O Ai Mikaele le Agelu Sili?

E SEĀSEĀ ona taʻua le agelu o Mikaele i le Tusi Paia. Afai e taʻua o ia, e masani lava ona fesootaʻi atu i sana gaoioiga. I le tusi o Tanielu o loo taʻua ai Mikaele o loo tau ma agelu leaga; i le tusi o Iuta o loo taʻua ai lo la finau ma Satani; ae o loo taʻua i le tusi o Faaaliga lona tau ma Satani ma ana temoni. Ona o lona lagolagoina o le pule a Ieova ma tau faasaga i fili o le Atua, ua moni ai le uiga o le suafa o Mikaele, “O Ai e Pei o le Atua?” Ae o ai Mikaele?

I nisi taimi e sili atu i le tasi le igoa o se tagata. O se faaaʻoaʻoga, o le isi igoa o Iakopo, o Isaraelu, ma o Simona le isi igoa o le aposetolo o Peteru. (Kenese 49:1, 2; Mataio 10:2) E faapena foʻi Mikaele, ua faamaonia i le Tusi Paia o le isi suafa lenā o Iesu Keriso a o leʻi afio mai i le lalolagi, ma ina ua toe foʻi i le lagi. Seʻi o tatou tilofaʻia faamaoniga mai le Tusi Paia e iloa ai lenā mea.

Agelu Sili. Ua faapea mai le Tusi Paia, o Mikaele o “le agelu sili.” (Iuta 9) Ia mātau mai, o loo taʻua Mikaele o le agelu sili. Ua faaalia ai e na o le tasi lava le agelu sili. O le faaupuga lenei “agelu sili” e numera tasi i le Tusi Paia ae lē numera tele. E lē gata i lea, e masani ona taʻua Iesu pe a taʻua le agelu sili. E tusa ai o le Alii o Iesu Keriso ua toe faatūina mai, ua taʻua i le 1 Tesalonia 4:16: “E afio ifo le Alii lava ia mai i le lagi ma le alaga ma le leo o le agelu sili.” O lea la, ua faamatalaina le siʻufofoga o Iesu o le leo o le agelu sili. Ua faaalia ai i lenei mau o Iesu o ia o Mikaele le agelu sili.

Taʻitaʻiʻau. Ua faapea mai le Tusi Paia o ʻMikaele ma ana agelu ua tau ma le tarako ma ana agelu.’ (Faaaliga 12:7) O lea la, o Mikaele o le Taʻitaʻiʻau o le ʻautau a agelu faamaoni. O loo faamatalaina foʻi i le Faaaliga, o Iesu o le Taʻitaʻiʻau o le ʻautau a agelu faamaoni. (Faaaliga 19:14-16) Na taʻua patino e le aposetolo o Paulo “le Alii o Iesu” ma “ana agelu malolosi.” (2 Tesalonia 1:7) O lea la, o loo taʻua i le Tusi Paia Mikaele ma “ana agelu” atoa ma Iesu ma “ana agelu.” (Mataio 13:41; 16:27; 24:31; 1 Peteru 3:22) Talu ai e leai se faamatalaga a le Tusi Paia e faaalia ai e lua ni ʻautau o agelu faamaoni i le lagi—o Mikaele le taʻitaʻi o le isi ʻau a o Iesu le taʻitaʻi o le isi ʻau—e talafeagai la ona faapea atu, o Mikaele o Iesu Keriso lava lenā i lona tofiga i le lagi.a