi Paia o le Faaaliga mataupu e 6? Ma le maumauaʻi, ua faia ai faapea ma le faamaoni e Molimau a Ieova i lenei mekasini. Aiseā? Ina ia faaalia ai ua lē mafai e le tagata ona saunia so o se vaifofo tumau. E lē o le uiga o lenei mea faapea e lē o manatu Kerisiano i faafitauli o le lalolagi. E leai lava. O loo tiga alofa i latou ma o le a latou faia mea uma latou te mafai ina ia faaitiitia ai puapuaga. E ui i lea, latou te fesagaʻi moni ma le mea moni faapea a aunoa ma le faalaa tauatua, o le a lē taitai lava ona foia faafitauli o le lalolagi. I le pei o tagata matitiva, o nei faafitauli o le a tumau pea ona iai a o faatagaina Satani e faaauau e avea o le pule o lenei lalolagi.—Mareko 14:7; Ioane 12:31.
Le Galuega e Sili ona Tautele
13. O le ā le galuega aupito sili ona faanatinati i aso nei, ma o ai o loo latou faia?
13 O le manaoga aupito sili ona faanatinati i aso nei o le talaʻia o le tala lelei faapea o le a lē pine ae suia pulega uma faalelalolagi e le Malo o Ieova le Atua, ma aumaia le mapusaga lea ua leva ona faanaunau i ai tagata matataʻu i le Atua. (Tanielu 2:44; Mataio 24:14) Sa faia e Iesu Keriso le talaʻiga o le Malo faalelagi o se fuafuaga autū i le olaga, e ui lava sa faatapulaa mai lana galuega talaʻi i le nuu o Palesitina. I aso nei, o le lautele ua oo atu i ai lenei talaʻiga o le lalolagi aoao, e pei lava ona sa fetalai Iesu o le a faapea ona iai. (Ioane 14:12; Galuega 1:8) O le faia o se sao, e tusa lava pe o se sao itiiti, i le galuega a le Atua, ae o se faaeaga e lē mafaatusatusaina. O tane ma fafine, ē matutua ma talavou, o ē sa leʻi moemiti lava i taimi ua teʻa i le avea o ni tagata talaʻi o le tala lelei ua i muaʻau nei o le galuega faaevagelia lea ua faataunuuina e Molimau a Ieova i aso nei. I le pei o Noa ma lona aiga, ua latou faia ai ma le faamaoni le galuega a le Atua i lalo o le tofiga mai ia te Ia, ma o le mea lea i Lona malosi, ua avea o se mea e faamuamua i le iʻuga o lenei faiga o mea.—Filipi 4:13; Eperu 11:7.
14. Ua faapefea ona avea le talaʻiga ma faasaoola ma i le taimi lava e tasi o se puipuiga malu?
14 O le galuega molimau a Molimau a Ieova i nei aso e gata ai o se galuega faasaoola mo i latou o ē faalogo ma gaoioi faatatau i le tala lelei ua latou faalogo ai. (Roma 10:11-15) O se leoleoga malu foi lea mo i latou o ē talaʻi. E ala i le naunau faamaoni e fesoasoani atu i tagata o ē e sili atu o latou faafitauli na i lo o tatou lava faafitauli, ua faapena foi ona faaitiitia ai lo tatou manatu mamafa i o tatou lava faafitauli atonu o loo iai. Ua tatou iloa faapea e manao lenei lalolagi o tulaga ua faiifo e faia ai i tatou ina ia faafetaui atu i ona ala. O lea o le faatumuina o o tatou mafaufau i manatu o le Atua i le taimi o la tatou talaʻiga e sili atu lena na i lo se faamalosi faatuatua; o se mea lea e iʻu ai i le lelei silisili mo i tatou. E pei ona taʻua ai e se tasi Molimau: “Afai ou te lē taumafai e sui tagata o loo oʻu feiloai atu i ai, o le a mafai la ona latou suia aʻu!”—Faatusatusa 2 Peteru 2:7-9.
Galulue Faatasi ma le Faapotopotoga
15. O ā tiute tauave ua tuuina atu i luga o leoleo mamoe lagolago i aso nei, ma e ao faapefea i tane o le faapotopotoga ona lagona e tusa ai o le 1 Timoteo 3:1?
15 Pe afai e ō mai tagata naunau fou i le faapotopotoga, latou te ō mai i lalo o le vaavaaiga a le Leoleo Mamoe Sili, o Ieova le Atua, ma lana Leoleo Mamoe Lelei, o Iesu Keriso. (Salamo 23:1; Ioane 10:11) O nei Leoleo Mamoe faalelagi o loo suia i inei i le lalolagi e leoleo mamoe lagolago faamaoni o le lafu, o tane ia ua tofia i faapotopotoga. (1 Peteru 5:2, 3) O le maua o sea tofiga o se faaeaga e lē mafaatauina i nei aso e gata ai. O le galuega a leoleo mamoe o se galuega mamafa, e aofia ai e lē na o le taʻimua i le aʻoaʻo atu i le faapotopotoga ma i le galuega faaevagelia ae faapea foi ma le puipuia o le lafu mai i ē ʻai tagata faaleagaga ma i le felafoaiina e le siosiomaga pei se afā o lenei lalolagi o loo tatou ola ai. Ua leai lava se isi galuega e sili ona aogā mo tane o le faapotopotoga e aapa atu i ai na i lo le fesoasoani i le tausia o le lelei faaleagaga o tagata o le faapotopotoga Kerisiano ua faalauteleina.—1 Timoteo 3:1; faatusatusa Isaia 32:1, 2.
16. I ā auala ua faaatoatoa ai e leoleo mamoe Kerisiano le tasi i le isi?
16 Ae peitai, e tatau ona aua neʻi o tatou faagaloina faapea, e faaletagata na leoleo mamoe, e eseese uiga ma vaivaiga e pei o le isi vaega uma o le lafu. O le isi atonu e malosi i se isi vala patino o le galuega faaleoleo mamoe, ae o meaalofa ua tuuina atu i le isi o le a aogā mo le faapotopotoga mai se isi foi itu. O a latou galuega i le avea o ni toeaina Kerisiano ua faaatoatoa ai le tasi i le isi ina ia faamalosia le faapotopotoga. (1 Korinito 12:4, 5) E lē tatau lava ona sao atu le agaga o le fia tauva i totonu o i latou. Latou te galulue faatasi ina ia leoleomalu ma faaauiluma faanaunauga o le Malo, “o loo sisii i luga o lima faamaoni” i le tatalo ia Ieova, i le sailia o lana faamanuiaga ma le taʻitaʻiga i a latou talanoaga ma faaiʻuga.—1 Timoteo 2:8.
17. (a) O le ā le avega tauave ua ia i tatou? (e) Afai tatou te mananao ia lava faataunuuina la tatou avega tauave, o ā mea e manaomia ona tatou alofia?
17 O le galuega o le talaʻiga ua toe faaopoopo atu nei i ai le faanatinati a o latalata mai le iʻuga o le emepaea a Satani. O le mauaina o le upu moni i le Afioga a Ieova le Atua, i le avea o ana Molimau, ua iai ai ia i tatou se avega tauave e faasalalau atu le tala lelei i avanoa uma. Ua lava ma totoe le galuega o loo iai nei e faapisi ai i tatou, seia oo atu lava i le iʻuga. E lē tatau lava ona tatou faatagaina i tatou e toe tosoesea e ala i le manao i faafiafiaga, sailia o faafiafiaga i amioga lē mamā po o le faamamafaina i le sailia o mea faitino. E lē tatau ona faaaafia i tatou i mafaufauga e taumatemate, finauga e uiga i upu, auā ua mafai ona lē aogā lenei mea ma le faauma ai o le taimi. (2 Timoteo 2:14; Tito 1:10; 3:9) Ina ua fesili atu le au soʻo ia Iesu, “Le Alii e, o ona po nei ea e te toe fuatai mai ai le malo ia Isaraelu?” Sa toe faasino atu e Iesu o latou manatu i le tāua o le galuega o loo faia, i le fetalai atu: “E fai foi outou ma molimau ia te au i Ierusalema ma Iutaia uma lava, ma Samaria, e oo lava i le tuluʻiga o le lalolagi.” O lena tofiga o loo faalautele mai pea e oo mai i le asō.—Galuega 1:6-8.
18. Aiseā e matuā tauia ai le galulue faatasi ma Ieova?
18 O le galulue faatasi ma Ieova, i le talaʻi faatasi ma lana faapotopotoga i le lalolagi aoao i aso nei, e aumai ai le fiafia, le loto malie, ma se fuafuaga moni i o tatou olaga. O se avanoa lea mo tagata taitoatasi o ē alolofa ia Ieova ina ia faaalia le tuutoina atu ma le faamaoni ia te ia. O lenei galuega i le tele o ona vala o le a lē taitai ona toe faia. Faatasi ai ma le faamoemoe o le ola e faavavau ua manino mai i luma, seʻi o tatou faaauau ma le faamaoni ina ia “tuuina atu i le Atua le auaunaga paia ma le mataʻu faaleatua ma le gatete,” mo lona viiga ma lo tatou lava faaolataga.—Eperu 12:28, NW.
O le ā Lau Tali?
◻ Mai le ā le galuega na maua ai e Iesu le olioli ma le loto malie?
◻ O ai ē o tetee i le galuega a Ieova, ma aiseā?
◻ E faapefea ona faatusatusa “galuega lelei” faalelalolagi ma le talaʻiina o le tala lelei o le Malo o le Atua?
[Ata i le itulau 18]
Na tofia e Iesu ona soʻo ina ia ō atu i luma e talaʻi