Po o Soifua Moni Lava le Atua?
Tali masani:
◼ “E iai o ia i mea uma, i so o se mea. Ua pei o ia o le matagi.”
◼ “O ia o le poto po o se malosiaga e faigatā ona malamalama i ai.”
O ā fetalaiga a Iesu?
◼ “E tele mea e nonofo ai i le maota o loʻu Tamā.” (Ioane 14:2) I se uiga faafaatusa, na fetalai Iesu e faapea o loo afio le Atua i lona maota.
◼ “Ua ou sau mai le Tamā ma ua ou oo mai i le lalolagi. Ou te tuua foʻi le lalolagi ma ou alu atu i le Tamā.” (Ioane 16:28) Sa talitonu Iesu o loo soifua moni lava le Atua ma e alaala i se nofoaga patino.
E LEʻI faasino atu Iesu i le Atua o se malosiaga e lē mailoa. Nai lo lea, sa ia talanoa atu i le Atua ma tatalo atu iā te ia. Sa masani ona ia taʻu Ieova, o lona Tamā o i le lagi, o se taʻu e faaalia ai lona māfana tele i le Atua.—Ioane 8:19, 38, 54.
E moni e “leai lava se tasi ua vaai i le Atua” ma o le “Atua o le agaga.” (Ioane 1:18; 4:24) Ae lē faapea ai e leai sona tino. Ua faapea mai le Tusi Paia: “Afai e iai le tino faaletino, e iai foʻi le tino faaleagaga.” (1 Korinito 15:44) Pe iai se tino faaleagaga o Ieova?
Ioe. Ina ua toe faatūina Iesu, sa ia ‘ulu atu i le lagi lava ina ia tulaʻi o ia i luma o le Atua mo i tatou.’ (Eperu 9:24) E lua ni mea tāua e tatou te aʻoaʻoina mai ai e faatatau i le Atua. Muamua, e iai lona afioaga e afio ai. Lona lua, o loo soifua moni lava o ia ae e lē o se malosiaga e iai i mea uma i taimi uma.
Ae faapefea ona iai le mana i le Atua e puleaina ai mea e tutupu? E mafai e le Atua ona auina mai lona agaga paia, po o lona mana galue, i so o se nofoaga. E pei o se tamā o loo faaloloa atu lona lima e faamāfanafana ma faamalosia ai lana fanau, ua auina mai foʻi e le Atua lona agaga paia e faataunuuina ai ana fuafuaga.—Salamo 104:30; 139:7.
Ona o loo soifua moni lava le Atua, e iai foʻi ona uiga, ma mea e fiafia i ai ma lē fiafia i ai, ma e iai foʻi ma ona faalogona. O loo faamatala mai e le Tusi Paia le Atua, e alofa i ona tagata, e olioli i ana galuega, e ʻinoʻino i le ifo i tupua, ma e tigā lona finagalo ona o le amioleaga. (Kenese 6:6; Teuteronome 16:22; 1 Tupu 10:9; Salamo 104:31) O loo taʻua o ia i le 1 Timoteo 1:11 o le “Atua fiafia.” E lētioa a fetalai mai Iesu e mafai ona tatou aʻoaʻoina le alofa i lenei Atua ma o tatou loto atoa!—Mareko 12:30.a
[Faaopoopoga i lalo]
a Mo nisi faamatalaga atili i lenei mataupu, tagaʻi i le mataupu e 1 o le tusi O ā Aʻoaʻoga Moni a le Tusi Paia? lomia e Molimau a Ieova.
[Faamatalaga faaopoopo i le itulau 5]
E pei o se tamā o loo faaloloa atu lona lima, o loo auina mai e le Atua lona agaga paia e faataunuuina ai ana fuafuaga