Mwanda wa 8
Bantu ba bipaambe
SU MUNTU kwete kutambuka peepi noobe na e bula bwa nkakuma ku kisasa kya nshibo, we mukumbeene kwela binangu kinyi? Yawa muntu nyi kipambe! Mu angi mafuku kubaadi bipaambe pa nsenga. Mu Bible abalesha shi ba nshabo abaabi miikeyilu abafikile mwiyilu. Bwakinyi bibaadi byabya?
Tentekyesha, mwikeyilu mubi Satana baadi mwipaane mu kutwesha kafutakanyi. Baadi mpa na mutompe kutakuula miikeyilu y’Efile Mukulu bwashi bakite myanda ibubi. Kunyima, ingi miikeyilu ibabangile kuteemesha Satana. Abalekyele kukita mudimo ubebapeele Efile Mukulu mwiyilu. Abo nkufika pa nsenga na kufwala mbidi ya bu bantu. Ouku bwakinyi abakitshine byabya?
Mu Bible abamba shi mwanda bano baana b’Efile Mukulu abamwene bakashi bebuwa pa nsenga na abaadi na lukalo lwa kwibaata. Ndjo abo nkufika pa nsenga na kwibakila baba bakashi. Mu Bible abalesha shi wawa mwanda ubaadi wibubi, mwanda Efile Mukulu bapangile miikeyilu bwashi bashale mwiyilu.
Baba bakashi abatandile baana na miikeyilu; baana baabo ta babadi bu bangi baana nya. Ku mbangilo ta babadi abamweneka shi mbelekene nya. Kadi abatungunukile na kukula, na kufika bukome bukile, mpa na pababafikile bu bipaambe.
Bino bipaambe bibaadi bubi. Bu bibabadi bukata na bukome, abaadi abatapa bantu. Abaadi abatumu bantu booso bwashi bakite myanda ibubi bu bibabadi abakitshi.
Henoke baadi mupwe kufwa, kadi kubaadi muntu umune pa nsenga baadi akitshi myanda ibuwa. Uno muntu nyi Nowa. Baadi nsaa yooso akitshi kibaadi Efile Mukulu amutekye shi akite.
Dingi efuku, Efile Mukulu balungwile Nowa shi nsaa ibalombana bwashi abutule bantu booso bebubi. Kadi Efile Mukulu baadi akyebe kupaasha Nowa na kifuko kyaye na nyema ibungi. Tubande kutala mushindo ubaadi Efile Mukulu mwibikite.