Ia Faaaogā ma le Atamai Lou Saolotoga Faa-Kerisiano

‘Ia pei o e saʻoloto, ma ia taofimau lou saʻolotoga . . . ia faapei o auauna a le Atua.’—1 PETERU 2:16.

1. O le ā le saolotoga na leiloa ia Atamu, ma o le ā le saolotoga o le a toe faafoisia i ai e Ieova le fanau a tagata?

INA ua agasala o tatou uluai mātua i le faatoaga o Etena, sa leiloa ai ia i laʻua se tofi mamalu mo a la fanau—le saolotoga lea mai le agasala ma le iʻuvale. O le iʻuga, ua faapea ona tatou fananau uma mai ai, o ni pologa i le iʻuvale ma le oti. E ui i lea, o se mea e fiafia ai, ona ua fuafuaina e Ieova ina ia toe faafoisia tagata faamaoni i se saolotoga ofoofogia. I aso nei, o loo naunau ma faatalitali atu ai ē e saʻo o latou loto i “le faaalia mai o atalii o le Atua,” lea o le a latou iʻu ai i le lē “faapologaina e le iʻuvale, a e oo i le saolotoga [mamalu] o le fanau a le Atua.”—Roma 8:19-21.

‘Faauuina e Talaʻi’

2, 3. (a) O ai “atalii o le Atua”? (e) O le ā le tulaga ofoofogia o loo latou olioli ai, ma o le ā le avega tauave ua aumai ai?

² O ai nei “atalii o le Atua”? O i latou ia o uso o Iesu sa faauuina i le agaga, o ē o le a avea ma pule faatasi ma ia i le Malo faalelagi. Na faailoa mai tagata muamua o i latou na, i le uluai senituri T.A. Sa latou taliaina le upu moni e faasaolotoina ai na aʻoaʻo atu e Iesu, ma talu mai le Penetekoso o le 33 T.A., sa auai i latou i faaeaga mamalu na tautala i ai Peteru ina ua ia tusi atu ia te i latou e faapea: “O outou o le tupulaga ua filifilia outou, o tupu ma ositaulaga, o le nuu paia, [o se nuu mo se fuafuaga faapitoa].”—1 Peteru 2:9a; Ioane 8:32.

³ Maeu se faaeaga ofoofogia—o le avea o se fuafuaga faapitoa i le Atua! Ma e faapena le tulaga faamanuiaina ma le Atua, o loo olioli ai le vaega totoe faaonaponei o na atalii faauuina o le Atua. Ae o sea faaeaga maualuga, e ō mai faatasi ma ni avega tauave. Sa faailoa mai e Peteru se tasi o na avega tauave ina ua faaauau ona ia faapea mai: “Ia outou taʻutaʻu atu ona lelei na ia valaau ia te outou nai le pouliuli e oo i lona lava malamalama e matuā ofo ai.”—1 Peteru 2:9e.

4. Ua faataunuuina faapefea e Kerisiano faauuina le avega tauave ua ō mai faatasi ma lo latou saolotoga faa-Kerisiano?

⁴ Po ua faataunuuina ea e Kerisiano faauuina lenei avega tauave ina ia taʻutaʻu atu i le atulaulau, uiga lelei o le Atua? Ioe. Na tautala faavaloaga Isaia e uiga i ē faauuina talu mai le 1919, e faapea: “Ua i oʻu luga le Agaga o le Alii o Ieova; auā ua faauuina aʻu e Ieova e talaʻi le tala lelei i e ua tigaina, ua ia auina mai aʻu e fufusi i e loto momomo, e talaʻi le saolotoga i le tafeaga, ma le matuā tatalaina o e ua fusifusia. E talaʻi le tausaga e talileleia mai ai e Ieova, ma le aso e taui ai ma sui e lo tatou Atua.” (Isaia 61:1, 2) I aso nei, i le mulimuli i le faaaʻoaʻoga a Iesu, o lē na faatatau muamua i ai lenei mau, ua folafola atu ai ma le maelega e le vaega totoe le tala lelei o le saolotoga i isi.—Mataio 4:23-25; Luka 4:14-21.

5, 6. (a) O le ā ua iʻu i ai le talaʻiga ma le maelega a Kerisiano faauuina? (e) O ā faaeaga ma avega tauave o loo olioli ai i latou o le motu o tagata e toatele?

⁵ O le iʻuga o la latou talaʻiga ma le maelega, ua fotuai mai ai se motu o tagata e toatele i le vaaiga a le lalolagi i nei aso e gata ai. Ua latou ō mai nai atunuu uma lava, ina ia auai ma ē faauuina i le auaunaga ia Ieova, ma ua faasaolotoina foi i latou na e le upu moni. (Sakaria 8:23; Ioane 10:16) E pei o Aperaamo, ua taʻuamiotonuina i latou e faavae i le faatuatua, ma ua ulu atu ai i se faiā vavalalata ma Ieova le Atua. Ma e pei o Raava, ua avea lo latou taʻuamiotonuina ma itu ua tatau ai ona faasaoina i latou mulimuli ane—o lona uiga, o le faasaoina atu lea ia Amaketo. (Iakopo 2:23-25; Faaaliga 16:14, 16) Ae o na faaeaga ua siitia i ai, ua faaee mai ai foi ma le avega tauave o le taʻuina atu i isi o le mamalu o le Atua. O le pogai lena na vaaia ai e Ioane i latou, o loo vivii atu ia Ieova i le lautele, “ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe.”—Faaaliga 7:9, 10, 14.

⁶ I le tausaga ua mavae, na faaaluina ai e le motu o tagata e toatele, lea ua silia nei ma le fa miliona lona faitau aofai, faatasi ma sina vaega toaitiiti o loo totoe o Kerisiano faauuina, itula e toetoe lava atoa le piliona, i le folafolaina atu i le atulaulau o uiga lelei o Ieova. O se auala lea e sili atu ona lelei ua mafai ona faaaogā i ai lo latou saolotoga faaleagaga.

“Ia Ava i le Tupu”

7, 8. O le ā le avega tauave ua aumaia e le saolotoga faa-Kerisiano agaʻi i ē o loo iai le pule faalelalolagi, ma i lenei itu, o le ā le manatu sese e tatau ona tatou alofia?

⁷ Ua faaee mai foi e lo tatou saolotoga faa-Kerisiano isi avega tauave. Na faasino mai e Peteru nisi o avega tauave ina ua ia tusia: “Ia outou ava i tagata uma; ia alolofa atu i le au uso; ia matatau i le Atua; ia ava i le tupu.” (1 Peteru 2:17) O le ā e faatatau i ai le faaupuga “ia ava i le tupu”?

⁸ O “le tupu,” ua faaataina ai ē o loo iai le pule faalelalolagi. I aso nei, ua tuputupu aʻe ai i le lalolagi se agaga o le lē faaaloalo mo le pule, ma e faigofie tele i lenei mea ona aafia ai Kerisiano. E ono manatu ai foi se Kerisiano, pe aiseā e ao ai ona ia āva i “le tupu,” talu ai ona “o le lalolagi uma o loo nofo toilalo i loo leaga.” (1 Ioane 5:19) Ona o na upu, atonu e manatu ai o ia ua saoloto ina ia lē usiusitai i tulafono faigata, atoa ma le lē totogia o lafoga pe afai e mafai ona ia sao mai ai. Ae o se tetee lena i le poloaiga a Iesu na ia fetalai ai, ia ‘avatu ia Kaisara, mea a Kaisara.’ O lona iʻuga, o le a ‘faaaogāina ai lona saolotoga e fai ma ufiufi o le amio leaga.’—Mataio 22:21; 1 Peteru 2:16.

9. O ā ni mafuaaga lelei se lua e usiusitai ai i ē o loo iai le pule faalelalolagi?

⁹ Ua faatonuina Kerisiano ina ia āva i ē o loo iai le pule ma ia gauai atu i ai—e tusa lava po o se mea itiiti. (Galuega 5:29) Aiseā? I le 1 Peteru 2:14, 15, o loo faasino atu ai e Peteru i mafuaaga e tolu ina ua ia faapea mai, o ē o loo pule, ua “aauina mai e [le Atua] ina ia faasalaina ai ē amio leaga, a ia viia ē amio lelei.” Ua lava a le mataʻu neʻi faasalaina, e fai ma mafuaaga e usiusitai ai i ē o loo iai le pule. Pagā se faalumaina o le a iai, pe afai e faasalaina se tasi o Molimau a Ieova i tupe, pe faafalepuipui ona o le faaoolima, gaoi, po o se isi solitulafono! Seʻi mafaufau i le fiafia o nisi e faasalalau atu se mea faapena! I le isi itu, a o tatou atiina aʻe se talaaga o le usiusitai i tulaga lautele, tatou te maua ai le viiga mai ē o loo iai le pule, e saʻo a latou pulega. Atonu tatou te maua ai le saolotoga e sili atu, e fai ai la tatou galuega o le talaʻiina atu o le tala lelei. E lē gata i lena, ‘o le faia o le mea lelei, tatou te taofia ai faamatalaga valea a tagata lē mafaufau.’ (1 Peteru 2:15e) O le mafuaaga lona lua lena e ao ai ona usiusitai i ē o loo iai le pule.—Roma 13:3.

10. O le ā le mafuaaga e sili ona malosi e usiusitai ai i ē o loo iai pule faalelalolagi?

¹⁰ Ae o loo iai se mafuaaga e sili atu ona malosi. Ua ala ona iai ē o loo pule ona ua faatagaina e Ieova. E pei ona faapea mai Peteru, ua “aauina mai” e Ieova ē o loo iai le pule faapolotiki, ma ‘o le finagalo o le Atua,’ ia tumau pea ona gauai atu Kerisiano ia i latou. (1 Peteru 2:15a) Ua faapena foi ona fai mai le aposetolo o Paulo: “O pule uma lava o loo fai nei, ua faatuina e le Atua.” O lea, e ao ai ona uunaia i tatou e o tatou loto fuatiaifo ua aʻoaʻoina i le Tusi Paia, ina ia usiusitai i ē o loo iai le pule. Afai tatou te mumusu e gauai atu ia te i latou, o lona uiga ua tatou ‘tetee i le fuafuaga a le Atua.’ (Roma 13:1, 2, 5) O ai o i tatou o le a manao e tetee i le fuafuaga a le Atua? Pagā se faaaogāseseina o le saolotoga faa-Kerisiano pe a faia faapena!

“Ia Alolofa Atu i le Au Uso”

11, 12. (a) O le ā le avega tauave agaʻi i uso talitonu, ua ō mai faatasi ma lo tatou saolotoga faa-Kerisiano? (e) O ai e tatau faapitoa lava i ai lo tatou alofa ma le magafagafa, ma aiseā?

¹¹ Na faapea mai foi Peteru, e ao i se Kerisiano ona “alofa atu i le mafutaga atoa o le au uso.” (1 Peteru 2:17, NW) O se isi lea o avega tauave e ō mai faatasi ma le saolotoga faa-Kerisiano. O le toatele o i tatou o loo iai i se faapotopotoga. O le mea moni, o i tatou uma lava o loo iai i le mafutaga faavaomalo, po o le faalapotopotoga, o le au uso. O le faaalia o le alofa mo i latou na, o se faaaogāina lea ma le atamai o lo tatou saolotoga.—Ioane 15:12, 13.

¹² Sa faamatilatila mai e le aposetolo o Paulo se vaega o Kerisiano e tatau faapitoa lava i ai lo tatou alofa. Na ia faapea mai: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.” (Eperu 13:17) O i latou o loo taʻimua i le faapotopotoga, o toeaina ia. E moni, e lē lelei atoatoa nei tane. Ae e ui i lea, ua tofia i latou i lalo o le faatonutonuga a le Vaega Pule. Latou te taʻimua e ala i faaaʻoaʻoga ma le magafagafa, ma ua tofia i latou ina ia tausia pea i tatou. Maeu se tofiga mamafa. (Eperu 13:7) O se mea e fiafia ai, ona o le tele o faapotopotoga, o loo iai se agaga e sili ona lelei, e felagolagomai, ma o se fiafiaga mo toeaina le galulue faatasi ma i latou. E sili atu ona faigata, pe afai e lē mananao tagata e felagolagomai. O le a faia ai la e le toeaina lana galuega, ae e pei ona fai mai Paulo, na te faia lea ma le loto “tiga.” E mautinoa lava, tatou te lē mananao e faatigā i toeaina! Tatou te mananao ia te i latou ina ia olioli i la latou galuega ina ia mafai ai ona latou atiina aʻe i tatou.

13. O ā nisi auala e mafai ai ona tatou felagolagomai ma toeaina?

¹³ O ā nisi o auala e mafai ona tatou felagolagomai ai ma toeaina? O se tasi, o le tausia lea ma le faamamāina o le Maota o le Malo. O le isi, o le felagolagomai lea i le galuega o le asiasi atu i ē mamaʻi ma fesoasoani atu i ē ua lē atoatoa le malosi. E faaopoopo atu i ai, e mafai ona tatou tauivi ina ia tutumau i le malosi faaleagaga, ina ia lē avea ai i tatou ma avega mamafa. O se vaega tāua tatou te felagolagomai ai, o le faatumauina lea o le mamā tau amio ma le itu faaleagaga o le faapotopotoga, e ala i a tatou lava amio, atoa ma le lipotia atu o agasala matuiā tatou te iloaina.

14. E ao faapefea ona tatou lagolagoina se aʻoaʻiga e faia e toeaina?

¹⁴ I nisi taimi, ina ia tausia le mamā o le faapotopotoga, e tatau ai i toeaina ona faateaina se tasi e agasala ae e lē salamō. (1 Korinito 5:1-5) O le faia faapea, e puipuia ai le faapotopotoga. Atonu o le a fesoasoani foi lea i lē ua agasala. E masani lava, ona fesoasoani lea aʻoaʻiga ina ia toe faasagatonu ai le mafaufau o lē ua agasala. E ui i lea, e faapefea pe afai o se tasi ua faateaina, o sau uo vavalalata po o sou tauaiga? Seʻi faapea o ia o lou tamā po o lou tinā, o lou atalii po o lou afafine. E tusa lava po o ai, ae pe tatou te faaaloalogia ea le faaiʻuga ua faia e toeaina? E moni, atonu e faigata. Ae pagā se faaaogāseseina o lo tatou saolotoga, pe afai tatou te fesiligia le faaiʻuga a toeaina ma faaauau ai pea ona auaumea faaleagaga ma lē ua faamaonia le avea o se taaʻiga leaga i le faapotopotoga! (2 Ioane 10, 11) E ao ona avatu le faamālō i tagata uma lava o Ieova, ona o le auala o loo latou felagolagomai ai i na mataupu. O le iʻuga, ua tumau ai pea le mamā o le faalapotopotoga a Ieova mai i lenei lalolagi lē mamā.—Iakopo 1:27.

15. Afai e faia e se tagata se agasala matuiā, o le ā e ao ona ia faia vave loa?

¹⁵ Ae e faapefea pe afai tatou te faia se agasala matuiā? Na faamatala e le Tupu o Tavita i latou o ē e fiafia i ai Ieova ina ua ia faapea mai: “O ai ea se alu ae i le mauga o Ieova? O ai se tumau i lona afioaga paia? O le ua i ai lima mamā, ma le loto mamā; o le ua le naunau lona loto i le mea faatauvaa, ma ua le tauto faaʻoleʻole.” (Salamo 24:3, 4) Afai o iai se mafuaaga ua lē o toe ‘mamā ai o tatou lima po o tatou loto,’ e tatau la ona tatou gaoioi ma le faanatinati. Ua lamatia ai lo tatou ola e faavavau.

16, 17. Aiseā e lē tatau ai i se tasi na te faia se agasala matuiā, ona taumafai e foia le mataupu na o ia lava?

¹⁶ Ua faaosoosoina nisi e natia ni agasala matuiā, atonu i le manatu e faapea: ‘Ua uma ona ou faailoa atu ia Ieova ma ua ou salamō. Aiseā la o le a faaaafia ai fua toeaina? Atonu e maasiasi pe mataʻu foi lē ua agasala i le mea e ono faia e toeaina. Peitai, e ao ona ia manatua, e ui ina e na o Ieova lava e mafai ona faamamāina i tatou mai le agasala, ae ua ia tofia toeaina e fai ma a latou avega tauave autū le faamamāina o le faapotopotoga. (Salamo 51:2) Ua tofia i latou i inā mo le fofōina, ma ‘le faatonutonuina o le au paia.’ (Efeso 4:12) O le lē ō atu la ia te i latou pe a tatou manaomia se fesoasoani faaleagaga, e pei lava o lo tatou lē ō atu i se fomaʻi pe a tatou mamaʻi.

¹⁷ O nisi o ē taumafai e foia mataupu na o i latou lava, latou te iloaina i ni masina po o ni tausaga mulimuli ane, o loo matuā faasoesa atu pea o latou loto fuatiaifo ia te i latou. Ae e sili atu ona leaga, ona o isi o ē e natia se agasala matuiā, ua faalua pe faatolu ona toe paʻūū atu i le agasala. E mulimuli ane la oo atu le mataupu i toeaina, a ua avea lea o se agasala faifai pea. Maeu le sili atu ona lelei o le mulimuli i le fautuaga a Iakopo! Na ia tusia e faapea: “Ua maʻi ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o [Ieova].” (Iakopo 5:14) Ia ō atu i toeaina a o iai pea le taimi e fofōina ai. Afai tatou te faatali mo se taimi umi, atonu o le a faigata ona tatou taofia le faia o le agasala.—Failauga 3:3; Isaia 32:1, 2.

Foliga Vaaia ma Faamalosi Tino

18, 19. Aiseā na faia ai e se patele se faamatalaga lelei e uiga i Molimau a Ieova?

¹⁸ I tausaga e lima ua mavae atu, i se mekasini a se lotu, na saunoa ai ma le fiafia se patele Katoliko i Italia e uiga i Molimau a Ieova.a Na ia faapea mai: “Ia te aʻu lava ia, ou te fiafia i Molimau a Ieova; ou te matuā taʻu saʻo atu lava. . . . O i latou ou te iloaina, e tonu a latou amio, e tautatala faaaloalo . . . [ma] e sili atu ona maumauai. O afea ea o le a tatou malamalama ai faapea e manaomia e le upu moni se taulimaga ina ia talileleia ai? E faapea o i latou o loo faasilasilaina atu le upu moni e lē manaomia ona faalotolotolua, manogi faalēmanuia, lē maopoopo, ma faatalalē?”

¹⁹ E tusa ai ma na upu, e aofia ai i isi mea, sa maofa le patele, i le auala na laei ai ma faailoa atu ai e Molimau i latou lava. E manino mai, o i latou na feiloai i ai le patele, sa faalogo atu i le fautuaga na aumaia e “le auauna faamaoni ma le mafaufau” i le tele o tausaga. (Mataio 24:45) Ua faapea mai le Tusi Paia, e ao ona ‘fai faalelei ma ia onomea’ laei o fafine. (1 Timoteo 2:9) I lenei vaitaimi o le paʻū maulalo o tulaga tau amio, e matuā manaomia ai foi e tane lena fautuaga. Pe e lē moni ea faapea, e ao i sui o le Malo o le Atua ona faailoa atu i latou lava i se auala lelei i ē o i fafo?

20. Aiseā e ao ai i se Kerisiano ona manatu mamafa i ona laei i taimi uma?

²⁰ Atonu e ioe nisi e faapea, e ao ona latou faaeteete i le auala latou te laei ai i sauniga ma le faiva i le fanua, ae atonu latou te manatu faapea, e lē faatatauina mataupu silisili o le Tusi Paia i isi taimi. E ui i lea, pe e iai ea se taimi e taofia ai le avea o i tatou ma sui o le Malo o le Atua? E moni e eseese tulaga. Afai tatou te fesoasoani i le fausiaina o se Maota o le Malo, ona fai lea o o tatou ofu e ese mai o tatou laei pe a tatou auai i se sauniga i lena lava Maota o le Malo. A tatou iai i taimi paganoa, atonu o le a faitalia foi i tatou i le auala e fai ai o tatou laei. Ae so o se mea lava e vaaia ai i tatou e isi, e ao ona fai faalelei ma ia onomea o tatou laei.

21, 22. E faapefea ona puipuia i tatou mai faamalosi tino e faaleagaina ai, ma o le ā le auala tatou te manatu ai i fautuaga i na mataupu?

²¹ O se isi itu ua faapea ona uaʻi tele atu i ai, o faamalosi tino. O tagata—ae maise lava ē talavou—latou te manaomia faamalosi tino. E lē o se agasala po o se faamaimau taimi le fuafuaina o faamalosi tino mo le aiga. E oo foi ia Iesu sa ia fetalai atu i ona soʻo ina ia “mapu ae teisi.” (Mareko 6:31) Ae ia faaeteete neʻi avea faamalosi tino ma itu e faaleagaina ai mea faaleagaga. O loo tatou ola i se lalolagi ua faapea ona faamatilatilaina ai e faamalosi tino faiga faaleituaiga lē mamā, sauaga mataʻutia, mea e faamataʻu ai, ma faiga faataulaitu. (2 Timoteo 3:3; Faaaliga 22:15) O loo mataala pea le auauna faamaoni ma le mafaufau i na lamatiaga, ma ua lapatai mai ai e lē aunoa ia i tatou e uiga i ai. E te manatu ea i na faamanatu o se faasāsāaga i lou saolotoga? Pe e te loto faafetai ea ona o le tausiga alofa a le faalapotopotoga a Ieova ia te oe, ua faailoa atu ai ia te oe na lamatiaga?—Salamo 19:7; 119:95.

²² Aua lava neʻi faagaloina e faapea, e ui ina e mai ia Ieova lo tatou saolotoga, ae tatou te tali fuaitau atu lava ia te ia, ona o le auala o loo tatou faaaogāina ai. Afai tatou te lē amanaia le fautuaga lelei, ma faia ai ni faaiʻuga sese, e lē mafai la ona tatou tuuaʻia ai fua se tasi. Ua faapea mai le aposetolo o Paulo: “E taitasi i tatou ma tala i lana amio i le Atua.”—Roma 14:12; Eperu 4:13.

Faatalitali atu mo le Saolotoga o le Fanau a le Atua

23. (a) O ā faamanuiaga ua tatou olioli ai nei e tusa ai ma le saolotoga? (e) O ā faamanuiaga o loo tatou naunau ma faatalitali atu i ai?

²³ O le mea moni o i tatou o ni tagata faamanuiaina. Ua faasaolotoina i tatou mai lotu sese ma faiga faanuupō. Faafetai i le taulaga togiola, ua mafai ai ona tatou faalatalata atu ia Ieova e ala i se loto fuatiaifo mamā, ma saoloto ai i se ala faaleagaga mai le nofo pologa i le agasala ma le oti. Ma e lē o toe mamao ona “faaalia mai [loa lea] o atalii o le Atua.” O le a faaalia mai i tagata uso o Iesu, i lo latou mamalu faalelagi o ni ē e faaumatiaina fili o Ieova, ia Amaketo. (Roma 8:19; 2 Tesalonia 1:6-8; Faaaliga 2:26, 27) A mavae lena, ona faaalia mai ai lea o na atalii o le Atua, e avea ma ala e tafe mai ai faamanuiaga mai le nofoalii o le Atua i le fanau a tagata. (Faaaliga 22:1-5) Mulimuli ane, o le a iʻu lenei faaalia mai o atalii o le Atua, i le faamanuiaina o le fanau faamaoni a tagata, i le saolotoga mamalu o fanau a le Atua. Po o e moomoo ea mo lena taimi? Ia faaaogā la ma le atamai lou salotoga faa-Kerisiano. Auauna nei mo le Atua, ona e olioli ai lea i le saolotoga ofoofogia i taimi uma e faavavau!

[Faaopoopoga i lalo]

Pusa Autalu

◻ Ua faapefea ona faamamaluina Ieova e ē faauuina, atoa ma isi mamoe?

◻ Aiseā e ao ai i Kerisiano ona āva i ē o loo iai le pule faalelalolagi?

◻ I ā auala e mafai ai e se Kerisiano ona felagolagomai ma toeaina?

◻ Aiseā ua tumatilatila ese ai Molimau a Ieova mai le toatele o le lalolagi e uiga i laei?

◻ O le ā e ao ona tatou alofia pe a faia ni faamalosi tino?

[Ata i le itulau 17]

E tatau faapitoa lava lo tatou alofa ma le felagolagomai i toeaina

[Ata i le itulau 18]

E ao i laei o se Kerisiano ona fai faalelei, ia onomea, ma talafeagai mo se faatasiga