Mwanda wa 29

Bwakinyi Moyiise basuuku?

TALA Moyiise kwete kusuuka mu Ejiipitu. Okwete kumona bantu bakwete kumubinga su? Ouku bwakinyi abakyebe kumwipa? Tubande kutala su twi bakumbeene kuuka.

Moyiise bakudile mu nshibo ya Faraone, nfumu a mu Ejiipitu. Bafikile muntu mukata na sha binangu. Moyiise baadi auku shi tabaadi mwina Ejiipitu nya, kadi baledi baaye abaadi bapika, beena Isaleele.

Dingi efuku, pabaadi na bipwa 40, Moyiise batshile kitshibilo kya kwenda mu kutala nshalelo baadi naye mwilo wabo. Mushindo ubabadi abebakyengyesha ubaadi bubi bukile. Bamwene mwina Ejiipitu kwete kukupila mpika mwina Isaleele. Moyiise batadile mpese yooso, pabamwene shi takubaadi muntu kwete kumumona, bakupile mwina Ejiipitu, aye nkumwipa. Akupu Moyiise nkushiika kitanda mu lusenga.

Efuku dibalondele, Moyiise bayile dingi mu kutala mwilo wabo. Bamwene shi mulombeene kwibakwasha bwa kutuuka mu bupika. Kadi bamwene beena Isaleele babidi balume abalu ngoshi, byabya Moyiise balungwile yawa baadi mupiile shi: ‘Bwakinyi okupila mukwenu?’

Yawa muntu nkwamba shi: ‘Nnaanyi mukutuule bu nfumu na bu nsushi eetu? Okyebe kungipa bu byoyipayile Mwina Ejiipitu su?’

Paapa Moyiise babangile kupusha moo. Bamwene shi bantu mbapwe kuuka kibaadi mukite mwina Ejiipitu. Mpa na Faraone baadi mupushe wawa mwanda, aye nkutuma bantu bwa kwipa Moyiise. Nyi bwakinyi bibaadi abitungu shi Moyiise asuukye bwa kukatuka mu Ejiipitu.

Pabakatukile mu Ejiipitu, Moyiise bayile kwibula, mwiumbo dya Madyane. Kwakwa bafumankeene na kifuko kya Yetro, na bayibakiile mwana aaye mukashi umune etaminwa bu Zipora. Moyiise bafikile bu mulami a mikooko na baadi alama mikooko ya Yetro. Bashalele mwiumbo dya Madyane munda mwa bipwa 40. Binobino bakumbasha bipwa 80. Ndjo paapa, dingi efuku pabaadi kwete kulama mikooko ya Yetro, kubakitshikile kintu kimune kya kukanya na kibashintulwile nshalelo a Moyiise. Tala mwisaki adilondo omone kyakya kintu kya kukanya.

Efilu 2:11-25; Bikitshino 7:22-29.