Mfumbe ke gkɔmano la gkɛso nde na?

Lako iláá la nyoyi ke nd’eko, Yeso awambaki djambá ngo l’ambeki we nd’eko anei: Petelo, Jake, Yoane, la Andre. Nyombewoyɛ ilembetelo inanghɛnyɛ oyalelo we nd’eko lá mfu y’ekomo, ko nyombopola wopó ɔmɔtshi w’ekekete efula, ante: “Na loye solo mfumbe ke gkɔmano la gkɛso ke nkfumi ke nd’eko nyile lá djiko dj’ase olemo we nd’eko, dje ndjaapɛyɛka toma lá wíná we wɔlɔ?” (Mateo 24:3, 45; Marko 13:3, 4) Yeso nyɔkɔpaká nde nyɛnyɛ ambeki we nd’eko ante nde loye “nkfumi” k’iwɔko, angila anto wanɛ wangɔpɛyɛka ambeki we nd’eko toma t’edjimo, mpɔlɔmɔsi te ewo k’akambo we Ndjambe, l’etsho w’ekomo. Anto wanɛ wayalisá la dje ndjalá mfumbe ɛkɔ nde wa na?

Ewɔ nde iloyi y’akristo wanɛ wambokfutamá awuta. “Mfumbe” ɛkɔ ewɔ nde Iloyi Inalɔndjɛ ye Atemwe ye Yehova. Apɛyɛke ankambi ankina we Yehova toma t’edjimo lá wíná we wɔlɔ. Okongakiso ngo me mfumbe ɛkɔ dje mba “opiko we toma lá wíná we wɔlɔ.”​—Luka 12:42.

Nde nde lolenda ase mvulu ke Ndjambe. (1 Timɔte 3:15) Yeso atshikelaka mfumbe ɛkɔ odjito w’ekekete efula we ndendaka olemo wonakambema l’etenyi ke olonghanyelo we Yehova enalekɔ l’anɛ lá looko: olemo we nama gkete dje olonghanyelo ɔkɔ, nkɛndjɛ olemo we nsakola losango le wɔlɔ, la ntolakanyɛ iso akristo ma losamvɔ l’etshumano w’isoko. Ɛɛ, dje ntɔpɛyɛ gkete nɛ eso la djonyi lá wíná w’eso la djonyi, “mfumbe ke gkɔmano la gkɛsɔ” akapanyɛ toma t’edjimo ma losamvɔ l’ekanda wena okambakiso la wɔ l’olemo we nsakola losango, la ma losamvɔ le nsanghanyɛ ye tontshintshi la ye gkekete.

Mfumbe ɛkɔ alekɔ la gkɔmano l’elakanyelo we solo we Bible la l’olemo we nsakola losango le wɔlɔ; alekɔ ko la gkɛsɔ lá gkambo nalendana la nama gkete dje Kristo la djanya lá looko. (Elemo 10:42) Yehova asákola olemo we mfumbe ɛkɔ, gkambo oloyi w’Atemwe woyafule ngo mfula, la toma t’edjimo te mfumbe opoyɛnde toyaleke ngo ndeka.​—Izaya 60:22; 65:13.

• Yeso nyombilá na dje ndesɛka ambeki we nd’eko l’edjimo?

• Mfumbe ende la gkɔmano la gkɛsɔ wopo ɔkɔ nke?