Ngandji kɛ Yehova ntshikalaka etshinda

1-2. Akristo efula opomanawɔ l’ekakasano wɛkɔnge?

TƆKƆSA ndjɔmbɔmba kɛ masuwa kelekɔ l’anteyi kɛ ndjale winá wɔ lofunge l’ekekete. Anyɛnghu wa nkekete waminyɛminyɛ masuwa, wosangola tá djiko la wokitshɛ́ t’anse. Ntsha onto apakitshisa loongo l’ɛkɔngɔ, masuwa nkoka ntshɔ ta idjena inkfumɔ yotoma anyɛnghu. Loongo longokotshɛ masuwa djɛ nshikimala la djɛ nsamba ndɛngalɛnga la lofunge l’ekekete lɔsɔ.

² Winá wopomanaso la okakasano w’ekekete, tokoka ndjala ete ngo masuwa kɛsɔ. Yimba yɛko nkoka mpanda tá djiko la nkita t’anse. Lofu lɔnɛ okoka ndjala l’eshikikelo lá ngandji la lá osukɔ wɔ Yehova; lofu lonkina okoka ndáwopola ntsha ɛna kɛnɛ k’okfulumeyɛ. (Yee. 10:1; 13:1) Ilongo yɛko imɔtshi nkoka nkoshimela etepela wekembɛ, ko okoka ndjoka wɔlɔ etsho ɛmɔtshi. (Woo. 17:17; 25:11) Ko manyi ehamo wekoka nkalɔ ndjɛ lonkina. Okoka ndáwopola ntsha Yehova ambokokadjɛ. Okokɛ nshikimala ete ngo loongo winá wopomanɛ la ekakasano ngete mo? Ntepela ente, wopo wɔkɔnge wokokɛ nkindjɛ ndjala la eshikikelo lá ngandji la lá osukɔ wɔ Yehova?

3. ‘Ngandji kɛ nkɔmano,’ osakisolawɔ nge lá nkilika Yeembo 31:7 la 136:1, ko ladjikɛnge okokaso ntepela ente Yehova ndeke ndjɔmbɔmba k’ekekete kɛ ngandji kɛ nkɔmano? (Lenda ntshango.)

³ Wopo ɔmɔtshi wokokaso mpikama ete ngo loongo lá ehemba nde má mvungɔ ngandji kɛ nkɔmano kɛ Yehova. (Wala Yeembo 31:7; 136:1.) Itepela ‘ngandji kɛ nkɔmano’ otomawɔ ikanyi nde ta anto 2 wambomamaná efula la wambomamaná ilá. Yehova ndeke ndjɔmbɔmba k’ekekete kɛ ngandji kɛ nkɔmano. Lá nsɔsɔlɔ, Bible ntepelaka ente nde ‘ambolola kfu la ngandji kɛ nkɔmano.’ (Epo. 34:6, 7) Bible ntepela lonkina djɛ Yehova ante: ‘Wɛ ombolola kfu la ngandji kɛ nkɔmano te onto onkfumɔ woketa.’ (Yee. 86:5) Kokanela kɛnɛ kesakisola nkambo djɛsɔ: Yehova apakadjɛki enkambi wɛnde wɛ nkɔmano kawo! Mvungɔ ente Yehova alekɔ nkɔmano nkoka nkoshikimadjɛ winá wopomanɛ l’ehemba. (Yee. 23:4)

VUNGƆ ENTE NGANDJI KƐ YEHOVA OYƐWƆ NDE OLAKANYELO W’EWANGELO WƆ BIBLE

4. Kɔpɛyɛ ndjɔmbɔmba kɛmɔtshi kɛ olakanyelo w’ewangelo wɔ Bible, la kopakisola lamo yopalekɔ wɔdju iso ndɛngalɛnga.

⁴ Wopo onkina wokokɛ nshikimala lá ehemba nde má vungɔ ente ngandji kɛ Yehova oyɛwɔ nde olakanyelo w’ewangelo wɔ Bible. “Olakanyelo w’ewangelo wɔ Bible” osakisolawɔ nge lewɛ? Okoka nkanela ente oyɛwɔ nde elakanyelo wɛ nsɔsɔlɔ wɛ djawo djɛso wɛ ngheke má Otepela wɔ Ndjambe. Ndjɔmbɔmba, ekaka ente djiina djɛ Ndjambe nde Yehova, Yeso nde ɛtɔyi kɛ Wɔna Ndjambe ndawote, edjo wapewe djoyi, la paradiso kengoyala lá looko idjena y’anto yongowika etshinda etshinda. (Yee. 83:18; Los. 9:5; Dj. 3:16; Ndj. 21:3, 4) Winá wawolɛ elakanyelo wɛsɔ, opangɔlɛngalɛnga mbala kɛmɔ. Ladjikɛnge? Ladjikɛnde ɔnghɛna ente yombopikama nde lá tolembetelo tɔ nsɔsɔlɔ. Nyontshɔ tokolenda wopo wokokaso nyɛna ngandji kɛ Yehova ete ngo olakanyelo w’ewangelo wɔ Bible okokawɔ ntokotshɛ́ djɛ nyimɛ ikanyi y’ente Yehova apɛnyi la apewe kɛnɛ ketokomela.

5. Kotepela wopo wɔ onto okokande mpikola elakanyelo w’ongolo.

⁵ Winá wɔ ngatateyɛ ndjeka Bible, ekete kɛkɔnge kekokotshisá djɛ ntona elakanyelo w’ongolo? Mbala imɔtshi ɛdjɛki kɛnɛ kɛ ɔtɛmwɛlɔ wɔko yalakanyɛka la kɛ nghekaka lá Bible. Tɔkɔsa ndjɔmbɔmba kɛ onto awolaki ntondo ante Yeso ndeke Ndjambe Kanga-Nkfulu-Inkfumɔ. Winá wɔ ndotekaka Bible ayawopolaki ante: ‘Olakanyelo wɔnɛ wolekɔ ngo nsɔsɔlɔ?’ M’ɔkɔngɔ wɔ nshishima tolembetelo tɔ Afunelo, ayɛka ndɛna ante lako, ape nghɔsɔ. Atonaka elakanyelo w’engolo wɛsɔ ko awolaka nsɔsɔlɔ kɛ Bible: Yeso alekɔ ‘otango wɔ nkete nkfumɔ ntongamisá,’ ‘ɛtɔyi kɛ Wɔna Ndjambe.’ (Kɔl. 1:15; Dj. 3:18) Lá nsɔsɔlɔ, elakanyelo w’ongolo ‘nkoka mpikama la wolo efula’ la nkoka ndjala wolo mpikola. (2 Kɔ. 10:4, 5) Koko ngo m’eteyi, otakalɔ lonkina l’elakanyelo wɛ nghatshike.—Flp. 3:13.

6. Lamo okokɛ ndjala l’eshikikelo ente ‘ngandji kɛ nkɔmano kɛ Yehova ntshikalaka etshinda’?

⁶ Tokoka ntshɔ lá lɛdji lɔsɔ djɛ ndjoka wopo wɔ Bible otepelande djɛ ngandji kɛ Yehova. Winá wopomanɛ la ohemba, ntsha ombila ehamo lá ngandji kɛ Yehova, kolawopola ente: ‘Lemi ntɔnɔla ngo wɔlɔ?’ Ɛdjɛ ehamo wɛko la etepela wɛ Yeembo 136:1—vɛrse djɔsamisa ɔtɛ wɔ djamba djɛnɛ. Lamo Yehova otepelande ante ngandji kɛnde kelekɔ ‘nkɔmano’? Lamo itepela ‘ngandji kɛnde kɛ nkɔmano ntshikalaka etshinda’ ɔsɛpɔlamawɔ lá yeembo yɛnɛ mbala 26? Ete ngo isɔmɛna, ngandji kɛ Yehova kɛ nkɔmano te enkambi wɛnde nde olakanyelo w’ewangelo wɔ Bible, ete ngo elakanyelo wɛ ngawola m’Otepela wɔ Ndjambe. Ikanyi yɛ ente Yehova apakɔkɔpɛ la apakɔshi la ntshina oyɛwɔ nde ongolo. Tona olakanyelo wɔsɔ ete ngo ngatone elakanyelo wɛ engolo enkina!

7. Kɔpɛyɛ ndjɔmbɔmba kɛnyɛ eshikikelo kɛ ngandji kɛ Yehova leso.

⁷ Bible dekɔ la tolembetelo efula totoshikikɛ ngandji kɛ nkɔmano kɛ Yehova. Ndjɔmbɔmba, Yeso ashimelaka ambeki wande ante: ‘Nyo ndeka oloyi wɔ ntshɔlɛ odjito.’ (Mat. 10:31) Yehova ashimelaka enkambi wɛnde ante: ‘Tokake wɔma, mande ndekɔ esanga isape, tokiyanake, mande lemi ndeke Ndjambe kɛko. Lemi langokokembɛ, ɛwo, lemi langokokotshɛ́. Lá nsɔsɔlɔ lemi langokokota la lɔwɔ lɔmi lɔ wome lɔ sii.’ (Iza. 41:10) Kolenda wopo wɔ etepela wɛnɛ ɔpɛyɛwɔ eshikikelo. Yeso atatepela ante ‘nyokoka ndeka ntshɔlɛ odjito,’ la Yehova atatepela ante ‘nkoka nkokotshɛ́.’ Koko, yatepela nde ambɔ: ‘Nyolekɔ la odjito’ la ‘lemi langokokotshɛ́.’ Ntsha ila ehamo lá ngandji kɛ. Yehova winá wonanɛ l’ekakasano, avɛrse wanɛ wangokokotshɛ́ djɛ wɛ ndjewa wɔlɔ la djɛ ndjoka wɔlɔ. Yombopikama nde lá tolembetelo tɔ nsɔsɔlɔ. Ndɔmba la ntɔnɔla nkoka nkotshinda djɛ ndjoka etepela wɛ 1 Djɔanɛ 4:16: ‘Iso tombawola la tombewa ngandji kɛ Yehova leso.’a

8. Okokɛ nangha mo ntsha winá ɛmɔtshi ombila ehamo ente Yehova apakɔkɔpaka?

⁸ Kɛkɔnge kokokɛ nangha ntsha winá ɔmɔtshi ila ehamo lá ngandji kɛ Yehova? Ɛdjɛ kɛnɛ kokɛ la kewɛ. Wopo wokaso nkoka nsamba ndjala nkambo djɛ nsɔsɔlɔ, koko ngandji kɛ Yehova, ete ngo Afunelo otolakanyɛwɔ, oyɛwɔ nde nkambo djɛ nsɔsɔlɔ. Ntɔnɔla lá lɛdji lotshikitanyi oyɛwɔ nde mvungɛ djekeka dj’ekekete djɛ Yehova—ngandji kɛnde.—1 Dj. 4:8.

TƆNƆLA WƆLƆ WƆLƆ LÁ NGANDJI KƐ YEHOVA OKOKANDE

9-10. Yeso ndatepelaka djɛ nkambo djɛkɔnge winá wɔ ndolotepela ante: ‘Papa nyɔmɛlɛ nyokaka ngandji,’ ete ngo ɛnaso lá Djɔanɛ 16:26, 27? (Lenda ntshango.)

⁹ Tokoka ndjeka akambo efula walendana la ngandji kɛ Yehova má nshishima etepela wɛ Yeso ndashimela ambeki wande: ‘Papa nyokoka ngandji.’ (Wala Djɔanɛ 16:26, 27.) Yeso atatepela etepela wɛsɔ ngo djɛ ndjokɛ ambeki wande wɔlɔ toko. Lá nsɔsɔlɔ, avɛrse ankina wɛnyɛ ente atatepelaki lá wopo wɔ yokaka lá winá wɔsɔ. Koko, ndatepelaka nde nkambo nkina—djɛ lɔlɔmbɔ.

¹⁰ Yeso ndashimelaka ambeki wande ante nde nyo ladjɛ ndɔmba má mbamba kɛmi koko ape lemi. (Dj. 16:23, 24) Ayalaki djonyi efula iwɔ ndjewa nkambo djɛsɔ. M’ɔkɔngɔ wɔ ekfundelo kɛnde, ambeki wakokaka mpembama djɛ ndɔmba Yeso. Lá nsɔsɔlɔ wayɛka ndokoma tolongo tɔ Yeso. Iwɔ wakokaka mfɛnyɛ ambɔ ngandji kawokande kekoka ndotshinda djɛ nde ndjoka ndɔmbɔ yɛwɔ djɛ nde ntɔla te Papa kɛnde. Koko, Yeso áshimelaka ante iwɔ wapakoke ntɔnɔla nghɔsɔ. Ladjikɛnge? Ladjikɛnde ashimelaka ante: ‘Papa nyɔmɛlɛ nyokaka ngandji.’ Nkambo djɛsɔ oyɛwɔ nde olakanyelo ɔmɔtshi w’ewangelo wolendana la lɔlɔmbɔ. Kokanela nsakiso kɛ nkambo djɛsɔ lewɛ: Má mbamba kɛ wekelo wɔko wɔ Bible, ombewa la ɔmbɔkɔpa Yeso. (Dj. 14:21) Koko ete ngo ambeki w’ɛtɛndɔ kɛ ntondo, okoka ndɔmba Ndjambe l’eshikikelo kenkfumɔ, mande ewa ente nde ‘nyɔmɛlɛ nkokaka ngandji.’ Ɔnghɛnyɛ djawo djɛko lá etepela wɛsɔ winá onkfumɔ wɔlɔmbɛ.—1 Dj. 5:14.

ISOLA IDJENA IPOSA EHAMO WƐKO

11. Lamo Satana oyɛnde la osasa winá wotateyɛso ndjila ehamo lá ngandji kɛ Yehova?

¹¹ Ehamo wilɛ lá ngandji kɛ Yehova oyɛwɔ mampe? Okoka nkadjimola ente oyɛwɔ nde me Satana, ɔsɔ alekɔ nkambo djɛ nsɔsɔlɔ. Djabolo ‘ahona wopo wɔ ntɔlɛ,’ koko nde apangosasanga ntsha topahame ngandji kɛ Yehova. (1 Pɛ. 5:8) Ngandji kɛ nkɔmano kotshindaka djɛ mfuta oshinga wɔ mbendo—ekete kɛ Satana okombolande iso mfɛnyɛ ente tɔpɛdje mba. (Heb. 2:9) Winá wohamaso ngandji kɛ Yehova, osasanga na? Satana. Iya ongoka wɔlɔ na ntsha tɔmbɔtɛka tii lá lɛdji lɔso ntshika nkambela Yehova? Ngo Satana. Tokolenda wopo wɔ Satana okambande la mayɛlɛ djɛ ntohemba djɛ ndjila ehamo lá ngandji kɛ Yehova. Lá nsɔsɔlɔ, Satana ndeke lombotshutshɛ ngandji kɛ Yehova. ‘Enanghedji kɛmɔtshi kɛ mayɛlɛ’ kɛ Satana nde ntotshinda dj’iso nyɛna ente Yehova apatɔkɔpɛ la ambotopela dombo. (Ɛfɛ. 6:11) Winá wewaso kɛnɛ kɛ ontonyi wɔso ohonande iso nangha, tongokembɛ nkano djɛso djɛ ‘nana la Djabolo.’—Dja. 4:7.

12-13. Ntshamba djɛ djɔ djɛ sasambela ototshindawɔ djɛ ndjila ngandji kɛ Yehova ehamo ngete mo?

¹² Ehamo lá ngandji kɛ Yehova nkoka ndjɛ má idjena inkina. Nkambo djɛkɔnge? Ntshamba djɛ djɔ djɛ sasambela. (Yee. 51:5; Ɔrɔ. 5:12) Mpekanto katolaka onto la Ontongi wɔnde. Kembotshita ole yimba, oloko la demba djɛnde.

¹³ Mpekanto kengotomake yimba yɛso ngo ta akambo wa nyɛtshi, nanghaka dj’iso ndawɛmbɛ lowo l’indeko, ndjoka yɛnyi, wɔma la nsɔnyi. Tokoka ndjoka akambo wasɔ winá wonanghaso mpekanto. Tokoka ndjoka lonkina ladjikɛnde tewa winá enkfumɔ ente tolekɔ ase ntshamba djɛ djɔ—eyalelo ketshikitana otale efula la wopo wɔ satongama. (Ɔrɔ. 8:20, 21) Ete ngo otuka wɔmbotondjɔ okato yopakɛndɛka wɔlɔ, iso ase ntshamba djɛ djɔ, topakoke nangha akambo lá lɛdji lɔ wɔlɔ lá wopo wɔ satongama. Djɛko ndeke nkambo djɛsɔ mpatokamoyɛ ma nyɛna ente winá ɔmɔtshi tila ehamo lá ngandji kɛ Yehova. Ntsha ombokoma la ehamo wɛ nghɔsɔ, vungɔ ente Yehova alekɔ ‘Ndjambe k’ekekete la kɛ nkamɔ efula [kɛnyɛka,]. . . ngandji kɛnde kɛ nkɔmano le anto wɔkɔpa la walɛmɛyɛ ɛlɛmbɛ wɛnde.’—Nɛh. 1:5.

14. Wopo wɔkɔnge ntɔnɔla lá oshinga wɔ mbendo otokotshɛwɔ djɛ nkembɛ ikanyi yɛ ente Yehova atɔkɔpa? (Ɔrɔma 5:8) (Lenda ipapango “Kɛba la ‘nkfulu kɛ lokeso kelekɔ́ la mpekanto.’”)

¹⁴ Lá nsɔsɔlɔ, tokoka mfɛnyɛ ente tɔpɛlama djɛ Yehova ntɔkɔpa. La tokoka ntepela l’eshikikelo ente tɔpɛdje nde ntɔkɔpa—kɛsɔ ndeke lɛnyɛ ente ngandji kɛ Yehova kelekɔ ekekete. Ntsha Yehova atɔkɔpa oyɛwɔ nde ma ngandji kɛnde koko ape má welo wɛso. Koko oshinga wɔ mbendo wodjipa mpekanto yɛso, la Yehova afutaka ladjikɛnde atɔkɔpa. (1 Dj. 4:10) Tovungɔ lonkina ente Yeso ndaye nde ndowikɛ ananghi wa mpekanto koko ape anto wa djɔ. (Wala Ɔrɔma 5:8.) Lako kaanga onto ɔmɔ wokoka nangha akambo lá djɔ, la Yehova apakongaka iso nangha nghɔsɔ. Winá wosipisoyɛso ente ntshamba djɛ djɔ nkoka ntokomɛ djɛ ndjila ngandji kɛ Yehova ehamo, tongoleka nkembɛ nkano djɛso djɛ nyimɛ ekanedji kɛsɔ má yimba yɛso.—Ɔrɔ. 7:24, 25.

NANGHA DJƐ NTSHIKALA LA NKƆMANO

15-16. Ntsha tombokindjɛ ndjala la nkɔmano te Yehova, okokaso ndjala la eshikikelo kɛkɔnge, ko lamo? (2 Samwɛlɛ 22:26)

¹⁵ Yehova nkɔpaka djɛ iso ndɔsa nkano djɛ ‘nkindjɛ ndomalema.’ (Mvu. 30:19, 20) Ntsha tomonangha nghɔsɔ, tongoyala la eshikikelo ente angokindjɛ ndjala la nkɔmano leso. (Wala 2 Samwɛlɛ 22:26.) L’ila kenkfumɔ koyɛso la nkɔmano le Yehova, tongokoka ndowilela oloko ente angotokotshɛ́ lá ekakasano enkfumɔ wetokomela lá lowiko.

¹⁶ Ete ngo sɔmɛna, tolekɔ la donga efula djɛ mpikama ete ngo loongo winá wopomanaso l’ekakasano. Tewe ente Yehova atɔkɔpa la angotokotshɛ. Bible olakanyɛnde nde nghɔsɔ. Ntsha tila ehamo lá ngandji kɛnde, tɔtɔnɔlɛ lá kɛnɛ kewaso kelekɔ́ nsɔsɔlɔ, koko ape lá wopo wokaso winá wonyi. Nyontshɔ toyale l’eshikikelo lá olakanyelo wɔ Bible wɛnyɛ ente ngandji kɛ nkɔmano kɛ Yehova ntshikalaka etshinda.