Felagolagomai ma le Faatulagaga a le Aʻoga

E talitonu Molimau a Ieova o se aʻoaʻoga lelei o se tasi lea o mea e sili ona tāua e mafai ona avatuina i fanau. Peitai o ai tonu e paʻū i ai le matafaioi muamua mo le aʻoaʻoga o se tamaitiiti? E na o faiaʻoga ea i le aʻoga?

Ua foliga mai ua manatu faapea nisi tagata. Peitai, o tamaiti e fananau mai i mātua ma o vaega o aiga. O i latou e lē o ni mea maua mai i le Setete po o so o se isi faalapotopotoga a le malo. O lea la, ua i mātua le tiute tauave mai le Atua e filifili ai mea o le a aʻoaʻoina ai a latou fanau.

Ae ui i lea, ua saunia e faiaʻoga se auaunaga tāua tele, ma ua matuā talisapaia. Ma ua matou iloatino faapea o nei vaitaimi o le faaleagaina atili o le talia o aʻoaʻiga, e lē o se galuega faigofie la latou galuega. O le ā e mafai ona faia e mātua ia galulue felagolagomai ai ma i latou?

Felagolagomaiga a Mātua

O le mea muamua, e tāua le faamasani o mātua i faiaʻoga o a latou fanau​—faia ni fuafuaga e feiloai ma talanoa ma i latou. O le feiloaiga e matuā lē o se fuafuaga mo ni finauga, ae na i lo lea ia vaai i le faapefea ona mafai ona felagolagomai faiaʻoga atoa ma mātua e fesoasoani ai i le auiluma o le tamaitiiti. E fiafia mātua e faalogologo pe a talanoa le faiaʻoga faapea ma le faailoa manino atu o o latou manaoga mo a latou fanau.

I sea feiloaiga e tatau i le tamā po o le tinā Molimau ona faailoa i le faiaʻoga le faatalitalia e mātua o amioga tatau faa-Kerisiano mai i a latou fanau, ma pe afai e ulavavale tamaiti, la te mananao ia logoina i laua. E tatau foi ona avatu le faamautinoaga e mātua o le a la lagolagoina faiaʻoga i so o se aʻoaʻiga talafeagai ua faia, e oo foi i le toe faamalosia i aiga.

O isi auala e mafai ona fesoasoani ai mātua: Ia mautinoa e lelei le ʻaiga o le taeao a tamaiti a o leʻi ō atu i le aʻoga. Vaai po ua maeʻa ona faia mea aʻoga ma ua ia i latou a latou tusi uma. Ia faaalia pea le faaaloalo i tulafono a le aʻoga ma ia faatalitalia fanau ia faaaloalo foi i ai. Ia uunaia le fanau ina ia talanoa mai i le aiga e uiga i taualumaga a le aʻoga ma so o se faafitauli atonu latou te feagai ai.

I lana lomiga Helping Children Make Career Plans: Tips For Parents, ua taʻuina atu ai e le U.S. Department of Health, Education and Welfare (Matagaluega a le Iunaite Setete o le Soifua Maloloina, Aʻoaʻoga ma le Lelei Tumau o Tagata) i mātua pe faapefea ona uunaia a latou fanau iti e suesue: “Fesoasoani i lau tama ia malamalama i le tāua tele o ana mataupu i le aʻoga i filifiliga o galuega mulimuli mai. Faaali ia i latou pe faapefea e mataupu e pei o le faitau tusi, matematika, ma ala o fesootaiga ona faaaogāina toetoe lava i galuega uma. I le faapuupuuga, fesoasoani ia i latou ia malamalama faapea e iai mafuaaga e sili atu ona tāua mo le alu i le aʻoga na i lo le tau ina alu i le aʻoga.”

Ma le faamaoni lava matou te faamoemoe o faamatalaga i lenei polosiua o le a saosaolaumea agaʻi i le galulue felagolagomai ma le nofogofie i le va o pule o aʻoga ma aiga o Molimau a Ieova.

[Faamatalaga faaopoopo i le itulau 30]

E i mātua le tiute tauave muamua mo le aʻoaʻoina o a latou fanau iti

[Ata i le itulau 31]

Ua faalaeiauina mātua Molimau ia faamasani ma faiaʻoga a a latou fanau