Yeso ambokfundola Lazaro

Yeso ayalaka la tolongo tosato tɔ ma ma tintasɛki lá Betani. Tolongo tɔkɔ nde: Lazaro nya ankaana yɛnde ipe, Mariya nya Mata. Lofu lɔmɔtshi, winá wɔ Yeso ndayalaka lá wedji ɔmɔtshi wɔ Jɔrdanɛ, Mariya nya Mata wotomelaka djoyi ambɔ: ‘Lazaro alekɔ l’olando efula. Tɔmbɔkɔwɔnda yɛka lankeke!’ Koko Yeso atatshɔ mbala kɛkɔ kɛmɔ. Nde akongaka m’ɔkɔngɔ w’etsho epe, ko masɔ ashimelaka ambeki wande ante: ‘Nyontshɔ tombotshɔ tá Betani. Lazaro ambetama ilɔ, ntatshu ntowetshola.’ Ambeki woshimelaka ambɔ: ‘Ntsha Lazaro ambetama, kɛsɔ kengookotshɛ djɛ nde ndjoka wɔlɔ.’ Ko Yeso aapakisolaka ante: ‘Lazaro ambovɔ.’

Winá wɔ Yeso ndatokoma lá Betani, ko Lazaro amboshiyɛ nangha etsho ɛnɛyi lá nketa. Anto efula wayɛka ndolenda Mariya nya Mata djɛ ndaakembɛ. Winá wɔ Mata ndoke ante Yeso amboyɛ, nde atshɔka ipa la ntshatshimba ntopomana nyande. Nde oshimelaka ante: ‘Nkfumi, otayalɛ hanɛ, ntshimi nkaana kɛmi atasamba vɔ.’ Yeso okadjimolaka ante: ‘Nkaana kɛko angokfundɔ. Ongawolake nkambo djɛsɔ Mata?’ Nde atepelaka ante: ‘Lemi ndjawolaka ente nde angookfundɔ lá winá w’ekfundwelo.’ Yeso oshimelaka ante: ‘Lemi ndekɔ ekfundwelo la lowiko.’

Masɔ Mata atshɔka ntoshimela Mariya ante: ‘Yeso amboyɛ.’ Mariya alotaka te Yeso edjinge oloyi w’anto wookilikaka. Akfusamaka awɔngɔ l’ekolo wɛ Yeso, edjinge alelaki ngo ndela. Atepelaka ante: ‘Nkfumi, otayalɛ hanɛ, ntshimi nkaana kɛso alekɔ ngo la lowiko!’ Yeso ɛnaka yɛnyi yefula iyalaki lande ko awangaka ndela edjinge nde. Winá wɔ oloyi w’anto yɔɔwɛnyi alela, watepelaka ambɔ: ‘Onɛ ngo Yeso ndokaka Lazaro ngandji!’ Koko anto amɔtshi walawopolaki ambɔ: ‘Ladjikɛnge ndotawikɛ ilongo yɛnde?’ Yeso ndongonangha nge?

Yeso atshɔka tá nketa, edjinge ve dj’ekekete djipaka wiso wɔ nketa kɛkɔ. Nde atepelaka ante: ‘Nyimɛ ve.’ Mata atepelaka ante: ‘Ambonangha etsho ɛnɛyi! Demba djɛnde mbotateyɛ mpɔnda.’ Kaanga yayale nghɔsɔ, w’imɛka ve, edjinge Yeso alɔmbaka ante: ‘Papa, lambɔkɔpɛyɛ lokasa mande ongondjokake. Lemi ndjewaka ente ongondjokake winá enkfumɔ, koko ntepela la djoyi djɛ wolo djɛ oloyi w’anto wɔnɛ ndjewa ambɔ wɛ ndeke lontomisá.’ Masɔ nde aweelaka la djoyi djɛ wolo ante: ‘Lazaro, posa!’ Nkambo mɔtshi djɛ nkamɔ nanghemaka: Lazaro aposaka má nketa, ndjingama la ntshendja djɛ lɛpɛ lɛpɛ. Yeso atepelaka ante: ‘Nyotshungole edjinge nyotshike atshu.’

Anto efula wɛnisá nkambo ntshɔ wayalaka la djawo te Yeso. Koko anto amɔtshi watshɔka ntoshimela Afarisɛ. Ngo masɔ, Afarisɛ wahonaka ndjaka Yeso nya Lazaro. Judasɛ Iskariyɔtɛ, ɔmɔtshi m’anteyi kɛ apɔstɔlɔ 12, atshɔka lá wisisá ntɛnana nya Afarisɛ ko aawopolaka ante: ‘Nyɔnghɔmpɛyɛ mfalanga imangha ntsha lambonyokotshɛ djɛ nyo mvunda Yeso?’ Wokanaka djɛ ndɔɔpɛyɛ mfalanga yɛ kɛngɛlɛ 30, edjinge Judasɛ awangaka mpona mbamba kɛ nkapa Yeso le Afarisɛ.