Awola ngandji kɛ Yehova

1. Lamo ngolalambola le Yehova? (Lenda ntshango.)

OVUNGƆ winá wɔ ngolalambola le Yehova? Ɔsaka nkano djɛsɔ mande ekaka djɛ ndowewa la ndɔkɔpa. Olakaka djɛ mpetshɛ ɛkɔpa kɛnde l’edjena kɛ ntondo lá lowiko lɔko la djɛ nkindjɛ ndɔkɔpa l’oloko, anyima, yimba, ole la wolo wɔko onkfumɔ. (Mar. 12:30) Ngo masɔ, ngandji kɛko te nde kefulaka la kekembaka ndii. Ngongokadjimola ente mo ntsha onto ambokopola ante: “Olekɔ l’eshikikelo ente ɔngɔkɔpake nsɔsɔlɔ Yehova?” Ipa nkakanyɛ, ongokadjimola ente: “Langɔɔkɔpake efula ndeka onto kana ekete kenkfumɔ!”

2-3. Yehova ɔkɔpande iso ndjawola nge, iya ɛnaso lɔ nge lá djamba djɛnɛ? (Jɛrɛmi 31:3)

² Ko iya ntsha onto ambokopola ante: “Olekɔ l’eshikikelo ente nsɔsɔlɔ Yehova nkɔkɔpaka?” Okoka nkakanyɛ, kana nkanela ente opalekɔ onto wɔ wɔlɔ djɛ nde nkɔkɔpa. Nkaana kɛmɔtshi kɛnisá ndjolo efula m’ɔlɛngɛ wɔnde atepela ante: “Linko ndjewa ente nkɔpa Yehova. Mpahame nkambo djɛsɔ. Woopó wolawopolami winá la winá nde: Yehova angɔkɔpake?” Iya Yehova olawokande nsɔsɔlɔ ngete nge lá nkambo djɛko?

³ Yehova nkɔpaka wɛ ndáshikikɛ ente akɔkɔpa. (Wala Jɛrɛmi 31:3.) Nkambo djɛ nsɔsɔlɔ nde Yehova ndeke lokosepisá le nde. La winá wɔ ngolalambola le nde la ngalongola batisimo, owaka ekete kɛ ntsho efula—ngandji kɛnde kɛ nkɔmano. Ngandji kɛ nkɔmano kɛsɔ oyɛwɔ nde omalemelo wetshinda. Kengootshindake djɛ ndɔsa enkambi wɛnde wɛ nkɔmano, ngole wɛ, ete ngo ‘ekete kɛnde kɛ ntsho.’ (Mal. 3:17, nɔtɛ.) Yehova nkɔpaka wɛ ndjala l’eshikikelo ente angɔkɔkɔpake ete ngo ɔpɔstɔlɔ Poolo. Poolo afunaka l’eshikikelo ante: ‘Ladjikɛnde ndekɔ l’eshikikelo ente ayale nyɔyi, ayale lowiko, ayale andjelo, ayale guvɛrnɛma, ayale akambo wa winá wɔsɔ, ayale akambo wayaye, ayale wolo, ayale losango, ayale ngunda, ayale ekete ketongamisá, lako ekete kengokoka ntokapola la ngandji kɛ Ndjambe.’ (Ɔrɔ. 8:38, 39) Lá djamba djɛnɛ, tongotepela lamo oyɛso ladjɛ nkembɛ djawo djɛso lá ngandji ketoka Yehova ole kɛnɛ kengotokotshɛ́ djɛ nangha nkambo djɛsɔ.

LAMO OYƐWƆ DJONYI NDJAWOLA NGANDJI KƐ YEHOVA

4. Okokaso nana la topo tɔ mayɛlɛ tɔ Satana ngete nge?

⁴ Nkama tombawola ngandji kɛ Yehova, tongopika bongo lá ‘nanghedji djɛ mayɛlɛ’ djɛ Satana. (Ɛfɛ. 6:11) Satana angonangha kenkfumɔ kokokande nangha djɛ ntoshimba djɛ nkambela Yehova. Yopo imɔtshi yɛ mayɛlɛ ikamba la Satana nde, ntonghanyɛ Yehova ante apatɔkɔpɛ. Ewa ente Satana nyohonaka ngo mbamba. Angotonanyɛke winá woyɛso wɔdju—nkoka ndjala wotshimbaso yimba má akambo watokomelisá, má ekakasano wɛ winá wɔsɔ, kana má ekiyano w’etsho weyaye. (Woo. 24:10) Satana alekɔ ete ngo kimbwe kelosá kehona onto wɔ ndɛ. Djɛko ndeke, nde angowake mbamba kɛ ntodjimba winá woyɛso l’ekiyano. Koko ntsha tombokembɛ djawo djɛso ente Yehova ntɔkɔpaka, tɔngɔlɔta ɛlɔtɔ wɛ mbandji djɛ ‘nana’ la Satana ole la topo tɔnde tɔ mayɛlɛ.—1 Pɛ. 5:8, 9; Dja. 4:7.

5. Lamo oyɛwɔ ntshina ndjoka ente Yehova ntɔkɔpaka la ntɔsaka l’odjito?

⁵ Nkama tombawola ngandji kɛ Yehova, tongoyala imama la nde. Tokolenda lamo otepelaso nghɔsɔ. Yehova atotongaka la mposɛ kɛ nkɔpa la kɛ nkɔpama. Winá wɔkɔpaso anto, anto koko wangɔtɔkɔpa. Ntsha tɛna ente Yehova atɔkɔpa, iso koko tɔngɔɔkɔpa. (1 Dj. 4:19) Winá w’ofudjɛso ngandji kɛso te nde, nde koko angetela ntɔkɔpa. Bible ntoshimela papoo ante: ‘Nyɔsɛmɛlɛ te Ndjambe, ko nde angɔsɛmɛla le nyo.’ (Dja. 4:8) Okokaso nkembɛ djawo djɛso ente Yehova ntɔkɔpaka ngete mo?

EKETE KƐKƆNGE KENGOTOKOTSHƐ DJƐ NDJAWOLA NGANDJI KƐ YEHOVA?

6. Djɛ ndjawola ngandji kɛ Yehova, oyɛso ladjɛ ndɔmba nge?

⁶ Tepela nkambo kɔɔ la yala l’otshilo lá ndɔmbɔ yɛko. (Luka 18:1; Ɔrɔ. 12:12) Lɔmba Yehova mbala efula lá lofu—ntsha nkokaka—djɛ nde nkokotshɛ́ djɛ wɛ ndáwɛna ete ngo ɔkɛnande. Nsɔsɔlɔ, ntsha oloko wɔso wɔtɔpɛla lá nkambo mɔtshi, angoyala wolo ndjawola ente Yehova atɔkɔpa. Vungɔ ente Yehova ndeka oloko wɔko ekekete. (1 Dj. 3:19, 20) Akewa wɛ wɔlɔ efula ndeka wopo woyawewɛ, ɛna kɛnɛ kɛ ngopakoke nyɛna. (1 Sa. 16:7; 2 Ɛk. 6:30) Djɛko ndeke tokakanyɛke djɛ ‘ndoshimela’ wopo wokɛ, má ndɔlɔmba djɛ nde nkokotshɛ́ djɛ ndjawola ngandji kɛnde. (Yee. 62:8) M’ɔkɔngɔ wɔ ndɔmba, alekɔ djonyi nangha akambo walɔnda wanɛ.

7-8. Wopo wɔkɔnge onkanda wɔ Teembo otoshikikɛwɔ ente Yehova ntɔkɔpaka?

⁷ Awola kɛnɛ kɛ Yehova otepelande. Atshindaka amfunyi wa Bible djɛ mfuna wopo wolɛnde nsɔsɔlɔ. Tokolenda wopo wɔ Davidɛ ndokaka lá nkambo djɛ Yehova, winá wɔ ndafune ante: ‘Yehova alekɔ entshupa nya anto walekɔ́ l’eloko wembatshɛ; nde mbikɛka anto walekɔ la okiyano lá yimba.’ (Yee. 34:18, nɔtɛ.) Winá wotshimbɛ yimba l’okiyano, okoka nyɛna ete ngo olekɔ nghɔmɛlɛ. Koko Yehova ndakaka ante lá winá wɛsɔ alekɔ entshupa djɛ nkokotshɛ́, mande ewa ante olekɔ la djonyi dj’okotshɔ wɔnde. Lá yeembo inkina, Davidɛ atshumbaka ante: ‘Ila wisɔyi wami lá iteka yɛko yɛ loposo lɔ nyama.’ (Yee. 56:8) Yehova nyɛnaka winá wolelɛ. Nde nkiyanaka nkambo djɛko efula ole wopo wokɛ. Tokoka ntepela ente, angolongeyɛke wisɔyi wako la walekɔ ohomba le nde, ete ngo washi wa ntshitshi l’iteka yɛ loposo lɔ nyama yɛ mpeetshi. Towala lá Yeembo 39:3 nghɔnɛ: ‘Wɛ [Yehova] ndjewaka wɔlɔ wɔlɔ mboka yɛmi inkfumɔ.’ Yehova ndjewaka mboka yɛko inkfumɔ, koko ndjilaka yimba ngo l’akambo wa wɔlɔ wonanghɛ. (Heb. 6:10) Ladjikɛnge? Ladjikɛnde angɔsake l’odjito welo enkfumɔ w’ilɛ djɛ ndosasangɛ.a

⁸ Má mbamba k’avɛrse wakembɛ wanɛ, alekɔ ngo ngete Yehova atoshimela ante: “Nkɔpa wɛ ndjewa ente langɔkɔkɔpake efula la langokiyanake nkambo djɛko.” Koko ete ngo sɛnisá má djiko, Satana ntonghanyeyɛka Yehova ante apatɔkɔpɛ. Djɛko ndeke ntsha ohama djɛ ngandji kɛ Yehova, emala ndambo ko lokawopole ente: ‘Monghawola na—‘papa k’ongolo’ ndo koko “Ndjambe kɛ nsɔsɔlɔ”?’—Dj. 8:44; Yee. 31:5.

9. Lamo oshikikɛ ente Yehova ndjokaka anto wɔkɔpa ngandji? (Eposelo 20:5, 6)

⁹ Kanela wopo wɔ Yehova elolande la ngandji kowokaso. Tokolenda kɛnɛ kɛ Yehova ndashimela Mɔsɛ la wana w’Isariyɛlɛ. (Wala Eposelo 20:5, 6.) Yehova ndakaka ante angokindjɛ nyɛnyɛ ngandji kɛ nkɔmano le anto wɔkɔpa. Etepela wɛsɔ wetoshikikɛ ente Ndjambe kɛso kɛ nkɔmano angɛnyɛ onto onkfumɔ wɔkɔpa ngandji kɛ nkɔmano. (Nɛh. 1:5) Ntsha olekɔ la djonyi djɛ ndjewa ente Yehova nkɔkɔpaka, kolawopola ente, ‘Linko nkɔpaka Yehova?’ Tɔnɔla lá nkambo djɛnɛ: Ntsha ɔngɔkɔpake la ongonanghake la wolo djɛ ndosasangɛ, mbɔ yala l’eshikikelo ente Ndjambe angɔkɔkɔpake. (Dan. 9:4; 1 Kɔ. 8:3) Lá lɛdji lɔmɔtshi, ntsha opahame ngandji kokɛ Yehova, iya lamo ohamɛ ngandji kokokande? Okoka ndjala l’eshikikelo ente nde nkɔkɔpaka winá enkfumɔ, la apakokadjɛki kawo.

10-11. Yehova ɔkɔpande wɛ ndɔsa oshinga wɔ mbendo ngete nge? (Ngalatiya 2:20)

¹⁰ Tɔnɔla l’oshinga wɔ mbendo. Olambo w’oshinga wɔ mbendo wɔ Yeso Kristo wolekɔ opapɛyɛ w’ekekete wɔ Yehova ndapɛyɛ anto. (Dj. 3:16) Opapɛyɛ wɔsɔ yafutama nde lá nkambo djɛko? Ee! Teke tokolenda kɛnɛ kekomelisá ɔpɔstɔlɔ Poolo. Vungɔ ente ananghaka mpekanto yɛ nkekete efula lá ntondo kɛ nkoma Okristo, la ayalaka ladjɛ nkindjɛ nana la wɛdju wɛnde. (Ɔrɔ. 7:24, 25; 1 Ti. 1:12-14) Koko akakatelaka oshinga wɔ mbendo ete ngo opapɛyɛ wɔnde. (Wala Ngalatiya 2:20.) Ewa ente Yehova atshindaka Poolo la nyuma k’ekina djɛ mfuna etepela wɛsɔ. Akambo ankfumɔ walekɔ lá Bible wafunamaka djɛ ntolakanyɛ. (Ɔrɔ. 15:4) Etepela wɛ Poolo wɛtɛnyɛ wopo wɔ Yehova ɔkɔpande wɛ ndɔsa oshinga wɔ mbendo—ntepela ente ndakofutela nde wɛ. Nkama ɔmbɔsa oshinga wɔ mbendo lá wopo wɔsɔ, ongoyala l’eshikikelo ente Yehova nkɔkɔpaka.

¹¹ Djedjɛ ndaka pɔnda le Yehova la wopo wɔ ndatome Yeso lá looko djɛ ndotovela. Elonga kenkina kɛ Yeso ndaye lá looko nde, ndoshimela anto nsɔsɔlɔ lá nkambo djɛ Ndjambe. (Dj. 18:37) Nsɔsɔlɔ kɛmɔtshi nde: Ngandji kɛ Yehova okande wana wande.

WOPO WƆ YESO OTOKOTSHƐ́NDE DJƐ NDJAWOLA NGANDJI KƐ YEHOVA

12. Lamo olɛso ladjɛ ndjawola kɛnɛ kɛ Yeso ndatepela djɛ Yehova?

¹² Winá wɔ ndayalaka lá looko, Yeso ɛnyɛka wopo wole Yehova. (Luka 10:22) Tolekɔ la donga efula djɛ ndjawola kɛnɛ kɛ Yeso ndatepela djɛ Yehova. Yeso intasɛka l’ompandju wɔ Yehova l’olongo ilá efula lá ntondo kɛ nde ndjɛ lá looko. (Kɔl. 1:15) Má kɛnɛ kɛ ndeke la kɛ ndɛnyi, Yeso ewaki wopo wɔ Yehova ɔkɔpakande wana wande wa nkɔmano. Wopo wɔkɔnge Yeso okotshɛ́nde anto ankina djɛ ndjawola ngandji kɛ Ndjambe?

13. Wopo wɔkɔnge Yeso ɔkɔpande iso ndɔsa Papa kɛnde?

¹³ Yeso nkɔpaka iso ndɔsa Yehova ngete nde ɔwɔsande. Lá Evanjilio, Yeso eta Yehova “Papa” mbala ndekana 160. La winá wɔ ndatepelaka nya ambeki wande, owetaki ante ‘Papa kɛnyo’ kana ‘Papa kɛnyo kɛ l’olongo.’ (Mat. 5:16; 6:26) Nɔtɛ kɛ wekelo kɛ Mateo 5:16 ketepela nghɔnɛ: ‘Enkambi wɛ Ndjambe efula wakambaki la wetaki Yehova nkombo yɛ nkopo, ete ngo ‘Kanga-Nkfulu-Inkfumɔ,’ ‘Lapamela,’ ole ‘Ontongi w’Ekekete,’ koko Yeso owetaki mbala efula la itepela yɛ wɔdju, yɛ anto yewaka wɔlɔ: ‘Papa’ djɛ nyɛnyɛ djokanelo dekɔ l’anteyi kɛ Ndjambe l’enkambi wɛnde.’ Toka papoo ente, Yeso nkɔpaka iso ndɔsa Yehova ete ngo nde ɔwɔsande—ndaka Papa kɛ ngandji, kɔsa wana wande l’odjito. Nyontshɔ tokolenda ndjɔmbɔmba ikambisá la Yeso l’itepela “Papa.”

14. Wopo wɔkɔnge Yeso ndɛnyɛ ante onto onkfumɔ alekɔ la ntshina lá wiso wa Papa kɛso kɛ l’olongo? (Mateo 10:29-31) (Lenda ntshango.)

¹⁴ Ntondo ntondo, tokolenda etepela wɛ Yeso wotanaso lá Mateo 10:29-31. (Wala.) Ntshɔlɛ olɛwɔ nde tofulu tɔ daambi topakoke nkɔpa kana nkambela Yehova. Koko Papa kɛnyo ndɔsaka la ntshina kaanga ɛnsɔlɛ kɛ totoko la ndjewaka edjena kɔkfɔnde. Ntshande nyo enkambi wɛnde wɛ nkɔmano wɔkɔpa la wokambela, apakoke nyɔsa la ntshina? La nkilika etepela wɛsɔ ‘kaanga afo wanyo wa l’ɔtɛ mbalemaka.’ Nɔtɛ kɛ wekelo kɛ versɛ 30 ketepela nghɔnɛ: ‘Wopo wewa Yehova ikakambo inkfumɔ wotoshikikɛ ente ila ombeki onkfumɔ wɔ Kristo yimba.’ Lá nsɔsɔlɔ, Yeso nkɔpaka dj’iso ndjawola ente tolekɔ la ntshina le Papa kɛso kɛ l’olongo.

15. Kɛkɔnge kekolakanyɛ etepela wɛ Yeso wɛ Djɔanɛ 6:44 lá nkambo djɛ Papa kɛso kɛ l’olongo?

¹⁵ Winá wɔsɔ, tokolenda ndjɔmbɔmba k’ape kɛ Yeso ndakambe l’itepala ‘Papa.’ (Wala Djɔanɛ 6:44.) Papa kɛnyo kɛ l’olongo anyosepaka onto l’onto lá nsɔsɔlɔ la ngandji. Lamo ndakosepe? Mande ɛnaka wekeka wa wɔlɔ le wɛ. (Ele. 13:48) Nɔtɛ kɛ wekelo kɛ Djɔanɛ 6:44 ketepela ente Yeso akanelaka mbala imɔtshi etepela wɛ Jɛrɛmi wɛ vɛrse djɔsamisa ɔtɛ wɔ djamba djɛnɛ: ‘Nkosepaka le lemi má ngandji kɛ nkɔmano [kana, nkindjɛka nkɛnyɛ ngandji kɛ nkɔmano].’ (Jɛr. 31:3; nɔtɛ; ɛdjɛ la Ozeya 11:4.) Kanela kɛnɛ kesakisola nkambo djɛsɔ. Papa kɛso kɛ l’olongo akindjɛ nyɛna lewɛ akambo wa wɔlɔ wa nghopakoke nyɛna.

16. a) Kɛkɔnge kɛ Yeso ndatoshimela, ko lamo olɛso ladjɛ ndowawola? b) Okokɛ nkembɛ djawo djɛko ente Yehova alekɔ Papa kolɛso la djonyi ngete mo? (Lenda ipapango “Papa kɛso kolɛso la djonyi isankfumɔ.”)

¹⁶ Má ntɛnyɛ ante Yehova alekɔ Papa kɛso, Yeso atoshimela lá wopo ɔmɔtshi ante: “Yehova apalekɔ ngo Papa kɛmi toko; koko alekɔ ole Papa kɛnyo. Lamonyoshimela ente anyɔkɔpa Ia ila onto l’onto l’anteyi kɛnyo yimba efula.” Ntsha winá ɛmɔtshi opalekɔ l’eshikikelo ente Yehova akɔkɔpa, emala ndambo ko lokawopole ente: ‘Mpakoke ndjilela etepela wɛ Yeso kanga lewa Papa kɛso wɔlɔ efula ole lotepela winá onkfumɔ nsɔsɔlɔ oloko?’—1 Pɛ. 2:22.

KINDJƐ NKEMBƐ DJAWO DJƐKO

17. Lamo olɛso ladjɛ nkindjɛ ndjala l’eshikikelo ente Yehova ntɔkɔpaka?

¹⁷ Tokindjɛ ndjala l’eshikikelo ente Yehova ntɔkɔpaka. Ete ngo sɛnisá má djiko, Satana ontonyi wɔso wɔ mayɛlɛ, apangotshika ntilela enkeka djɛ nkambela Yehova. Djɛ ntɛkɛ nkano djɛso, Satana akindjɛ nangha la wolo djɛ ntawoyɛ ante Yehova apatɔkɔpɛ. Totawolake Satana ntodjimba!—Djɔ. 27:5.

18. Okokaso nkembɛ wekamo wɔso la ngandji kɛ Yehova ngete mo?

¹⁸ Djɛ nkembɛ wɛkamo wɔko lá ngandji kɛ Yehova, yala l’otshilo lá lɔlɔmbɔ djɛ nde nkokotshɛ́ djɛ wɛ ndáwɛna ete ngo ɔkɛnande. Tɔnɔla lá wopo wɔ amfunyi yɛ Bible yatepela djɛ ngandji ketoka Ndjambe. Vungɔ ente Yehova angɔkɔpa winá enkfumɔ onto w’ɔkɔpa. Tɔnɔla lamo oyɛ ladjɛ ndɔsa oshinga wɔ mbendo ete ngo opapɛyɛ wɔ ndakɔpɛyɛ. Awola ente Yehova alekɔ Papa kɛko kɛ l’olongo ete ngo Yeso ndatepela. Djɛko ndeke ntsha onto ambokopola ante: “Olekɔ l’eshikikelo ente Yehova akɔkɔpa?” ongokadjimola l’eshikikelo kenkfumɔ ente: “Ee, angɔnkɔpake! La nangha kenkfumɔ kokokami nangha djɛ ndɔwɛnyɛ ngandji kowokami lofu lonkfumɔ!”