Mwanda wa 10

Mpeshi a kabutu

PAASHA pa bwato, bantu abaadi abatungunuka na kukita myanda nka bu bibabadi abakitshi kala. Tababakuminanga shi Mpeshi a kabutu akyebe nkanoka. Abimweneka shi abaadi abatungunuka na kusepa. Kadi kunyima kwa mafuku apeela babalekyele kusepa.

Musango umune mema ababangile kwika mwiyilu. Abaadi aapongoloka mwiyilu anka bu muntu apongoola mema e mu mbeketshi. Bibakwile Nowa mbya binyibinyi! Kadi bibaadi bukopo bwashi muntu ooso e paasha atwele mu bwato. Yehowa baadi mushite kibelo bi bukopo.

Mu kapindji kapeela nsenga ishima ibaadi iwule na mema. Mema abafikile bu myeela ikata. Abashindile mitshi ikata na kubungulusha mabwe akata na abaadi aele kituumo kikata. Bantu abaadi na moo. Abakamiine ku myengye ikata. Bibaadya kwikala buwa, su abaadi bateemeshe bibambile Nowa na kutwela mu bwato nsaa ibaadi kibelo kikii mwasa! Kadi nsaa ibaadi ipwe kukila.

Mema abaadi aende na kukamina. Munda mwa mafuku 40 bufuku na kanya, mema abaadi aapongoloka mwiyilu. Abaadi akamine kunundu kwa myengye ibula, akupu mema abaadi mpa na ku nsongo kwa myengye ila. Byabya nka bu bibakwile Efile Mukulu, bantu booso na nyema ibaadi paasha pa bwato ibafwile. Kadi booso abaadi mu bwato abapandile.

Nowa na baana baaye abakitshine mudimo wibuwa wa kukita bwato. Mema abaadi ebukamishe kunundu, na bubaadi bulengame kunundu kwa mema. Dingi efuku, kunyima kwa mpeshi kutshibika, nguba babangile kumunyika. Mwanda umune wa kukanya! Kubaadi kalunga kakata ka mema aule nsenga ishima. Kintu penda kimune kibaadi akimweneka kibaadi nka bwato bubaadi kunundu kwa mema.

Binobino bipaambe bibaafu. Ta kubaadi dingi muntu su ngumune mukumbeene kukyengyesha bantu nya. Booso abaapu kufwa, na ba nyin’abo na bangi bantu booso bebubi. Kadi ba mashabo?

Ba nshabo na bipaambe tababadi bantu bu byatudi atwe nya. Babaadi miikeyilu abafikile pa nsenga bwa kushaala bu bantu. Byabya pabafikile Mpeshi a kabutu, abo tababafwile bu bangi bantu nya. Abafuudile mbidi ya bu muntu ibabatshile, abo nkwaluka mwiyilu bu miikeyilu. Kadi tababadi dingi na matalwa a kwaluka mu kifuko kya miikeyilu y’Efile Mukulu nya. Ndjo abo nkufika bu miikeyilu ya Satana. Mu Bible abebetanyina bu bademo.

Binobino Efile Mukulu nkwelesha lupapi pa nsenga, na mema a mpeshi nkubanga kwika. Kunyima kwa myeshi itano, bwato nkufika mu kushala ku nsongo ya mwengye. Kubakidile mafuku ebungi, na baaba abaadi mu bwato abaadi bakumbeene kwilamina paasha na kumona nsongo ya myengye. Mema abatungunukile na kwika.

Paapa Nowa nkuposola konyi kafiita kabetanyina bu enganga pasha pa bwato. Kabaadi kakumbeene kupapama paasha munda mwa kapindji kapeela na kwaluka, mwanda takabaadi kakumbeene kupeta mbalo ya kwikila nya. Kabatungunukile na kukita byabya na dingi nsaa yooso ibakadi akaluka, kabaadi akashala ku bwato.

Nowa baadi na lukalo lwa kuuka su mema abakama pa nsenga, akupu aye nkuposola nkudimba. Kadi nkudimba namu nkwaluka mwanda tabaadi mupete mbalo ya kwikila. Nowa batumine nkudimba musango wa kabidi, aye nkufika na esaki dya mutshi wa olive ku mulomo. Byabya Nowa nkumona shi mema abapeele. Binobino Nowa nkuposola nkudimba musango wa kasatu, paapa aye nkupeta mbalo yume ya kushaala.

Binobino Efile Mukulu nkwisamba na Nowa. Amulungula shi: ‘Tuuka mu bwato. Ata kifuko kyoobe kishima na nyema yooso i noobe.’ Abaadi bakite mu bwato mafuku akile kipwa kishima. Byabya twi bakumbeene kutala muloo ubabadi nawo wa kwikala dingi paasha pa bwato na kwikala na muwa!

Kibangilo 7:10-24; 8:1-17; 1 Mpyeele 3:19, 20.