Mwanda wa 28
Mushindo ubabapashile Moyiise
TALA mwana tooka kwete kudila, mukwate ku munwe wa nsongwakashi. Uno nyi Moyiise. Ouku uno mukashi ebuwa su? Mmwana mukashi a Faraone, nfumu a mu Ejiipitu.
Nyinaaye na Moyiise baadi mufye mwana aaye kii tooka mpa na bya kumbasha myeshi isatu, mwanda tabaadi akumina shi bamwipee kwi beena Ejiipitu nya. Kadi baadi auku shi mbalombeene kumona Moyiise, ndjo aye nkukita bino bwa kumupaasha.
Batshile kitunga ekishika bwashi mema taatwelanga mwanka. Aye nkwela Moyiise mwanka, na aye nkwikituula mu malengye pepi na Mwela wa Nile. Abaadi balungule Miryame taata a Moyiise bwashi emane mbwipi bwa kutala kyooso akikitshika.
Kunyima a kapindji kapeela mwana mukashi a Faraone bayile mu kwitumpa ku Mwela wa Nile. Mususa umune bamwene kitunga munkatshi mwa malengye ebula. Bayitamine umune a ku bafubi baaye bakashi amulungula shi: ‘Enda okangatshile kyakya kitunga.’ Mwana mukashi a nfumu pababuulwile kitunga, bamwene mwana mulume ebuwa bwikashaa! Moyiise baadi kwete kudila na mwana mukashi a nfumu bamupushishe lusa. Tabaadi mukumine shi bamwipee nya.
Akupu Miryame bafikile. Okwete kumumona mu kifwatulo su? Miryame bepwishe mwana mukashi a Faraone shi: ‘Okyebe nyende mu kwitaanyina mudiishi kampanda kwi bakashi ba beena Isaleele bwa nkomeesha mwana su?’
Mwana mukashi a nfumu bakwile shi: ‘Enda.’
Miryame bayile lubilo mu kulungula nyinaaye. Pabafikile nyinaaye na Moyiise kwi mwana mukashi a nfumu, aye bamulungwile shi: ‘Enda na uno mwana, omungomeeshe, ami ngi akupa efuto.’
Nyinaaye na Moyiise baatshile mwan’aaye amulama. Kunyima pabakudile Moyiise, bayiile naaye kwi mwana mukashi a Faraone, uno mwana mukashi nkumwata bu mwana aaye mulume. Byabya nyi bibakudile Moyiise mu nshibo ya Faraone.