Mwanda wa 30
Ndjimi ya kaalo mwifufu dya mutshi
MOYIISE baadi mutwale loombe lwaaye lwa mikooko ku mwengye wa Horebe bwa kupeta lubishi lwa kwiyidiisha. Bamwene ndjimi ya kaalo mwifufu dya mutshi, kadi tadibaadi adipi nya!
Moyiise bambile shi: ‘Kino nkintu kya kukanya. Neseesele pepi bwa kumona kalolo.’ Pabeseesele pepi, eyi dibatukile mwifufu adyamba shi: ‘Tweseeselanga pano. Kaasha bilato byoobe ku ngwa yoobe mwanda mbalo yoodi mwimane nyi ngya kishila.’ Efile Mukulu nyi baadi akula kukidila kwi mwikeyilu, ndjo Moyiise nkwibwikila mpala.
Efile Mukulu bakwile dingi shi: ‘Namono mpombo ya mwilo wande mu Ejiipitu. Nankyebe kwibapoososha na dingi obe nyi ankyebe kutuma bwa kutuusha mwilo wande mu Ejiipitu.’ Yehowa baadi akyebe kutwala mwilo waaye ku eumbo dibuwa dya Kanaana.
Kadi Moyiise nkwamba shi: ‘Nee’nyi? Mushindo kinyi wandi mulombeene kwibatuusha? Kadi su nenda kwi beena Isaleele, mbalombeene ku ngipusha shi: “Nnaanyi, eshina dyaaye?” Nekwibalungula kinyi?’
Efile Mukulu balulwile shi: ‘Wakula bino na baana ba Isaleele: “YEHOWA Efile a Abrahame, Efile a Isaake na Efile a Yaakobo, bantumu kwanudi.”’ Yehowa bakwile dingi shi: ‘Dyadya nyi eshina dyande bwa looso.’
Moyiise balulwile shi: ‘Kadi su bakutwa kunkokyela na kuteemesha eyi dyande shi noobe bantumu.’
Efile Mukulu bamwipwishe shi: ‘Nkinyi kyoodi nakyo mwiyaasa?’
Moyiise balulwile shi: ‘Mmukombo.’
Efile Mukulu bambile shi: ‘Ewele paashi.’ Moyiise pabewelele paashi, mukombo ubalulukile bu nyoka. Yehowa balesheshe Moyiise kingi kipaso. Bamulungwile shi: ‘Ela eyaasa munda mwa kilamba.’ Moyiise belele eyaasa munda na pabeditushile, dibaadi ditooka bu mabwe a mpeshi! Eyaasa dibaadi adimweneka bu dikwatshikye na mukumbo wibubi wabetanyina bu nsudi. Akupu Yehowa bapeele Moyiise bukome bwa kukita kipaso kya kasatu. Kunyima bakwile shi: ‘Pokitshi bino bipaso beena Isaleele abakyebe kukumina shi naami bakutumu.’
Kunyima Moyiise balukiile ku nshibo aye nkulungula Yetro shi: ‘Ntadiile namu nyende kwi bakwetu mu Ejiipitu bwa kumona su be naminyi.’ Byabya Yetro baladikile Moyiise na Moyiise babangile lwendo lwa kwaluka mu Ejiipitu.