Mwanda wa 9
Bwato bwa Nowa
OWA baadi na mukashi na baana basatu. Mashina a baana baaye ngano: Seme, Kame na Yafete. Baana baaye booso balume abaadi na bakashi baabo. Byabya mu kifuko kya Nowa mubaadi bantu mwanda.
Efile Mukulu balungwile Nowa shi akite kintu kya kukanya. Bamulungwile shi akite bwato bukata. Bwabwa bwato bubaadi bukata nka bu masuwa, kadi bubaadi abumweneka bu mushete ukata ula. Efile Mukulu bamulungwile shi: ‘Ebukite na bisasa bisatu, na wemukite dingi tushibo.’ Tushibo tubaadi bwa Nowa na kifuko kyaaye, nyema na bya kudya bibabadi nabyo lukalo.
Efile Mukulu balungwile Nowa shi ashikye bwato bwashi mema taatwelanga mwanka. Efile Mukulu bambile shi: ‘Ami nakanokyesha mpeshi mukata a kabutu bwa kubutula byooso bi pa nsenga. Muntu ooso shekala mu bwato akafu.’
Nowa na baana baaye abakokyele Yehowa abo nkubanga kukita bwato. Kadi bangi bantu abaadi abamusepe. Abatungunukile na kukita myanda ibubi. Muntu su ngumune tabaadi mukumine pa bebalungwile Nowa akikyebe kukita Efile Mukulu.
Bwa kukita bwato bibaadi abitungu mafuku ebungi mwanda bubaadi bukile bukata. Akupu, kunyima kwa bipwa bibungi, bwato bubapwile. Binobino Efile Mukulu balungwile Nowa bwashi atweshe nyema mu bwato. Efile Mukulu beambile shi atweshe nyema ibidi ibidi ya mishindo ilekeene, mulume na mukashi. Kadi pabitale nyema ya ingi mishindo, Efile Mukulu balungwile Nowa shi atweshe nyema musambobidi musambobidi. Efile Mukulu balungwile Nowa dingi shi atweshe toonyi twa mishindo yooso. Nowa bakitshine nka bibamulungwile Efile Mukulu.
Akupu, Nowa na kifuko kyaaye abatwele namu mu bwato. Nyi Efile Mukulu nkushita kiibi. Nowa na kifuko kyaaye abaadi abatengyela mu bwato. Banda kwela binangu bube mushaale nabo mu bwato nukwete kutengyela. Mpeshi akyebe kunoka bu bibakwile Efile Mukulu su?