Kwilamitshishena kwi bu nyindo ayilama bulunda bwenu bunyingye nsaa ya kipapi
BWA BEYIBAKISHENE
1 Kwilamatshishena
AKULESHA KINYI
Balume ne bakashi belamikishene abamonaa dibaka dyabo bu kipwano kya looso, na bino abibakwasha bwashi bapushe shi tabe na kya kutshina munkatshi mwabo. Ooso a kwabadi atudila mwinaye eshimba shi akyebe kupa bulunda bwabo muulo, mpa na nsaa yakudi nkalakashi.
Bangi beyibakishene abatungunuka na kushala pamune bu pa bukopo mwanda wa nkalakashi ya mu nshalelo na bwa kukokyela kifuko. Anka, kikile buwa, nyi mpabadi bepane ku bulunda bwabo pa mwanda wa kifulo na kwinemekyeshena.
EYI DYA KULONDA DYA MU BIBLE: “Mulume namu tapelanga mpyan’ê.”—1 Bena-Kodinda 7:11, EEM.
“Su we mulamate ku bulunda boobe, we kupetala kukwata nsungu lubilo . We muntu a kumpala a kufwila mwinaye lusa na kuteka lusa. Omonaa myanda ayituuku bu nkalakashi ayifiki mu kipwano, kushi bu kabingilo ka kutshiba kipwano.”—Micah.
BWAKINYI KWI NA MUULO
Nsaa ayifiki nkalakashi, mulume na mukashi bashi belamikishene ku bulunda bwabo mbalombeene misango ibungi kumona shi, ‘tatwi bapangibwe bwa kwikala pamune nya’ na be kukimba mushindo wa kutshiba dibaka.
“Bantu bebungi abatwelaa mu dibaka aku abauku shi be na kangi kashinda ka kwimutuuka—kutshiba dibaka. Nsaa i muntu atwele mu dibaka na binangu bya’shi mmulombeene kutshiba dibaka, mukutwe kwilamitshishena kubanga ku mbangilo.”—Jean.
KYODY’A KUKITA
ETALUULE OBE NABEENE
Nsaa yakudi kwikakeena . . .
Wekalaa ingi nsaa weyalashena bwakinyi boodi mwibakile uno mulume sunga mukashi?
Wekalaa bu aloto toodi mwiyibakishene na ungi muntu?
Wekalaa ingi nsaa wamba shi “nankyebe nkupela” sunga shi “Nankyebe kupeta ungi muntu munkumiine”?
Su bwaluula shi oolo ku lumune lwa ku ino nkonko, uka shi ino nyi nsaa ayitungu shi unyingishe kwilamitshishena koobe.
ESAMBE NA MWINA DIBAKA NOOBE
Kulamata koobe mu bulunda kubatshimbi? Su mbyabya, bwakinyi?
Myanda kinyi yoodia kukita binobino bwa kunyingisha kwilamitshishena koobe?
BINANGU
Ingi nsaa ikala ofundjila mulunda oobe mayi a kifulo
Lesha kwilamitshishena koobe pa kutuula foto ya mulunda oobe pa mesa oobe ku mudimo
Itanyina mulunda oobe efuku dyooso poodi ku mudimo sunga kula
EYI DYA KULONDA DYA MU BIBLE: “Kibungye Efile Mukulu, muntu tekyabuulanga.”—Mateo 19:6.