WEKELO 54

“Mfumbe kɛ nkɔmano la nkɛsɔ” oyɛnde na edjinge onanghakande nge?

Edisiɔ wel'akishi

Yeso ndeke Owandji w’otshumano w’Akristo. (Ɛfɛsɛ 5:23) Lɔɔko kɛnɛ, má edjena kelekɔ́ la nde l’olongo, Yeso alɔmbɔla ambeki wande welá looko má lotshimbo lɔ ‘mfumbe kɛ nkɔmano la nkɛsɔ.’ (Wala Mateo 24:45.) Yeso nyɔmɛlɛ ndeke lɔsɔnisá “mfumbe” kɛkɔ, nde ɔpɛyɛka ndambo kɛ lowandji, koko nde ayalaka ladjɛ ntshikala ngo mfumbe kɛ Kristo edjinge nkambelaka wananyɔ wa Kristo. Olekɔ́ mfumbe kɛsɔ na? Wopo wɔkɔnge mfumbe kɛsɔ okotshɛnde ehomba wɛso?

1. Oye “mfumbe kɛ nkɔmano la nkɛsɔ” na?

Yehova angokambake mbala efula l’onto kana l’iloyi y’anto djɛ ndɔndjɛ owila wɔnde. (Malaki 2:7; Hebero 1:1) M’ɔkɔngɔ wɔ nyɔyi kɛ Yeso, apɔstɔlɔ la tokokolo telá Jerusalɛmɛ wawangaka ndɔndjɛ otshumano w’Akristo. (Elemo 15:2) Lɔɔko kɛnɛ, iloyi yɛ tokokolo t’etawɔ, Iloyi yɛ lɔndjɛ y’Ewakɛ wɛ Yehova, ndeke lɔtɔpɛyɛ nkete djɛ ndɛ djelá nyuma edjinge lɔlɔndjɛ olemo w’ipoposanyɛ. Iloyi yɛkɔ yɛsɔ ndeke etawɔ ‘mfumbe kɛ nkɔmano la nkɛsɔ, kɛ [Yeso] ndasɔnɛ.’ (Mateo 24:45a) Anto ankfumɔ walekɔ́ l’Iloyi yɛ lɔndjɛ walekɔ Akristo w’ankfutami w’avuta, iwɔ wakongela djɛ ntɔlɔndjɛ esanga la Yeso l’Onkfumi wɔnde wɔ l’olongo l’ekomo kɛ lowiko lɔwɔ lɔ lanɛ lá looko.

2. Nkete djɛkɔnge djɛ mfumbe kɛ nkɔmano ɔtɔpɛyɛkande?

Yeso atepelaka ante mfumbe kɛ nkɔmano kɛsɔ ‘angɔpɛyɛ winawɔ [Akristo] nkete djɛ ndɛ djɛwɔ lá winá wɛdje.’ (Mateo 24:45b) Etengo nkete djɛ ndɛ otokotshɛkawɔ djɛ ndjala la wolo edjinge la demba djɛ wɔlɔ, wop’ɔkɔmɔ ndeke, eleelo welá nyuma, nkɔpa ntepela ente, elakanyelo weposa m’Otepela wɔ Ndjambe ntɔpɛyɛka wolo w’oyɛso la djonyi djɛ ntshikala la nkɔmano le Yehova edjinge nkotshɛ́ olemo wɔ Yeso ndɔtɔpɛyɛ djɛ nkamba. (1 Timɔte 4:6) Iso mbaka nkete djɛ ndɛ djelá nyuma djɛsɔ lá nsanghanyɛ yel’otshumano, nsanghanyɛ yɛ nkekete kana yɛ daambi, l’enkanda wɛso edjinge lá avideo watokotshɛ́ djɛ mpakisola Bible, djɛ ndjewa ɛkɔpa kɛ Ndjambe la nkembɛ djokanelo djɛso lande.

TSHIMOLA

Lenda ladjikɛnge oyɛso la djonyi djɛ “mfumbe kɛ nkɔmano la nkɛsɔ”—ntepela ente, Iloyi yɛ lɔndjɛ.

Asango wambomamana: Ewakɛ wɛ Yehova wel’andja w’otondo nkilikaka ɛlɔndjɛlɔ k’owawɔ me Iloyi yɛ lɔndjɛ. 1. Nkfumbo kɛmɔtshi walenda video djɛ JW Teledifiziɔ. 2. Ewakɛ wɛ Yehova wemboyapɛyɛ l’ɛkɔpa, wingeyɛ kartɔ yɛ nkete djɛ djonyi l’otuka. 3. Ewakɛ wɛ Yehova epe wapoposanyɛ la prezantwara. 4. Lá losanghanyɛ lel’otshumano, ikokolo imɔtshi awala onkanda. — Iloyi yɛ lɔndjɛ mposɛka nkete djɛ ndɛ djɛ nyuma, ɛlɔndjɛlɔ, edjinge nkotshɛka Ewakɛ wɛ Yehova wel’andja w’otondo

3. Enkambi wɛ Yehova ladjɛ nonghanyema

Lá ɛlɔndjɛlɔ kɛ Yeso, Iloyi yɛ lɔndjɛ nonghanyɛka olemo w’Ewakɛ wɔ Yehova. Nkambo djɛsɔ mfɛnaka la kɛnɛ kenanghemaki le Akristo wa l’etsho wɛ ntondo. Lenda VIDEO.

VIDEO: Tolekɔ la djonyi dj’olonghanyelo ɔmɔtshi (9:23)

Wala 1 Kɔrɛtɔ 14:33, 40, ko kadjimola lá woopó wɔnɛ:

Wopo wɔkɔnge avɛrse wanɛ ɛnyɛwɔ djɛ Yehova nkɔpaka dj’Ewakɛ wɛnde nonghanyema?

4. Mfumbe kɛ nkɔmano nonghanyɛka olemo wɔso w’ipoposanyɛ

Olemo w’ipoposanyɛ woyalaka olemo wolekisá djonyi wokambisá Akristo wa l’etsho wɛ ntondo. Wala Elemo 8:14, 25, ko kadjimola lá weepó wɛnɛ:

L’anteyi k’Akristo wa l’etsho wɛ ntondo, anto wakɔna walɔndjɛki olemo w’ipoposanyɛ?
Kɛkɔnge kɛ Pɛtɛlɔ nya Djɔanɛ yananghe l’ɛlɔndjɛlɔ k’iyawa me winawɔ apɔstɔlɔ?

Olemo w’ipoposanyɛ wolekɔ olemo wɔ djonyi w’olonghanyema me Iloyi yɛ lɔndjɛ. Lenda VIDEO.

VIDEO: Walekaka ndapɛyɛ l’oloko ɔmɔ l’olemo w’ipoposanyɛ (1:37)

Yeso apikaka nghɔmɔ ɛnsɔsɔ lá djonyi djelekɔ́ l’olemo w’ipoposanyɛ. Wala Marko 13:10, ko kadjimola lá weepó wɛnɛ:

Ladjikɛnge olemo w’ipoposanyɛ oyɛwɔ djonyi le Iloyi yɛ lɔndjɛ?
Lamo oyɛso la djonyi “djɛ mfumbe kɛ nkɔmano la nkɛsɔ” djɛ nonghanyɛ olemo w’ipoposanyɛ wel’andja w’otondo?

5. Mfumbe kɛ nkɔmano ntɔpɛyɛka ɛlɔndjɛlɔ

Iloyi yɛ lɔndjɛ mpɛyɛka ɛlɔndjɛlɔ le Akristo ankfumɔ wel’andja w’otondo. Wopo wɔkɔnge Iloyi yɛ lɔndjɛ ewakawɔ ndɔsa akano? Tokoshishima kɛnɛ kenanghaki Iloyi yɛ lɔndjɛ y’Akristo yel’ɛtɛndɔ kɛ ntondo nkambo djɛsɔ. Wala Elemo 15:1, 2, ko kadjimola lá weepó wɛnɛ:

Nkambo djɛkɔnge djeposisá lɔpɔsɔ l’anteyɛ Akristo wal’ɛtɛndɔ kɛ ntondo?
Poolo, Barnabasɛ edjinge Akristo ankina iyatshu te anto wakɔna djɛ ntowa nkando l’okakasano wɔwɔ?

Wala Elemo 15:12-18, 23-29, ko kadjimola lá woopó wɔnɛ:

Lá ntondo kɛ ndɔsa nkano, kɛkɔnge kenanghisá ase Iloyi yɛ lɔndjɛ yel’ɛtɛndɔ kɛ ntondo djɛ mba ɛlɔndjɛlɔ kɛ Ndjambe djɛ mba nkando lá nkambo djɛsɔ?—Lenda vɛrse 12, 15, edjinge 28.

Wala Elemo 15:30, 31 edjinge 116:4, 5, ko kadjimola lá weepó wɛnɛ:

Kɛkɔnge kenanghisá Akristo wal’etsho wɛ ntondo winá w’iyawa ɛlɔndjɛlɔ me Iloyi yɛ lɔndjɛ?
Wopo wɔkɔnge wɔ Yehova ndatshɔkɔla ntshunamo djɛwɔ?

Wala 2 Timɔte 3:16 edjinge Djakɔbɔ 1:5, ko kadjimola lá woopó wɔnɛ:

Lɔɔko kɛnɛ, Iloyi yɛ lɔndjɛ ohonakawɔ ɛlɔndjɛlɔ mámpe winá wɔsawɔ akano?

ANTO EFULA NTEPELAKA AMBƆ: “Ntsha ongawolake ase Iloyi yɛ londjɛ, mbɔ okilikɛnde anto.”

Kɛkɔnge kɛnyɛ ente Yeso ndeke lɔlɔndjɛ Iloyi yɛ lɔndjɛ?

LÁ YOPASE

Iloyi yɛ lɔndjɛ nde “mfumbe kɛ nkɔmano la nkɛsɔ” kɛ Kristo ndasɔnɛ. Mfumbe kɛkɔ ndeke lɔpɛyɛ Akristo wel’andja w’otondo ɛlɔndjɛlɔ edjinge nkete djɛ ndɛ djelá nyuma.