Mwanda wa 53
Mulayilo wa Yefetee
KASHA tobolayile muntu kintu akupu omana shi bi bukopo bwa kwikilombasha su? Uno muntu e mu kino kifwatulo bakitshine byabya, nyi bwakinyi mwinyongole. Yawa muntu nsushi mukata a mu Isaleele, eshina dyaaye nyi Yefetee.
Yefetee baadi na muwa mu mafuku abaadi beena Isaleele balekye kulangwila Yehowa. Bakwete kukita dingi myanda ibubi. Byabya Yehowa nkutuma beena Aamone bwa kwibakyengyesha. Bino bibaadi bitume beena Isaleele bwashi bedile kwi Yehowa bino shi: ‘Twibakulwishishe, anka etukuule lelo!’
Mwilo ukwete kwinyongola bwa myanda ibubi ibabadi bakite. Abalesheshe shi mbenyongole nsaa ibababangile kulangwila Yehowa dingi. Na Yehowa nkwibakwasha dingi.
Mwilo ubasangula Yefetee bwashi ebalwile ngoshi na beena Aamone bebubi. Yefetee e na lukalo lukata lwashi Yehowa amukwashe ku ngoshi. Ndjo aye nkulaa Yehowa shi: ‘Su binyibinyi onkwasha natshokola baana ba Aamone, ooso muntu atuuku mu nshibo yande mu kunkuukila pa ngaluka na bushima bwande, nankulambula anka bu mulambu.’
Yehowa bapushishe mulayilo wa Yefetee na aye nkumukwasha bwashi atshokole ngoshi. Nsaa ibalukile Yefetee, ouku muntu a kumpala bafikile mu kumukukila su? Mwana aaye umune mukashi nyi bafikile mu kufumankana naaye. Yefetee basamine shi: ‘Aa, mwanande mukashi! Bontwesha mu malwa. Ami ne mwakule nashidika kumpala kwa Yehowa, ntshii mulombeene kwialusha kumongo nya.’
Mwana mukashi a Yefetee pabapushishe byabya, benyongwele namu. Mwanda byabya abilesha shi abitungu akatukye alekye nshaaye na bèenaye. Kadi akakisha mafuku aye a muwa ku mudimo wa Yehowa ku tabernakele ku Siloo. Byabya aye nkulungula nshaaye shi: ‘Su we mulee Yehowa, kita muyiile byoyikalanga mumulee.’
Byabya mwana mukashi a Yefetee bayile ku Siloo, aye nkukisha mafuku aaye a muwa ku mufubo wa Yehowa ku tabernakele. Mafuku ananka ku kipwa kyooso, bakashi ba mu Isaleele abendanga mu nkamutala, na kusepeela pamune. Bantu abaadi bafule mwana mukashi a Yefetee mwanda baadi mufubi a Yehowa ebuwa.