Ia Tatou Maelega Pea i le Faiva
1 Ua galulue ma le maelega Molimau a Ieova mo le silia i le piliona itula i le lalolagi atoa, i le talaʻia o le Malo ma le faia o soo i tausaga taʻitasi, talu mai le 1992. Maʻeu lo tatou olioli ona o loo faia so tatou sao i lenā taumafaiga mataʻina!—Mata. 28:19, 20.
2 Ioe, e tatau ona faafetaia ma viia Ieova o lē ua lagolagoina la tatou faiva i nei “aso faigatā.” (2 Timo. 3:1) O le ā e manaʻomia ona tatou faia ina ia faaauau ai pea, ona faia ma le maelega lenei galuega tāua?
3 Māfuaaga e Maelega Ai: O le alofa loloto mo le Atua ma tuaoi, faatasi ma le faanaunauga mai le loto ina ia ola e tusa ai ma le tuuina atu, o le māfuaaga lea ua tatou auai ai pea i le auaunaga o le Malo. (Mata. 22:37-39; 1 Ioa. 5:3) E uunaʻia e le alofa i tatou ina ia lotomalie e tuua isi mea, ae fai so tatou sao atoatoa i le galuega talaʻi.—Luka 9:23.
4 Ia Faaauau Pea Ona Maelega: O loo taumafai malosi lo tatou fili, le Tiapolo, ina ia faavaivaia lo tatou maelega i le faiva. E na te faapogaia le lē ano mai o tagata i le oganuu, o omiga o le olaga i aso fai soo, o mea e faalavelaveina ai mai le lalolagi, ma le faapopoleina o i tatou ona o maʻi o le tino, ina ia faalotovaivai ai i tatou.
5 O lea la, e tatau ona tatou taumafai malosi ina ia tumau pea lo tatou maelega. E tāua tele mo i tatou ona ati aʻe lo ‘tatou uluaʻi alofa.’ E aofia ai le faitau e lē aunoa ma manatunatu loloto i le Afioga a le Atua, ma le faaaogā o sauniuniga uma faaleagaga o loo aumaia e Ieova e ala mai i le “auauna faamaoni ma le mafaufau.”—Faaa. 2:4; Mata. 24:45; Sala. 119:97.
6 E pei ona faamautinoa mai e valoaga a le Tusi Paia, ua matuā latalata mai lava le aso o Ieova mo ē amio leaga. (2 Pete. 2:3; 3:10) Ona ua tatou mautinoa o le a oo mai lea aso, seʻi o tatou taumafai malosi i le taimi nei e faatumau pea lo tatou maelega i le faiva, ma faia se sao atoatoa i le galuega talaʻi o le Malo ma le faia o isi ma soo lea o loo faagasolo nei i le lalolagi aoao!