UA FESILI MAI TALAVOU
O le ā e Manaʻomia Ona Ou Faia pe a Uma Ona Ou Papatiso?—Vaega 2: Ia Tumau Faamaoni
Ua faapea mai le Tusi Paia, “e lē taofia e Ieova se mea lelei mai iā i latou o savavali ma le faamaoni.” (Salamo 84:11) O le ā le uiga o le “savavali ma le faamaoni?” E uiga atu i le ola i se auala e faaalia atu ai, o loo e tausisi i lau tautoga na faia iā Ieova, ina ia tuuina atu oe lava iā te ia. (Failauga 5:4, 5) E faapefea ona e savali ma le faamaoni pe a uma ona e papatiso?
I lenei mataupu
Ia faaauau ona onosaʻi i faafitauli
Mau autū: “E tatau ona tatou sao atu i le Malo o le Atua i le tele o puapuaga.”—Galuega 14:22.
Lona uiga: O le mea moni, e feagai Kerisiano uma ma faafitauli i o latou olaga. O le avea ma Kerisiano, e te feagai ai ma faafitauli e pei o tauemuga ma teteega. E te fesagaʻia foʻi faafitauli tautupe ma maʻi, ia e aafia ai tagata uma.
Le mea e faatalitalia: E iai lava le taimi e suia ai le tulaga o mea i lou olaga, ma o nisi o na suiga atonu e te lē fiafia i ai. Ua faailoa mai e le Tusi Paia, e mafai ona tutupu mea leaga i tagata uma e tusa pe o se Kerisiano pe leai.—Failauga 9:11.
Mea e mafai ona e faia: Talu ai e te faatalitalia o le a e feagai ma faafitauli po o luʻi, e mafai la ona e nofosauni i le auala e fesagaʻia ai. Ia vaai i na luʻi o se avanoa e faamalosia ai lou faatuatua, ma e faalagolago atoatoa ai iā Ieova. (Iakopo 1:2, 3) O le faaauau ona e faia faapea, o le a mafai ai ona e tofo i le moni o upu a le aposetolo o Paulo e faapea: “O mea uma lava, ua ou maua le malosi mai i lē na foaʻi maia iā te aʻu le mana.”—Filipi 4:13.
TALA MONI. “E leʻi leva talu ona ou papatiso, ae tuua e oʻu tuagane le upu moni, mamaʻi oʻu mātua, ma mulimuli ane oʻu maʻi foʻi. Na ono faigofie ona ou faamaamulu ma lē amanaʻia loʻu tuuina atu, lea na ou tautō ai i le Atua e faamuamua le tapuaʻiga iā te ia i loʻu olaga. Ae o le mea moni, o loʻu tuuina atu, o le mea tonu lava lea na matuā fesoasoani iā te aʻu e fesagaʻia ai na luʻi.”—Karen.
Fesoasoani: Ia suʻesuʻe atili e faatatau iā Iosefa. E mafai ona e faitau e faatatau i lona olaga i le Kenese mataupu 37 ma le 39 seʻia oo i le 41. Mātau: O ā faafitauli e leʻi faatalitalia na ia fesagaʻia, ma na faapefea ona ia taulimaina? Na faapefea ona fesoasoani Ieova iā Iosefa?
Fesoasoani atili
Faitau:
“E Faapefea Ona Ou Feagai ma Tulaga e Mafatia Ai?”
Kopi:
Ia faaauau ona teena faaosoosoga
Mau autū: “Ua faaosoosoina tagata taʻitoʻatasi ona ua tosina ma maileia i ona lava tuʻinanau.”—Iakopo 1:14.
Lona uiga: E iai le taimi e faaosoosoina ai i tatou uma lava e o tatou tuʻinanauga. Pe afai e lē teena na tuʻinanauga, e ono iʻu la ina tatou faia le mea sesē.
Le mea e faatalitalia: Pe a uma ona e papatiso, o le a e feagai pea ma “tuʻinanauga o le tino.” (2 Peteru 2:18) E ono iʻu lava foʻi ina faaosoosoina oe e faia feusuaʻiga a o leʻi faaipoipo.
Mea e mafai ona e faia: Ia fai sau filifiliga i le taimi lenei a o leʻi faaosoosoina oe, ina ia aua neʻi faatagaina ou tuʻinanauga e te faia ai se mea sesē. Ia manatua, na fetalai Iesu: “E lē mafai ona pologa se tasi i ni matai se toʻalua.” (Mataio 6:24) E mafai ona e filifili po o ai lou matai. Tau ina ia e filifilia Ieova. E tusa lava po o le ā le malosi o se tuʻinanauga sesē, ae e mafai lava ona e filifili e aua le lolo atu i ai.—Kalatia 5:16.
Fesoasoani: Ia taumafai e iloa ou vaivaiga ma mea e te lelei ai. Ia faauō i tagata e mafai ona fesoasoani iā te oe e faaalia uiga lelei. Ia ʻalofia tagata, nofoaga, ma tulaga e faafaigatā ai mo oe ona faia le mea saʻo.—Salamo 26:4, 5.
Fesoasoani atili
Faitau:
“E Faapefea Ona Ou Teena Faaosoosoga?”
“How Can I Keep My Mind Off Sex?”
“E Faapefea Ona Ou Tetee Atu i Faaosoosoga Mai i Isi Talavou?”
Ia faaauau ona faatumauina lou maelega
Mau autū: “Ia faaalia e outou taʻitoʻatasi lenā lava filigā . . . e oo i le iʻuga, ina ia aua neʻi o outou paiē.”—Eperu 6:11, 12.
Lona uiga: O se tagata e lē uaʻi i sana galuega o fai, e faigofie lava ona faifaimālie ma iʻu atu lava ina paiē.
Le mea e faatalitalia: E mautinoa lou tiotio ma lou matuā maelega ina ua uma ona e papatiso, ona o le matuā malosi o lou alofa mo Ieova. Ae a o faagasolo taimi, atonu e faigatā ona e usitaʻi pea iā Ieova i vala uma o le olaga, ma o lenā mea e ono faavaivaia ai oe ma tau mou atu ai lou maelega.—Kalatia 5:7.
Mea e mafai ona e faia: Ia faaauau ona e faia le mea saʻo, e tusa lava pe umi se taimi e te lē manaʻo e faia faapea. (1 Korinito 9:27) I le taimi e tasi, ia faalatalata atu i lou Tamā i le lagi e ala i le taumafai e iloa lelei o ia, ma talanoa atu e lē aunoa iā te ia e ala i le tatalo. Ia faaauau foʻi ona atiaʻe ni faauōga māfana ma i latou e fiafia i le auaunaga iā Ieova.
Fesoasoani: Ia manatua e matuā pele oe iā Ieova, ma o loo ia nofosauni e fesoasoani mai. Pe afai e mou atu lou maelega mo sina taimi, aua e te manatu e lē o fiafia mai le finagalo o Ieova iā te oe. Ua faapea mai le Tusi Paia: “E na te avatu le malosi i lē ua vaivai ma faaatoatoaina le malosi o lē ua leai sona malosi.” (Isaia 40:29) E iai le taimi o le a ia faamanuia ai i au taumafaiga o loo fai ina ia toe maua lou maelega.
Fesoasoani atili
Faitau:
“Talavou—Ia Faaauau Ona Outou Galulue mo lo Outou Faaolataga”
“E Faapefea Ona Ou Maua le Olioli i le Tapuaʻiga i le Atua?”
Maimoa:
Manatu autū: Pe afai e te savali i le faamaoni, o le a e faafiafiaina ai le finagalo o Ieova! (Faataoto 27:11) E mautinoa le fiafia o Ieova pe afai e te filifili e aufaatasi ma ia, ma o le a ia foaʻi mai iā te oe mea uma e te manaʻomia ina ia teena ai osofaʻiga a Satani.