“Ivi Mamago” ma “Molimau e Toʻalua”​—O le ā le Fesootaʻiga?

NA FAATAUNUUINA i le 1919 ni valoaga se lua e fesootaʻi lelei: O le valoaga e faatatau i “ivi mamago” ma le valoaga i “molimau e toʻalua.” O le faaaliga i “ivi mamago” ua valoia ai se vaitaimi umi (na faaauau mo le tele o senituri) lea na faaiʻuina ina ua toe faafoʻisia le ola i se vaega toʻatele o tagata o le Atua. (Eseki. 37:2-4; Faaa. 11:1-3, 7-13) O le valoaga e faatatau i “molimau e toʻalua” ua faamatala ai se vaitaimi puupuu (na faataunuuina i le faaiʻuga o le 1914 seʻia oo i le amataga o le 1919) lea na faaiʻuina ina ua toe faafoʻisia le ola i se vaega toʻaitiiti o auauna a le Atua. O nei valoaga e lua ua faaata mai ai le toetū faafaatusa, ma na iai se faataunuuga faaonapōnei o nei valoaga i le 1919, ina ua faapogaia e Ieova ana auauna faauuina e “tutū i o latou vae,” ō ese mai i le saisaitia i Papelonia le Aai Tele, ma aufaatasi atu i le faapotopotoga ua faamamāina.—Eseki. 37:10.

Ae ia mātau, e iai se vala tāua e eseese ai le faataunuuga o nei valoaga e lua. O le valoaga i “ivi mamago” ua valoia ai le toe faafoʻisia o le ola i sui uma o le vaega totoe faauuina. Peitaʻi, o le valoaga i “molimau e toʻalua” ua valoia ai le toe faafoʻisia o le ola i nisi o sui o le vaega totoe faauuina a le Atua, o i latou na taʻimua i le faalapotopotoga ma na tofia e avea ma “pologa faamaoni ma le faautauta.”—Mata. 24:45; Faaa. 11:6.a

“Le Fanua Laugatasi ua Tumu i Ivi”—Eseki. 37:1

1. MAVAE 100 T.A.

   E mai i le senituri lona lua T.A. ma faasolo mai ai, na fasiotia faafaatusa le faapotopotoga o Kerisiano faauuina ma na tumu ai i “ivi” le “fanua laugatasi”

2. AMATAGA 1919

   1919: Na toe faafoʻisia le ola i “ivi mamago” ina ua faapogaia e Ieova le ʻaufaauuina uma e ō ese mai i Papelonia le Aai Tele, ma aufaatasi atu i le faapotopotoga ua faamamāina

“Molimau e Toʻalua”—Faaa. 11:3

1. FAAIʻUGA 1914

   talaʻi i “ʻie talatala”

   1914: Na talaʻi “molimau e toʻalua” i “ʻie talatala” mo le tolu ma le ʻafa tausaga. I le faaiʻuga o lenā vaitaimi, na fasiotia faafaatusa ai i laʻua

2. oti faafaatusa

3. AMATAGA 1919

   1919: Na toe faafoʻisia le ola i “molimau e toʻalua” ina ua tofia se vaega toʻaitiiti o uso faauuina o ē na taʻimua i le faalapotopotoga e avea ma “pologa faamaoni ma le faautauta”