Buato bua Nowa

Kunyima kua mafuku bantu abafuimine pa nsenga. Bebungi ba kuabadi abaadi bebubi. Mpa na bangi ba mikeyilu abatombokiele muiyilu. Abo nkukatuka muiyilu mubaabadi bashale nkufika pa nsenga. Weuku buakinyi abakitshiine biabia? Buabadia kufuala mbidi ya bu bantu na kuibakila bakashi.

Ba mikeyilu abatandile bana na baaba bakashi. Bana baabo abaadi aboolomona bangi muanda abaadi na bukome bukile. Abaadi abakiengiesha bantu. Yehowa ta baadia kutadiila bua’shi batungunukie na kukiengiesha bantu nya. Nyi buakinyi batshile kitshibilo kia kubutula bantu booso bebubi ku mpeshi.

Anka kubaadi muntu baadi muileekeene nabo. Baadi mufule Yehowa. Eshina diaye nyi Nowa. Baadi na mukashi na bana basatu, Seme, Kame, na Yafete booso buabo abaadi na bakashi. Yehowa nkulungula Nowa bua kukita buato bukata bua’shi Nowa apande na kifuko kiaye ku Mpeshi a kabutu. Buato nyi mmusheto ulombeene kulengama kunundu a meema. Akupu Yehowa nkulungula Nowa bua kutuesha nyema ibungi mu buato buayidia kupanda namu.

Musango umune, Nowa babangile kukita buato. Nowa na kifuko kiaye abakitshine bipua bifikie ku 50 bua kuibupudisha booso. Abo nkuibukita nka muyile bibaadi Yehowa muibalungule. Munda mua aa mafuku, Nowa baadi adimusha bantu pabitale Mpeshi. Kadi takubaadi muntu su ngumune baadi mumuteemeshe.

Ku nfudiilo a bioso, nsaa ya kutuela mu buato ibaadi ilombane. Tubande kutala bibaadi bikidikie kunyima.