Ovasia o Loo Taimua—Le Ovasia o le Aʻoga o le Faiva Faatiokarate
1 O le ovasia o le Aʻoga o le Faiva Faatiokarate o se tagata ua matua faaleagaga o lē e galue mamafa i le tautala atu ma aʻoaʻo atu, ma o sē ua tatau ma onomea ona tatou faaaloalo ma lagolagosua i ai. (1 Timo. 5:17) O ā ona tiute tauave?
2 O ia na te vaaia le potutusi o le Aʻoga o le Faiva Faatiokarate o loo i le Maota o le Malo. E matuā naunau o ia e faalaeiau tagata uma o ē ua agavaa ina ia tusia o latou igoa i le aʻoga. E na te faamautinoa o loo tausia se faamaumauga saʻo lelei ina ia faia ai tofiga i se auala maopoopo ma ia faasolosolo lelei pe ā ma le tolu vaiaso muamua atu a o lei oo i le aso o polokalame taitasi o le aʻoga. E manaomia ona ia iloa lelei le faapotopotoga, ia manatua e ia tagata aʻoga taitoatasi ma o latou tomai. E ui lava atonu e iai se isi uso o fesoasoani ia te ia i le sauniunia o le faasologa o le aʻoga, ae o le faia ma le saʻo o tofiga a tagata aʻoga, e fitoitonu lava i le vaavaaiga totino a le ovasia.
3 Ina ia mafai ona aʻoaʻo atu ma le uigā i le aʻoga, e tatau i le ovasia ona sauniuni ma le filigā i vaiaso taitasi, ia suesue maeʻaeʻa i mataupu ua tofia atu. E mafai ai i lenei mea ona ia faatupuina pea le naunau o le faapotopotoga i le mataupu, ina ia iloa ai po ua faaaofia ma le saʻo le mataupu atoa, ma ia faamatilatila manatu tāua o le a aofia ai i le autaluga tusia.
4 Pe a uma lauga a tagata aʻoga taitoatasi, o le a faamālō atu le ovasia i le tagata aʻoga, ma faamatala atu le pogai ua lelei ai le tulaga o lea lauga, po o le pogai e manaomia ai ona faaleleia. Pe afai e manaomia atili e se tasi se isi taiala i le sauniunia o lona tofiga mo le aʻoga, e mafai e le ovasia po o se tasi na te tofia ona tuuina atu i lea tagata le fesoasoani totino.
5 Ina ia maua atoatoa aogā mai le galuega mamafa a le ovasia o le Aʻoga o le Faiva Faatiokarate ma nisi o faufautua o loo galulue i lalo o lana faatonutonuga, e tatau ai la ona tatou auai e lē aunoa i le aʻoga. E tatau foi ona tatou faataunuuina o tatou tofiga uma ma faatatau le fautuaga o loo tatou maua faapea foi fautuaga o loo tuuina atu i isi tagata aʻoga. I lenei auala, o le a tatou agaigai ai i luma e faaleleia lo tatou tomai e molioo atu le feau o le Malo i nofoaga faitele ma mai lea fale i lea fale.—Galu. 20:20; 1 Timo. 4:13, 15.