Djakɔbɔ ambowa etenyi k’okitshɔ

Isaka ayalaka l’ɛnɔnyi 40 winá wɔ ndatshuke Ɛrɛbɛka. Nde ɔkɔpaki lombombe. L’ilá k’etsho, walowotaka wana ape, djása djɛ ampame toko.

Otango djiina djɛnde nde Esawo edjinge ankfunɛnde Djakɔbɔ. Esawo akɔpaki mpeeta edjinge ayalaki mbengenga kɛ koo. Koko Djakɔbɔ akɔpaki ntshikala lá mbandja.

L’etsho wɛsɔ, wɔna w’otango wɔ mpame ndeke yapɛyɛka etatshi kɛ looko kelekaki ole djɛlɔ djɛ nkfumbo ntsha papa ambovɔ. Nkete djɛsɔ ndeke yetaka etenyi k’okitshɔ. Lá nkfumbo kɛ Isaka, etenyi k’okitshɔ kalendanaki lonkina la lomo lɔ mba odjito l’ekotshamelo k’alaka wa Yehova ndalake Abrahama. Esawo atalekaki ndjila alaka wasɔ yimba, koko Djakɔbɔ ewaki ante wáyalaki djonyi efula.

Lofu lɔmɔtshi, Esawo akalɔka má lembá ko ambɔtɛka efula. Nde okaka nsolo mpimbo kɛ nkete djɛ ndɛ djɛ Djakɔbɔ ndakatshɛka edjinge atepelaka ante: ‘Lambɔtɛka! Ɔmpɛyɛ ndambo kɛ osawo wɔ nkola nkola!’ Djakɔbɔ oshimelaka ante: ‘Lɔkɔpɛyɛ, koko ngo ombawola mpɛyɛ lemi etenyi kɛko k’okitshɔ.’ Esawo atepelaka ante: ‘Lemi mpalekɔ la djonyi dj’etenyi k’okitshɔ! Wɛ nkoka ndɔsa. Ɔmpɛyɛ ngo mma djɛ ndɛ.’ Okanela ente nkambo djɛ Esawo ndananghe ntshɔ djalaka djɛ balo? Lako. Esawo atshutshɛka ekete kɛ ntsho efula, ngo l’ɔtɛ wɔ dɔnga dj’osawo.

Winá wɔ Isaka ndatshunde efula, winá w’okokaka wɔ nde nsakola wɔnande w’otango. Koko Ɛrɛbɛka akotshɛ́ka Djakɔbɔ ankfunɛ Esawo, djɛ nde mba osako wɔsɔ. Winá wɔ Esawo ndewe nkambo ntshɔ, nde okaka nkɛlɛ k’efula ole akɔpaka ndjaka ankfunɛnde loyalaki djasá djɛnde. Isaka nya Ɛrɛbɛka wakɔpaka mbikɛ Djakɔbɔ, djɛko ndeke iyoshimela ambɔ: ‘Tshɔka tokintasɛ nya Labanɛ kɛ nyɔmpame kɛko tii winá wɔ nkɛlɛ kɛ Esawo yongokita.’ Djakɔbɔ okaka dako djɛ ambotshi wande ko alotaka djɛ mbikɛ lowiko lɔnde.