O le Poto Mai le Atua e Taliina ai le Tele o Fesili
1 Ae e te lei mauaina le poto saʻo e uiga i le upu moni, e foliga sa tele ni au fesili e uiga i le olaga sa lē mafai ona e taliina. Ae maeu lou fiafia ina ua e mauaina ni tali i na fesili e faavae mai i le Tusi Paia! O lea la ua mafai nei ona e fesoasoani atu i isi e sailia na lava tali. (Faatusatusa i le 2 Timoteo 2:2.) Ua mafai ona e fetufai ma i latou i le poto e uiga i le Atua lea e taitaia atu ai i le ola e faavavau. (Ioa. 17:3) Ae e mafai faapefea ona e fesoasoani atu i se tasi e talisapaia le tāua o lenei poto? Ia, mafaufau i fesili ua taliina e le upu moni mo oe. O le ā le mea o faanaunau i ai i latou o saili mo le upu moni ina ia iloa? O le mafaufau e tusa ai ma nei vala, ua mafai ona fesoasoani ia te oe i le ofoina o le tusi o Le Poto e Taʻitaʻia ai i le Ola e Faavavau. O fautuaga o loo mulimuli mai, e mafai ona fesoasoani ia te oe a o sauniuni mo le molimau atu ia Iuni.
2 Talu ai e toatele tagata o loo tau mānatu pe aisea ua tele naua ai puapuaga i le lalolagi, atonu o le a maua ai se tali lelei mai i lenei taulimaga:
◼ “Pe a tupu se mala pe faateleina foi faiga solitulafono ma faiga sauā, e masani lava ona fesili tagata pe aisea ua tutupu ai na mea matautia. O le ā la lau tali?” Faatali mo se tali ina ia iloa ai le manatu o le tagata. Ona suʻe lea i le mataupu e 8 o le tusi o Le Poto, ma faailoa i ai le mea o loo taʻua i le palakalafa 2. Faamatala i ai e faapea, o lenei tusi o loo aumaia ai le faamalamalamaga a le Tusi Paia i le pogai ua tutupu ai nei mea leaga, ma faapea atu: “Afai e te tautino mai o le a e faitauina lenei tusi, o le a ou fiafia lava e tuuina atu lenei kopi mo oe.” Afai e talia le tusi, ona faamatala lea i ai o le fuafuaga mo meaalofa tauofo.
3 Pe a e toe foi e asia le tagata na tuu ai le tusi o “Le Poto,” e mafai ona e faapea atu:
◼ “Ua faaosofia lava loʻu naunau i le faaiuga lea na e taʻua e uiga i le pogai ua tele naua ai puapuaga i le lalolagi. E te ioe i le tali a le Tusi Paia e pei ona otooto mai i le tusi?” Faatali mo se tali. Faitau le palakalafa 17 i le itulau 77 o le tusi o Le Poto, ma faitau le Roma 9:14 mai le Tusi Paia a lē ona le fale. Ona e faapea atu lea: “O le tala lelei la, e lē o le Atua e faapogaia ma le lē tonu tiga ma puapuaga ia i tatou. Ua ia folafola mai e aumaia ia i tatou le ola e faavavau i le filemu ma le fiafia. O le uluai mataupu i lenei tusi ua faapea lona matua ‘E Mafai ona E Maua se Lumanai Fiafia!’ Ou te fia faamatala atu ia te oe pe faapefea ona faatinoina moni lena mea ia te oe ma ē pele ia te oe.” Suʻe i le mataupu 1, ma faataitai le auala e tatou te faia ai suesuega. Ia talanoa le mataupu i le tele e mafai ai pe a talafeagai ma tulaga.
4 Atonu e te manao e faaaogā le faatomuaga lena o loo i le itulau 6 o le tusi “Le Auala e Amata ma Faaauau ai Talanoaga Faale-Tusi Paia” i le ulutala “Olaga Matua/Oti”:
◼ “Pe na iai se taimi na e fesili ai, ‘Po o le oti o le iuga lea o mea uma? Pe e iai se isi mea pe a mavae le oti?’ [Faatali mo se tali.] Ua tali manino mai e le Tusi Paia so o se fesili atonu e tatou te fesili ai e uiga i le oti. [Faitau le Failauga 9:5, 10.] Ua faaalia ai foi i le Tusi Paia e iai le faamoemoe moni mo i latou o ē faatuatua. [Suʻe i le palakalafa 13 i le itulau 84 o le tusi o Le Poto; faitau ma faamatala fetalaiga a Iesu o loo i le Ioane 11:25.] O lenei mataupu atoa, ua faapitoa lava mo le taliina o fesili nei, O le ā e tupu i ē pele ia i tatou ua maliliu? Afai e te fia faitau i ai, e mafai ona ou tuua le kopi lenei ma oe.” Tuu le avanoa i lē ona le fale e faia ai se meaalofa tauofo.
5 Pe a toe foi atu e asia, e mafai ona e toe faailoa atu oe ma faapea atu:
◼ “I le taimi muamua, na ta talanoa ai i le mea e tupu pe a maliu se tagata. E toatele tagata e talitonu e faapea, i so o se olaga pe a mavae le oti, a lē o le lagi ia o le afi i seoli. Ae pe sa e mafaufau e uiga i le tulaga e mafai ai e lē ua maliu ona toe ola mai iinei lava i le lalolagi? [Faatali mo se tali.] E tusa ai ma le faamatalaga a le Tusi Paia, o ē o le a toe faatutuina o le a iai faatasi ma ē agamalu o ē o le a ola i le lalolagi. [Faitau le Salamo 37:11, 29, ona talanoa lea o le palakalafa 20 i le itulau 88 o le tusi o Le Poto.] O lena faamoemoe ua faamafanafanaina ai le faitau miliona o tagata o ē o loo ola matataʻu i le oti. O le a fesoasoani lenei tusi ia te oe e malamalama lelei ai i le mataupu. Pe mafai ona ou faataitai atu le auala e faia ai?”
6 Afai e te manao i se taulimaga faigofie, e mafai ona e faataitaia le taulimaga lenei:
◼ “Ou te fia faaali atu ia te oe se ata i lenei tusi o Le Poto e Taʻitaʻia ai i le Ola e Faavavau. Pe e lē o se ata matagofie ea lenei?” Suʻe le tusi ina ia mafai ai e lē ona le fale ona iloa mai le itulau e 4-5. Faatali mo sona manatu. Ona faitau lea o upu na e i le itulau e 5. Ia faaiu i lou faapea atu: “E mafai ona tuu le tusi lenei ma oe e te faitau lava oe i ai. E lē faatauina, ae matou te talisapaia lava sina meaalofa tauofo mo la matou galuega i le lalolagi aoao.” Fesili ia iloa ai po o lē fea le taimi talafeagai e mafai ona toe foi atu ai e asia le tagata pe afai ua faaalia le fiafia.
7 Ua ia i tatou le poto mai le Atua e taliina ai fesili tāua o le olaga. Ia sauniuni ma le filigā, ma o le a faamanuia e Ieova au taumafaiga e tufa atu lenei faamatalaga e maua ai le ola mo i latou o ē o loo saili i le upu moni.