Efile Mukulu akumiinaa bantu be na lukumiino

1, 2. Yefetee na mwan’aye mukashi abaadi kumpala kwa lukalakashi kinyi?

NSONGWAKASHI asuuku lubilo mu kukukila nshaye. Baadi na muloo wa kumumona kwalukiila mu ngoshi kushi kupeta masaku. Baadi ayimbi na kusha na muloo pa mwanda wa kutshokola kukata kwa nshaye. Baadi na kya kubasuka pakumona bibakitshine nshaye na bibaadi mwakule. Nshaye nkusaana bilamba byaye na kusama’shi: “Aa! Mwan’ande mukashi, bontwesha mu malwa.” Aye nkumulungula’shi ekalanga mukite mutshipo kwi Yehowa ulombeene kushintuula nshaleelo a mwan’aye ikalaika. Mutshipo waye ubaadi awamba’shi mwan’aye tabaadi mulombeene kwibakilwa sunga kutanda mwana su ngumune nya. Mususa umune nkwaluula nshaye mayi ebuwa bukile, aye nkumunyingisha bwadya kulombasha mutshipo waye kwi Yehowa. Lwaluulo lwa nsongwakashi aluleesha’shi baadi mukulupile bikata’shi kyoso kibaadi Yehowa na kya kumuteka kibaadi nka kibuwa. (Bansushi 11:34-37) Nsaa ibaadi nshaye mumone bi lukumiino lwa mwan’aye, baadi na muloo wibungi pa kuuka’shi mwan’aye mukashi baadi mulombeene kufubila Yehowa na muloo.

² Yefetee na mwan’aye abaadi bakulupile mwi Yehowa na mushindo waaye wa kukita myanda. Abasheele na lulamato sunga mbyabibaadi bukopo. Abaadi abakimbi kukuminyibwa na Yehowa, na kukita byabya kubaadi kukile kintu kyoso kibaabadi balombeene kukita.

3. Bwakinyi kileshesho kya Yefetee na mwan’aye mukashi akitukwasha lelo uno?

³ Misusa yooso, t’abikalaa bibofule bwa kushaala na lulamato kwi Yehowa nya. Abitungu ‘tulwe ngoshi’ bwa kwikala na lukumiino. (Yunda 3) Bwatudya kupeta bukwashi bwa kukita bino, tutaluleeyi kipaso kibaadi Yefetee na mwan’aye mukashi bakankameene nkalakashi mu muwa wabo. Mushindo kinyi wabaadi bashaale na lulamato kwi Yehowa?

KUSHALA NA LULAMATO MUNKATSHI MWA BANTU BEBUBI

4, 5. (a) Yehowa balungwile beena Isaleele kinyi nsaa yabaadi batwele mu Nsenga ya Mulayilo? (b) Muyile mukanda wa Misambo 106, nkinyi kibaadi kifwile beena Isaleele pa mwanda wa kukutwa kukookyela?

⁴ Efuku dyooso, Yefetee na mwan’aye mukashi abaadi na kya kutentekyesha bipeta bya kukutwa kukookyela kwa beena Isaleele kwi Yehowa. Bipwa 300 kumpala, Yehowa balungwile beena Isaleele bwabadya kwipaa balangwidi booso ba madimi mu nsenga ya mulayilo, anka abapelele kukookyela. (Miiya Ikituulwe 7:1-4) Beena Isaleele bebungi ababangile kwambula beena Kanaana abaadi abalangwila b’efile ba madimi na abaadi na nshaleelo ebubi.​—Badika Misambo 106:34-39.

⁵ Mwanda wa kukutwa kukokyela kwa beena Isaleele, Yehowa tabaadi mwibakalwile kwi beshikwanyi baabo nya. (Bansushi 2:1-3, 11-15; Misambo 106:40-43) Bibaadi bukopo bwa bifuko bibaadi bifule Yehowa bwa kushaala na lulamato mu byabya bipwa bibukopo. Kadi Bible atemuna bantu abaadi na lulamato bu Yefetee, mwan’aye mukashi, Elkana, Aana, na Samwele. Abaatshile kitshibilo kya kusangasha Yehowa.—1 Samwele 1:20-28; 2:26.

6. Mbukitshishi kinyi bwi nabo ino nsenga lelo uno, na abitungu tukite kinyi?

⁶ Mu ano mafuku eetu, bantu abakitshi na kunangusheena nka bibaadi beena Kanaana. Abaadi batuule nshaleelo aabo nka ku lusandji, ku buntomboshi, na ku makuta. Kadi Yehowa kwete kwitudimusha. Aye akumiina kwitukalwila nka bu bibaadi akumiina kukalwila beena Isaleele ku myanda ibubi. Bilubilo byabo, abitupa dilongyesha su? (1 Beena-Kodinda 10:6-11) Abitungu tukite mwetu mooso bwa kusuuka binangu bya uno ndumbulwilo. (Beena-Looma 12:2) Atukumiina kwitatshisha bwa kwibikita su?

YEFETEE BASHADILE NA LULAMATO SUNGA MBYAKUBAADI MUSHIKWA

7. (a) Nkinyi kibaabadi bakitshine Yefetee kwi bakwabo? (b) Aye namu bakitshine kinyi?

⁷ Mu mafuku a Yefetee beena Filistine na beena Amone abaadi abakyengyesha beena Isaleele mwanda wa kukutwa kukookyela Yehowa. (Bansushi 10:7, 8) Kukatusha miilo ibaadi ibashikwe, Yefetee baadi mu lukalashi lwa bakwabo na lwa bakunkushi ba Isaleele abaadi bamushikwe. Abamubingile bwa kukatuka mu nsenga yabo mwanda abaadi bamukwatshile kyutu na kumushikwa kwi bakwabo. (Bansushi 11:1-3) Yefetee tabaadi mutadiile butomboshi bwabo bwabudya kulwisha mwikeelo waye. Atwibiuku naminyi? Mwanda nsaa ibaadi bakulu ba mwilo bamutekye bwadya kwibakwasha, baadi mukumiine musango umune. (Bansushi 11:4-11) Nkinyi kibaadi kitakule Yefetee bwa kukumiina musango umune?

8, 9. (a) Mayi a kulonda kinyi e mu Miiya ya Moyiise abaadi akwashe Yefetee? (b) Nkinyi kibaadi na muulo kwi Yefetee?

⁸ Yefetee baadi kilobo kya ngoshi, baadi auku myanda ya kala ya Isaleele na kuuka kalolo Miiya ya Moyiise. Mushindo ubaadi Yehowa akitshiina mwilo Waye myanda ubaadi umulongyeshe mweneno a Efile Mukulu pabitale kibuwa na kibubi. (Bansushi 11:12-27) Yefetee baadi mufubishe kyakya kiukilo bwa kwata bitshibilo mu muwa waye. Baadi muukye kalolo kipaso kibaadi akipusha Yehowa pabitale nsungu na kwalusha bubi ku bubi na bibaadi Efile Mukulu akumiina’shi bafubi Baaye b’efuleene. Kukatusha byabya, Mwiya ubamulongyeshe bya kukitshina bangi myanda, sunga baaba abaadi bamushikwe.​—Badika Efilu 23:5; Beena-Levi 19:17, 18.

⁹ Kileshesho kya Yosefe kibakwashishe Yefetee. Baadi na kya kulonga bibaadi Yosefe muleeshe bakwabo lusa sunga mbyabaadi bamushikwe. (Kibangilo 37:4; 45:4, 5) Kunangusheena pa kino kileshesho kubakwashishe Yefetee bwadya kukita myanda mu mushindo ubaadi ausankisha Yehowa. Myanda ibakitshine bakwabo na Yefetee ibaadi imutape kwishimba. Kadi kulwa ngoshi bw’eshina dya Yehowa na bwa mwilo wabo kubaadi na muulo kwi Yefetee kukila bibaadi apusha. (Bansushi 11:9) Baadi na kitshibilo kya kushaala na lulamato kwi Yehowa. Yehowa baadi mumwelele myabi na mwilo wa Isaleele pamwanda wa mwikeelo waye.​—Beena-Ebelu 11:32, 33.

10. Buludiki bw’Efile Mukulu bwi kwitukwasha bwa kukita myanda bu beena Kidishitu naminyi?

¹⁰ Twi kupeta dilongyesha ku kileshesho kya Yefetee su? Twi kukita kinyi su mukwetu mwina Kidishitu betulwishisha sunga su atupusha’shi tabetukitshina myanda kalolo? Tatukumanga kutadiila byatupusha kwishimba bitukutshishwe kufubila Yehowa. Tatukumanga kwimika kwenda ku bisangilo bya bwina Kidishitu sunga kukisha nsaa na beena kakongye. Twambuleyi Yefetee na tukookyele Yehowa. Bino abitukwasha bwa kunyingiila mu myanda ibukopo, na kwikala kileshesho kibuwa kwi bangi.​—Beena-Looma 12:20, 21; Beena-Kolose 3:13.

KWITUSHILA MILAMBU AKULEESHA BI LUKUMIINO LWETU

11, 12. Yefetee bakitshine mutshipo kinyi, na bino bibaadi abipushisha kinyi?

¹¹ Yefetee baadi auku’shi abitungu bukwashi bwa Yehowa bwa kupososha Isaleele kwi beena Amone. Balayile Yehowa’shi su amukwasha bwa kutshokola baadi na kya Kumupa “mulambu wa kushiika,” kwamba’shi muntu ooso a kumpala akatuuku mu nshibo mwaye su balukiila ku ngoshi. (Bansushi 11:30, 31) Bibaadi abipushisha kinyi?

¹² Yehowa ashikwaa milambu ya bantu, byabya atwiuku’shi Yefetee tabadya kulambula muntu nya. (Miiya Ikituulwe 18:9, 10) Mu Miiya ya Moyiise, muntu baadi na kya kutuusha mulambu wa kushiika bu kya buntu kikata kya kupa Yehowa. Byabya bibaadi abileesha’shi Yefetee badya kutuusha muntu bwa kufubila Yehowa ku tabernakele mu muwa waye ooso. Yehowa baadi mupushishe Yefetee na bamukwashishe bwa kutshokola ngoshi. (Bansushi 11:32, 33) Kadi, mmuntu kinyi abaadya kulambula Yehowa kwi Yefetee?

13, 14. Mayi e mu mukanda wa Bansushi 11:35 aalesha bi lukumiino lwa Yefetee naminyi?

¹³ Banda kupwandikisha mwanda wi kumbangilo kwa uno mwisambo. Nsaa ibaadi Yefetee mwalukiile mu ngoshi, muntu a kumpala bafikile mu kumukuukila baadi mwan’aye mukashi abaadi mukumiine, mwana’ye mbedi! Yefetee baadi mulombashe mutshipo waye su? Baadi mulambule mwan’aye kwi Yehowa bwadya kumufubila ku tabernakele mu muwa waye ooso?

¹⁴ Mayi a kulonda a mu Miiya y’Efile Mukulu abaadi akwashe dingi Yefetee bwa kwata bitshibilo bibuwa. Baadi atentekyesha pangi mayi a Efile Mukulu e mu mukanda wa Efilu 23:19, abalungwile mwilo waye bwa kupa Yehowa bintu bya muulo. Mwiya ubaadi awamba dingi’shi apakitshi muntu mutshipo “tatupakananga pa kukutwa kukumbasha mulayilo waye nya: Alonde menemene kulaa kutuukye mukanwa mwaye.” (Mbadiko 30:3) Nka bu bibaadi Aana muleeshe lulamato mu kipungo kyaye, Yefetee bakumbeeshe mutshipo waye, sunga mbibaadi auku akipushisha mutshipo waye bwaye nabeene na bwa mwan’aye. Bu bibaadi mwan’aye na kya kufuba ku tabernakele, tabaadi na kya kutanda mwana nya. Byabya Yefetee tabaadi mulombeene kupeta muntu a kupyana eshina na nsenga yaaye nya. (Bansushi 11:34) Sunga mbyabya, Yefetee baadi na lukumiino p’aye kwakula’shi: “Ami nee mwakule naashadika kumpala kwa Yehowa, byabya ntshii mulombeene kwialusha kumongo nya.” (Bansushi 11:35) Yehowa baadi mukumiine mulambu ukata wa Yefetee na kumwelela myabi. We mulombeene kwikala na lukumiino bu lubaadi nalo Yefetee su?

15. Bebungi ba kwatudi mbakite mutshipo kinyi, na twi kuleesha’shi twi na lukumiino naminyi?

¹⁵ Nsaa yatubalambwile muwa wetu kwi Yehowa, tubeelele mutshipo wa kukita akikyebe eshimba dyaye sunga byekala naminyi. Tubaadi atuuku’shi ta mbibofule bwa kulombasha mutshipo wetu nya. Kadi binobino atukitaa naminyi su abetutekye bwa kukita kintu kyatushabakumiina? Su atukambila binangu byetu na kukookyela Efile Mukulu eetu, atuleesha’shi twi na lulamato ku mutshipo wetu. Milambu yeetu ngilombeene kwitufwishisha kinyongwa, anka myabi ya Yehowa ngikile byoso. (Malakii 3:10) Kadi twi kwamba kinyi bwa mwana a Yefetee? Baadi mukite namu kinyi bwa mutshipo wa nshaye?

16. Mwana a Yefetee baadi mukite kinyi ku mulayilo wa nshaye? (Tala kifwatulo ki kumbangilo.)

¹⁶ Mutshipo wa Yefetee ubaadi wilekeene na wa Aana. Mwanda Aana baadi mulee bwa kutuusha mwan’aye Samwele bwa’shi afube ku tabernakele bu Munaazi. (1 Samwele 1:11) Munaazi baadi na kya kwibakila na kutanda bana. Kadi mwana a Yefetee baadi mutushiibwe bu “mulambu wa kushiika,” nyi bwakinyi tabaadi mulombeene kutwela ku bulunda na kutanda mwana. (Bansushi 11:37-40) Banda namu kunangushena uno mwanda! Pangi abaadya kumwibakila kwi muntu mukata mwanda nshaye baadi mukunkushi a Isaleele. Anka baadi na kya kufika mufubi sha kwiyisha ku tabernakele. Uno nsongwakashi baadi mukite kinyi? Baadi muleeshe’shi mmutuule mufubo wa Yehowa pa mbalo ya kumpala p’aye kulungula nshaye’shi: “Nkitshiine muyiile kishima kituukye mukanwa mobe.” (Bansushi 11:36) Baadi mulambule lukalo lwaye lwa kwikala na mulume na kutanda bana bwa kufubila Yehowa. Mushindo kinyi watudi balombeene kwambula uno mweneno a kwilambula?

17. (a) Twi kwambula lukumiino lwa Yefetee na mwan’aye naminyi? (b) Mayi e mu mukanda wa Beena-Ebelu 6:10-12 aakukankamika bodya kwilambula naminyi?

¹⁷ Bansongwa bebungi balume na bakashi mbakumiine kushaala bukupi sunga kupela kutanda bana munda mwa mafuku. Bwakinyi? Mwanda abakumiina kwipaana bikata ku mufubo wa Yehowa. Bakwetu bebungi abaapu kukula abalambula nsaa yabo yabadya kukisha na bana sunga beekulu baabo. Anka, abapa Yehowa nsaa na bukome bwabo. Bangi ba kwabadi bakwete kufuba mu mudimo wa lwibako sunga kwenda mu Kalasa ka Balungudi ba Bufumu na kwenda mu tukongye twi na lukalo lukata lwa balungudi. Bangi abelumbuulaa bwa kutamisha mudimo wabo wa Yehowa mu kipungo kya Kitentekyesho. Yehowa te bya kuluba kifulo na kwipaana kwa bafubi baaye be na lulamato nya. (Badika Beena-Ebelu 6:10-12.) Kadi’obe namu? We mwilumbuule bwa’shi otuushe milambu bwa kutamisha mufubo wa Yehowa su?

MALONGYESHA KINYI ATUBAPATE?

18, 19. Tubalongo kinyi ku mwisambo wa mu Bible pabitale Yefetee na mwan’aye, na twi kwibambula naminyi?

¹⁸ Nkinyi kibakwashishe Yefetee bwa kukambila nkalakashi? Baadi mutadiile Yehowa bwadya kumukunkusha mu bitshibilo byaye. Tabaadi mutadiile bantu bebubi bwa’shi bashintuule mwikeelo waye. Akupu, bashadile na lulamato sunga mbibaadi bangi bantu bamushikwe. Yehowa baadi mwelele Yefetee na mwan’aye myabi bwa milambu yabo, na nkwibafubisha bwa kuyiisha lulangwilo lwa binyibinyi kumpala. Sunga mbibaadi bangi bayimikye kukita myanda ibuwa, Yefetee na mwan’aye abasheele nka na lulamato kwi Yehowa.

¹⁹ Bible akula’shi: “Nwikale abaambula baaba abakapiana kiakia kibalayilwe, pa lukumiino na lwishinko lwabo.” (Beena-Ebelu 6:12, Kilombeno kipya 2014) Byabya, twambuleyi Yefetee na mwan’aye, na kuuka’shi patushaala na lulamato, Yehowa etwelela myabi.