Aʻoaʻoina le Mea Lilo Paia o le Tuutoina i le Atua
“Auā na tigaina Keriso lava o le sui o outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.”—1 PETERU 2:21.
1. O le ā le fuafuaga na iai a Ieova faatatau i le ‘mea lilo paia o le tuutoina i le Atua’?
O “LE mea lilo paia o lenei tuutoina i le Atua” ua lē o toe avea o se mea lilo! (1 Timoteo 3:16, NW) Maeu le eseese o lea mea mai mea lilo a lotu pepelo, pei o le mea lilo i le Tolutasi, ia o loo tumau pea ona avea ma mea lilo! E lē mafai e se tasi ona malamalama i ia mea. Na i lo o lea, na fuafuaina e Ieova faapea o le faaalia o le mea lilo i le tagata o Iesu Keriso e tatau ona faalauiloa atu i le tulaga sili ona lautele e mafai ai. O Iesu lava ia sa avea o se faaaʻoaʻo mataʻina o sē folafola maelega o le Malo o le Atua. E tele mea e mafai ona tatou aʻoaʻoina mai lana feau ma le uiga o le talaʻiga, e pei ona o le a tatou vaai nei i ai.
2. Aiseā ua tuu faamuamua ai le faiva a Iesu i le togiola? (Mataio 20:28)
2 O lea, seʻi o tatou iloiloina atili le uiga o le “faaalia mai i le tino” o Iesu. (1 Timoteo 3:16) I le Mataio 20:28 ua tatou faitau ai faapea o Iesu “e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” Ua oo lava ina tuua ai e lenei mea lana auaunaga e muamua i le togiola. Aiseā ua faapea ai? Ia, i tuā i Etena na fesiligia ai e le Gata faaʻoleʻole le aiā tatau o le pule silisili ese a Ieova i luga o le fanau a tagata, ua faauiga ai faapea sa iai se mea sese i le foafoaga a le Atua ma i lea i lalo o tofotofoga e leai se tagata e mafai ona tumau lona faamaoni i Lē Aupito Sili ona Maualuga. (Faatusatusa Iopu 1:6-12; 2:1-10.) O le faiva lē ponā a Iesu i le avea o se tagata lelei atoatoa, “le Atamu mulimuli,” na faaalia ai le tauluʻiluʻi o Satani faapea o se pepelo leaga lava. (1 Korinito 15:45) Ae lē gata i lea, sa faamaonia atoatoa ai e Iesu ona agavaa e auauna ai e avea o le “Sui Sili ma o le Faaola” a le Atua, ma ina ia “faamasinoina ai le lalolagi ma le tonu,” i le taʻuamiotonuina ai o le pule silisili ese a Ieova.—Galuega 5:31; 17:31.
3. Na faapefea ona faamaonia atoatoa e Iesu le pepelo o le luʻi a Satani?
3 Sa faamaonia atoatoa e Iesu le pepelo o le luʻi taufaifai a Satani! I le talafaasolopito uma lava, e leai se tagata i luga o lenei lalolagi na auauna ma le matuā tuutoina i le Atua—e ui lava ina amusia, oo i ai o tiga, ma mafatiaga o le tino ma le mafaufau. I le avea o le Alo o le Atua, sa tatau ia Keriso ona tumau i upu taufaifai ma upu taufaaleaga. I le uia o nei mea uma lava—e oo lava i le maliu matagā sauā—sa tumau o ia, ma le mausali i le faamaoni i lona Tamā. I le Filipi 2:8, 9, ua tusi ai Paulo faapea, ona o le usiusitai o Iesu ‘e oo lava i le oti, ioe, le maliu i luga o le satauro, na faaeaina ai o ia e le Atua ma tuuina atu ia te ia le suafa e silisili i suafa uma lava.’ Na faaalialia ai e Iesu Satani o le pepelo oona lava o ia!
4. Aiseā na mafai ai ona taʻu e Iesu ia Pilato faapea o le mea lea na fanau mai ai o ia i le lalolagi ina ia molimau i le upu moni?
4 I lea, i le faaiʻuga o ni nai tausaga o le talaʻiga filiga, sa mafai ai e Iesu ona molimau atu ma le faamalosi ia Pilato: “Ua e fai mai lava oe o aʻu o se tupu. O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.” (Ioane 18:37, NW) Sa faaalia e Iesu le tuutoina faaleatua aupito sili ona maualuga i le faalauiloaina o le upu moni o le Malo o le Atua i Palesitina atoa. Sa ia toleni ona soʻo ina ia avea foi o ni tagata talaʻi maelega. Maeu le faagaeeina ai o i tatou i lana faaaʻoaʻoga ina ia tatou mulimuli i ona tulagāaao i aso nei!
Aʻoaʻo Mai lo Tatou Faaaʻoaʻo
5. O le ā e mafai ona tatou aʻoaʻoina e uiga i le tuutoina i le Atua e ala i le vaavaai atu ma le naunautai ia Iesu?
5 E ala i lo tatou tuutoina i le Atua e faia le finagalo o Ieova, ua mafai ai foi e i tatou ona faamaonia le Tiapolo o le pepelo. Po o ā lava tofotofoga tatou te puapuagatia ai, ae o le a leai se tasi o nei mea e tutusa ma puapuaga ma mafatiaga na oo ia Iesu. O lea, seʻi o tatou aʻoaʻo mai i lo tatou Faaaʻoaʻo. E pei ona uunaia mai ai i tatou e le Eperu 12:1, 2, NW, seʻi o tatou taufetuli ma le onosai i le tausinioga “a o tatou vaavaai atu ma le naunau i le Sui Sili ma Lē na te faaatoatoaina lo tatou faatuatua, o Iesu.” I le lē pei o Atamu, o lē na lē taulau ina ua tofotofoina e tusa ma lona tuutoina i le Atua, sa avea ai Iesu o le tagata e toatasi i luga o le lalolagi o lē na faafetaiaia i se tulaga lelei atoatoa tofotofoga uma. E oo lava i le maliu, na faamaonia e “faamaoni, lē faaseseina, e leai se leaga, e vavaeese mai ē agasala.” (Eperu 7:26, NW) I le faamaoni lē ponā, sa mafai ai ona ia faapea atu i ona fili: “O ai so outou na te faailoa mai saʻu agasala?” Na toe togi atu ai e Iesu le luʻi a Satani, i lona folafola atu faapea: “Le alii o lenei lalolagi, . . . e le maua e ia se mea ia te au.” Ma i le faaiʻuina o lana lauga mulimuli i ona soʻo a o leʻi faalataina ma puea o ia, na ia taʻu atu ia i latou: “Ia outou loto tetele, ua ou manumalo i le lalolagi.”—Ioane 8:46; 14:30; 16:33.
6. (a) Aiseā ua silafia ai e Iesu po o le ā le ituaiga o malologa e manaomia e le fanau a tagata? (e) I le ā le lautele na faaalia ai e Iesu le mataʻu faaleatua?
6 A o iai o ia i le tino i inei i luga o le lalolagi, na tofo ai Iesu i le uiga o le avea o se tagata, ‘e maulalo ifo i lo o agelu.’ (Eperu 2:7) Sa oo ina masani o ia ma vaivaiga faaletagata ma o le mea lea na lelei ai ona faaauupegaina o ia ina ia auauna e avea o le Tupu ma le Faamasino o le fanau a tagata mo le afe o tausaga. O lenei Alo o le Atua, o lē na fetalai, “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou,” na te silafia le ituaiga o malologa ua manaomia e le fanau a tagata. (Mataio 11:28) Ua taʻu mai e le Eperu 5:7-9, NW, ia i tatou: “I aso na tino tagata ai o ia na ofoina atu ai e Keriso faatoga ma aioiga i Lē na mafai ona faaola ia te ia nai le oti, faatasi ai ma le tagi tele ma loimata, ma sa faafofogaina ai o ia ma le fiafia ona o lona mataʻu i le Atua. E ui lava sa o ia o le Alo o le Atua, ae sa ia aʻoaʻoina ina ia usiusitai mai mea na tiga ai o ia; ma mulimuli ane ina ua uma ona faaatoatoaina o ia [i le usiusitai] na avea ai o ia o le tupuga o le ola e faavavau ia i latou uma o e usiusitai ia te ia.” Sa leʻi faafiti Iesu, e ui lava sa tatau ona ia tumau e oo i le tiga o le maliu faaletagata i le mauaina o le ‘tuʻimomomoina o le mulivae’ mai i le Gata inosia. (Kenese 3:15) I le pei o Iesu, seʻi o tatou faaalia pea le mataʻu i le Atua, e tusa lava pe oo ai i le oti pe e tatau ai, i le mautinoa faapea o le a faafofogaina e le Atua a tatou faatoga ma tuuina mai ia i tatou le faaolataga.
ʻOla i le Amiotonu’
7. E tusa ai ma le 1 Peteru 2:21-24, o le ā le faaaʻoaʻo na tuu e Keriso mo i tatou, ma e faapefea ona aafia ai i tatou i lona soifuaga?
7 A o faaalia i le tino, na aveesea ai ma le faamaoni e Iesu le ufiufi o le mea lilo paia o le tuutoina i le Atua. Ua tatou faitau ai i le 1 Peteru 2:21-24: “Auā na tigaina Keriso lava o le sui o outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao. O le na le agasala lava, na le iloa foi se pepelo i lona fofoga; o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia lava i le na te faamasinotonu. O le na aveina e ia lava a tatou agasala i lona lava tino i luga o le laau, ina ia teteʻa outou ma agasala, tatou te nofo ai i le amiotonu.” A o tatou mafaufau loloto i le soifuaga o Iesu, maeu le faalototeleina ai o i tatou ina ia tuliloa le tuutoina i le Atua, ia tausisia le faamaoni, ma ia ola i le amiotonu e pei ona sa ia faia!
8. E mafai faapefea ona tatou ola i le amiotonu e pei ona sa faia e Iesu?
8 Na soifua moni lava Iesu i le amiotonu. Na valoia e le Salamo 45:7, NW e uiga ia te ia: “Ua e alofa i le amiotonu, ma e ʻinoʻino i le amioleaga.” I le faatatauina o na upu ia Iesu, na faapea mai ai le aposetolo o Paulo i le Eperu 1:9, NW: “Ua e alofa i le amiotonu, a ua e ʻinoʻino i le solitulafono.” E tusa ai ma lo tatou malamalamaga i lenei mea lilo paia o le tuutoina i le Atua, seʻi o tatou pei o Iesu e alofa pea i le mea ua tonu ma ʻinoʻino i le mea leaga. I aso nei, ua faamataʻuina ai ma le feai e le lalolagi a Satani amioga mamā Faa-Kerisiano, ma i a tatou feutagaiga uma lava ma i latou i totonu ma fafo atu o le faapotopotoga a Ieova, seʻi o tatou faia se faaiʻuga ina ia ola i le amiotonu, i le faamaualugaina o mataupu silisili tonu a Ieova. Ma seʻi o tatou faaauau pea ona aai i le Afioga a le Atua ina ia maua le malamalama faaleatua e matuā talafeagai mo le teteeina atu o le Tiapolo ma ana togafiti!
9. O le ā na faaopoopo i le maelega o Iesu i le faiva, ma e tusa ai o lenei mea o le ā ua aafia ai faatatau i leoleo mamoe o lotu sese?
9 E iai se isi mea faaopoopo na uunaia ai Iesu ina ia maelega i lana faiva. O le ā lena mea? I le Mataio 9:36 ua tatou faitau ai: “Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” O lea, na amata ai “ona aʻoaʻo . . . ia te i latou i mea e tele” e Iesu. (Mareko 6:34) Mai mea manaomia, ua aafia ai i lenei mea le faaalialia o le amioleaga ma le solitulafono o leoleo mamoe pepelo faalotu. E tusa ai ma le Mataio 15:7-9, na fetalai ai Iesu i nisi o i latou: “O outou tagata pepelo, e tatau lava ia te outou le valoaga a Isaia, ua faapea mai, Ua faalatalata mai ia te au lenei nuu i o latou gutu, ma vivii mai ia te au i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.”
O se Mea Lilo e Faalumaina ai
10. I aso nei, o le “mea lilo a le amio leaga” o loo taulaʻi atu ia te ai, ma o le ā ua taʻusalaina ai i latou?
10 A o fetalai atu Iesu faasaga i taʻitaʻi lotu pepelo, o lea e faapea foi ia i tatou i aso nei ona iai se lagona lē fiafia i se mea lilo ua tulai mai e matuā faasagatau i le mea lilo paia o le tuutoina i le Atua. I le 2 Tesalonia 2:7, na taʻua ai e Paulo lea mea o le “mea lilo a le amioleaga.” O se mea lilo sa iai i le uluai senituri T.A. auā o le a lē faaalia seia oo i se taimi umi lava ina ua mavae le maliu o le au aposetolo. I aso nei, ua taulai atu lea mea lilo i taʻitaʻi lotu o Kerisinetoma o ē ua sili atu ona latou naunau i faiga faapolotiki i lo o le folafolaina o le tala lelei o le Malo amiotonu o le Atua. Ua matuā taatele nauā le faafiaamiotonu ia i latou. O se faaaʻoaʻoga mataʻina o le au faievagelia i televise o lotu Porotesano a Kerisinetoma: o leoleo taufaasese o ē ua seleina fulufulu o a latou lafu, i le fausia aʻe o o latou emepaea e faitau miliona ma miliona talā, taaalo ma fafine talitane, e fetagisi loimata e pei o korokotaila pe a faaalialia mai i latou lava, ma augani mai pea mo ni tupe, e mananao pea lava i ni tupe se tele. Ua faaalia mai foi e faiga faa-Katoliko Roma i le Vatikana se ata leaga faapena faatasi ai ma ana fesootaiga lē tonu faapolotiki, le fia mamalu i le vaaiga i fafo, ma faiga iʻuvale tau tamaoaiga i fale tupe.
11. O le ā o le a tupu i taʻitaʻi lotu Kerisinetoma ma vaega uma lava o Papelonia le Aai Tele?
11 E lē tioa ona faaalia mai le vasega o taʻitaʻi lotu Kerisinetoma “o le tagata o le agasala”! (2 Tesalonia 2:3) O lenei vaega aupito sili ona lauiloa o Papelonia le Aai Tele pei o se fafine talitane o le a faaalialia atoatoa ma faaleagaina, faatasi ai ma isi lotu sese uma lava. E pei ona tatou faitau ai i le Faaaliga 18:9-17, o faiga faapolotiki ma faatauʻoa (ma ē teuina a latou tupe) o le a auē ona o lea: “Aue, aue, le aai tele!” O le a matuā faaalialia lava Papelonia le Aai Tele ma ana mea lilo, i se matuā faaeseesega sili mai le malamalama o le mea lilo paia o le tuutoina i le Atua.
12. O le alofa o Iesu i le amiotonu na taʻitaʻiina atu ai o ia e faia le ā?
12 O le alofa o Iesu mo le amiotonu ma inoino i le amioleaga na taʻitaʻiina atu ai o ia e faamalosia o ia lava i le tuuina atu ma le lē fia faasaoina o ia ona o le tapuaiga moni. I lana uluai asiasiga i Ierusalema i le avea o le Alo faauuina o le Atua, na tuli ai i fafo e Keriso tagata faatauʻoa ma tagata faatau tupe mai le malumalu, i lona fetalai atu: “Ave ese ia nei mea; aua le fai le fale o loʻu Tamā ma fale faatau oa.” (Ioane 2:13-17) I lana asiasiga mulimuli ane i le malumalu, na taʻu atu ai e Iesu i tagata Iutaia tetee: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.” (Ioane 8:44) Maeu le lototele na faaalia e Iesu i lona taʻuina atu i luma o na tagata lotu faapea o i latou o tagata pepelo ma o fanau a le Tiapolo!
13. (a) O fea tonu lava o faaalia ai le inoino o Iesu i le agasala? (e) Aiseā ua aogā ai i taʻitaʻi lotu agasala le faamasinoga faapena na folafolaina atu e Iesu i luga o tusiupu ma Faresaio?
13 E leai lava se mea o sili ona faaalia ai le inoino o Iesu i le amioleaga na i lo o lana fetalaiga matuitui o loo faamauina i le Mataio mataupu e 23 na taʻusalaina ai tusiupu ma Faresaio, pei ni gata. I inā o loo ia faaleoina atu ai faafitu ni “oi talofa,” i le faatusaina o i latou i ‘tuugamau sinasina—ua tumu i ituaiga o mea lē mamā uma, le faafiaamiotonu, ma le amioleaga.’ Maeu le moomoo o Iesu i le fia faasaoina o tagata mai lena faiga o le agasala! “Ierusalema e, Ierusalema e,” na alaga ai o ia, “ua tele lava oʻu manao e faapotopoto i lau fanau, e pei ona ofaofatai e le moa o lana toloaʻi i lalo o ona apaau! Peitai e leʻi mananao ai outou. Faauta! ua tuulafoaiina lo outou fale ia te outou.” (Fuaiupu 37, 38, NW) O le amioleaga a taʻitaʻi lotu o o tatou aso ua aogā ai se faamasinoga faapena auā, i upu o le 2 Tesalonia 2:12, ‘latou te le talitonu i le upu moni ae fiafia i le amiolētonu.’ O la latou amioleaga o le mea matuā eseese lea mai le tuutoina i le Atua lena na faaalia ma le faamaoni e Iesu a o iai i inei i le lalolagi.
Faalauiloaina o Faamasinoga a le Atua
14. I le talisapaia o le mea lilo paia o le tuutoina i le Atua e ao ona uunaia ai i tatou e faia le ā?
14 O lo tatou talisapaia mo le mea lilo paia o le tuutoina i le Atua e ao ona taʻitaʻiina atu ai pea i tatou ia mulimulituʻi i tulagāaao o Iesu. I le pei o ia, e ao ona tatou maelega i le folafolaina o le mea ua faamatalaina i le Isaia 61:2 o “le tausaga e talileleia mai ai e Ieova, ma le aso e taui ai ma sui e lo tatou Atua.” Tau ina ia tatou maelega e faia la tatou vaega o le “faamatalaloto i e faanoanoa uma lava.” E pei lava o le taimi a o iai Iesu i le lalolagi, e manaomia ai le lototele mo i tatou i aso nei e folafola atu faamasinoga a Ieova, e aofia ai ma feau malolosi o loo tuusaʻo mai i mataupu o Le Olomatamata ma i le tusi Revelation—Its Grand Climax at Hand! E tatau ona tatou talaʻi ma le lototele ma le tomai, “ia faamāi i le masima” a tatou upu ina ia logo malie ia i latou o faanaunau i le amiotonu. (Kolose 4:6) I le aʻoaʻoina mai le faaaʻoaʻoga a Iesu o le tuutoina i le Atua, seʻi mafai foi ona tatou lipoti atu i le taimi tatau faapea ua faauma la tatou galuega na tuuina mai e Ieova ia i tatou e faia.—Mataio 24:14; Ioane 17:4.
15. E tusa ai o le mea lilo paia a le Atua, o le ā ua tupu talu mai le 1914?
15 Maeu le Faaaʻoaʻo sili o Iesu, a o faaalia mai i le tino! Maeu le manino o le faataunuuina ia te ia o le mea lilo paia o le tuutoina i le Atua! Maeu lona faaalia ma le faamalosi o le suafa o Ieova! Ma maeu le ofoofogia na tauia ai e le Tamā o Iesu o ia ona o lona tausisi i le ala faamaoni! Ae o loo iai pea mea i le mea lilo paia a le Atua. Talu mai le 1914 ua tatou ola ai i “le aso o le Alii.” (Faaaliga 1:10) E pei ona taʻua i le Faaaliga 10:7, ua oo mai le taimi mo le ‘mea lilo paia a le Atua e faaiʻuina ai e tusa ma le tala lelei.’ Ua folafola mai e leo mai le lagi: “O le malo o le lalolagi ua avea ma malo o lo tatou Alii [o Ieova] ma lona Keriso, e pule foi o ia o le tupu e faavavau faavavau lava.” (Faaaliga 11:15, NW) Ua uma ona faatuina e Ieova le Tupu faa-Mesia, o Iesu Keriso, i lona nofoalii mamalu ina ia avea o se pule lagolago faatasi ma Ia!
16. Na faapefea ona faaalia vave e le tupu fou faapaleina o Iesu Keriso lona migao mo le amio atua i le lagi?
16 I le avea o se pule lagolago faatasi ma le Atua i le Malo fou faatoʻā fanau mai, ua taʻua ai foi Iesu o Mekaeli (o lona uiga, “O Ai E Pei O Le Atua?”). O le a leai lava sē fouvale o le a manuia i le fia pei o le Atua, ma sa vave lava ona faaalia e le Tupu fou faapaleina lenei mea e ala i le lafoina ifo o le Gata tuai, o Satani, ma ana agelu i le lalolagi. (Faaaliga 12:7-9) Ioe, o loo faaalia pea e Iesu le migao mo le amio atua i le lagi, e pei ona sa ia faaalia le tuutoina i le Atua a o iai i le lalolagi. O le a lē malōlō Iesu Keriso faamamaluina seia faaumatia e ia o lotu sese uma ma soloiesea atoatoa le faalapotopotoga, vaaia ma le lē vaaia a Satani.
17. Talu mai le 1914, o le ā ua tupu i le faataunuuga o le Mataio 25:31-33?
17 Talu mai le 1914 o le faataunuuina o le valoaga a Iesu lava ia i le Mataio 25:31-33 ua faapupula atu ai ma le matuā malamalama le mea lilo paia a le Atua. O i inā na folafola atu ai e Iesu: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe mai ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.” Mai i lona tulaga maualuga i le lagi, o le a aumaia ai, e lenei Tupu mamalu, le Faamasino, ma le Lagolago o le tuutoina i le Atua, le taui ma sui, muamua i le tagata o le agasala ma isi vaega o Papelonia le Aai Tele, ma mulimuli ane i elemeni uma lava o totoe ma tagata pei ni ʻoti o ē o lagolagoina le faalapotopotoga faalelalolagi amioleaga a Satani. Ona lafoina loa lea o Satani lava ia i le to e lē gata. (Faaaliga 20:1-3) Peitai o tagata pei ni mamoe “o e amiotonu” o le a o atu i le ola e faavavau. (Mataio 25:46) Tau ina ia tuuina oe e lou tuliloaina o le tuutoina i le Atua i lena vaega amio saʻo!
18. O le ā le faaeaga e olioli ai ua ia i tatou i le fesootai atu ma le mea lilo paia o le tuutoina i le Atua?
18 Ua faalaeiauina i tatou e le Faaaliga 19:10, NW, ia “tapuai i le Atua.” Ma aiseā? Ua faaauau mai ai le mau: “Auā o le agaga o le valoaga o le mau lea ia Iesu.” O lea o le tele o valoaga faagaeeina o aso anamua o loo molimau ia Iesu! Ma a o faataunuuina nei valoaga, ua oo ai ina manino e pei o le tioata le mea lilo paia a le Atua. O le mea lea, ua tatou olioli ai, e iloa faapea o le mea lilo paia o lenei tuutoina i le Atua ua oo mai ina ia faatinoina ia Iesu. O se faaeaga ofoofogia mo i tatou le mulimuli i ona tulagāaao e avea o ni faifeau loto maulalo o le Malo o le Atua. Ioe, ua faamamaluina i tatou ina ia auai i le malamalamaga ma le folafolaina o mea uma lava o le mea lilo paia a le Atua e tusa ai ma le tala lelei!
O le ā Lau Tali?
◻ O le ā e mafai ona tatou aʻoaʻoina mai i le faaaʻoaʻoga a Iesu o le tuutoina i le Atua?
◻ E mafai faapefea ona tatou ola e tusa o le amiotonu e pei ona sa faia e Keriso?
◻ O le ā le mea lilo e faalumaina ai na tulai mai e faasagatau i le mea lilo paia o le tuutoina i le Atua?
◻ O lo tatou talisapaia mo le mea lilo paia o le tuutoina i le Atua e ao ona uunaia ai i tatou e faia le ā?
[Ata i le itulau 21]
I le avea o se lagolago o le tuutoina i le Atua ma le maelega i le folafolaina o le Malo, ua mafai ai e Iesu ona taʻu atu ia Pilato: “O le mea foi lenei na ou sau ai i le lalolagi, ina ia ou molimau i le upu moni”
[Ata i le itulau 23]
Na faaalia le tuutoina i le Atua o Iesu ina ua ia taʻusalaina tusiupu ma Faresaio