Fesoasoani ia Toe Tutū i o Tatou Vae

E iai taimi e lofitūina ai i tatou i omiga ma tofotofoga, ma tatou lagona ai le vaivai ma faigatā ai ona faaauau la tatou auaunaga iā Ieova. Ae e mafai ona faamalosia i tatou, pe a manatunatu loloto i faamatalaga mataʻina o le faaaliga a Esekielu o le toe faafoʻisiaga. Aiseā? E mafai ona tatou aʻoaʻoina mai i lenei valoaga, o le Atua o lē e iai le mana na toe faafoʻisia ai le ola i ivi ua matuā mamago, e mafai foʻi ona ia foaʻi mai iā i tatou le malosi manaʻomia e faafetaiaʻia ai faafitauli, e oo lava i faafitauli e sili ona ogaoga.—Faitau le Salamo 18:29; Fili. 4:13.

Atonu e tatou te manatua ai le perofeta o Mose o lē na soifua i le tele o senituri a o leʻi oo i aso o Esekielu, na ia taʻua e lē gata e iai iā Ieova le mana ae e iā te ia foʻi le faanaunauga e fesoasoani ai i ona tagata. Na tusi Mose: “O le Atua o le lafitaga mai anamuā, o loo i ou lalo ifo ona aao o le faavavau.” (Teu. 33:27) E mafai ona tatou mautinoa, pe a tatou liliu atu i lo tatou Atua i taimi o faigatā, o le a aapa mai aao alofa o Ieova e sii aʻe i tatou, ma fesoasoani iā i tatou ina ia toe tutū i o tatou vae.—Eseki. 37:10.