La Tatou Faaiuga—Ia Tausisia le Ala a Ieova i le Ola
1 O se tumutumuga o Tauaofiaga o “Le Ala a le Atua i le Ola,” na faia ai se iugafono lea na talia fiafia i le lauga faaiu. Na amata le lauga i se faalauiloaga e faapea: “O i matou . . . ua ioe ma le loto atoa e faapea, o le ala a le Atua, o le auala sili lea i le ola.” E manatuaina nisi o manatu e sili ona tāua o lena iugafono lea na tatou faapea atu ai, “IOE!”
2 O la tatou faaiuga, ia tumau i le tulaga mamā i le silafaga a Ieova, e aunoa ma le pisipisia mai le lalolagi. O le a faaauau ona tatou faamuamua le finagalo o le Atua i o tatou olaga. I le faaaogaina o lana Afioga, le Tusi Paia e fai ma o tatou taiala, o le a tatou lē liliu ese ai i le itu taumatau po o le itu tauagavale, i le mautinoa e faapea, o le ala a le Atua e sili mamao atu i le ala o le lalolagi.
3 Ua lē amanaia e le lalolagi lautele le ala a le Atua i le ola ma ua selesele mai ai iuga. (Iere. 10:23) O le mea lea, e tatau ai ona faaauau ona aʻoaʻoina i tatou e lo tatou Aʻoaʻo Sili, o Ieova, o lē o loo fetalai mai: “O le ala lava lenei, ia outou savavali ai.” (Isa. 30:21) O le ala a Ieova i le ola e pei ona faataatia mai i le Tusi Paia, e silisili lava i mea uma. Ina ia tausisi atu i lena ala, ua tatau ai ia te i tatou ona faaaogā atoatoa mea uma ua aʻoaʻoina ai i tatou e Ieova.
4 Le Polokalame Silisili Faaleaʻoaʻoga a Ieova: Ua aʻoaʻoina i tatou e Ieova i le fuafuaga moni o le olaga ma le auala e faaaogā ai o tatou olaga i se tulaga aupito sili ona aogā. Ua ia aʻoaʻoina i tatou i le auala e faaleleia ai le uiga o o tatou olaga, i le mafaufau, tau amio, ma le faaleagaga. Ua ia aʻoaʻo i tatou i le auala e nonofo fifilemu ai ma o tatou uso, o tatou aiga, ma o tatou uso a tagata. Ua ia faia lenei mea e ala i lana tusi aʻoga, le Tusi Paia, ma e ala i lana faalapotopotoga.
5 O a tatou sauniga a le faapotopotoga e sili ona tāua e tusa ai ma lenei vala. A o tatou auai e lē aunoa ma faia se sao i sauniga uma e lima, ua tatou maua ai se toleniga faalemafaufau e avea ai ma faifeau o le tala lelei faapea foi ma se aʻoaʻoga paleni lelei e uiga i le olaga faa-Kerisiano. (2 Timo. 3:16, 17) Ua saunia atili e lo tatou Faiaʻoga Sili ia aʻoaʻoga faatiokarate e ala i fonotaga ma tauaofiaga. O lo tatou sini, e tatau ona ia aua lava neʻi misia se sauniga po o se polokalame pe afai e tusa ai ma lo tatou soifua maloloina ma tulaga e auai i sauniga.
6 Seʻi o tatou faaauau pea ma le filigā i le tuliloaina o le ala a le Atua i le ola i aso o i luma, e faia nei mea uma mo le viiga o Ieova ma lo tatou lelei e faavavau!—Isa. 48:17.