Lekayi “kunyingamana kulombashe mufubo wâko”

1, 2. (a) Kunyingamana kwa Gideone na basalayi baaye 300 akwitulongyesha kinyi? (Tala kifwatulo ki ku mbangilo.) (b) Muyile mukanda wa Luuka 21:19, bwakinyi kunyingamana kwi na muulo?

BANDA kutompa kunangushena ngoshi ikata pankatshi pa basalayi ba beena Isaleele baabakunkusha kwi Nsushi abetanyina bu Gideone na beshikwanyi naaye. Gideone na bantu baaye abebingeena na beena Madyane na booso baadi mwibungye nabo bufuku bushima kipindji kya bula bwa bilometre peepi 32! Bible etulungula kibaadi kikitshikye kunyima’shi: “Gideone baafikile ku Yoordano, baasabukile, aye na bantu nkama isatu babaadi naaye. Sunga bibaabadi bakookye ngofu.” Abaadi na kya kulwa na basalayi 15 000 sunga byekala’shi kasha tababandjile kutshola ngoshi ungi musango. Beshikwanyi baabo babaadi bakyengeshe beena Isaleele munda mwa bipwa bibungi, nyi bwakinyi tababaadi na kya kwibalekyela nya. Gideone na basalayi baaye abayididiile na kwibingeena na beshikwanyi nabo mpa na kwibatshokola!​—Bansushi 7:22; 8:4, 10, 28.

² N’atwe namu tukwete kulwa ngoshi ibukopo na ayitukookyesha. Mu beshikwanyi neetu mwi Satana, uno ndumbulwilo na kukutwa kwetu kwa kupwidika. Bangi ba kwatudi mbalwe na bano b’eshikwanyi munda mwa bipwa bibungi. Twi batshokole ino ngoshi ku bukwashi bwa Yehowa. Anka tatwabandile kutshokola ngoshi ya nfudiilo nya. Ingi nsaa twi kukooka bwa kulwa ngoshi. Sunga’shi twi balombeene kukooka mwanda wa kutengyela nfudiilo a uno ndumbulwilo e bubi munda mwa mafuku ebungi. Yesu bambile’shi twi na kya kupeta nkalakashi na kukyengeshibwa mu ano mafuku a ku nfudiilo. Anka bambile’shi su twanyingamana, twi balombeene kutshokola. (Badika Luuka 21:19.) Kunyingamana akuleesha kinyi? Nkinyi ki kwitukwasha bwa kunyingamana? Twi kulonga kinyi kwi bantu babaadi banyingamane? Na mushindo kinyi watudi balombeene kutadiila “kunyingamana kulombashe mufubo wâko”?​—Shake 1:4, EEM.

KUNYINGAMANA AKULEESHA KINYI?

3. Kunyingamana akuleesha kinyi?

³ Mu Bible, kunyingamana takuleesha penda kukumiina sunga kutadiila nkalakashi kampanda nya. Akuleesha dingi mushindo watunangushena na watupusha pabitale bitompwanga. Kunyingiila akwitukwasha bwa kwikala n’eshimba dinyingye, lukumiino na lwishinko. Ungi mukanda awakula’shi kunyingamana nyi eyikashi aditukwasha bwa kwikala na lukulupilo lukata na kupela kukooka patudi mu bitompwanga. Akwitukwasha bwa kushala banyingye kushi kupampakana sunga mu bitompwanga bi bukopo. Akupu, kunyingamana akwitukwasha bwa kwaluula bitompwanga mu muloo na kutuula binangu byetu ku katupwito keetu kushi ku makyenga atudi nao.

4. Bwakinyi twi kwakula’shi kifulo akikwasha bwa kunyingamana?

⁴ Kifulo akitukwasha bwa kunyingamana. (Badika 1 Beena-Kodinda 13:4, 7.) Mu kipaso kinyi? Kifulo bwa Yehowa akitutakula bwa kunyingiila mwanda ooso watadiila bwashi witufikile. (Luuka 22:41, 42) Kifulo bwa bakwetu akitukwasha bwa kunyingameena bilubilo byabo. (1 Mpyeele 4:8) Kifulo bwa mwina dibaka neetu akitukwasha bwa kunyingameena “nkalakashi” ayikwataa mpa na beena dibaka be mu muloo na kwitukwasha bwa kunyingisha eyibakishi dyetu.​—1 Beena-Kodinda 7:28.

NKINYI KYA NKUKWASHA BWA KUNYINGAMANA?

5. Bwakinyi Yehowa nyi mmulombanyine kwitukwasha bwa kunyingamana?

⁵ Teka Yehowa bwa’shi akunyingishe. Yehowa nyi “Efile Mukulu a katshintshi na sha kusambana.” (Beena-Looma 15:5) Nka penda’ye nyi auku akitukalakasha, byatupusha na kuuka byatudi bakule. Byabya, auku kalolo kyatudi nakyo lukalo bwa kunyingiila. Bible akula’shi: “Akumbasha akikyebe abamutshiinyi, ateemesha misaase yaabo, eebapaasha.” (Misambo 145:19) Kadi, nkipaso kinyi kilombeene Efile Mukulu kwaluula nteko yeetu bwa kupeta bukome bwa kunyingiila?

6. Muyile abyamba Bible, Yehowa e ‘kwitupa kipaso kya kutuuka’ mu nkalakashi naminyi?

⁶ Patutekye Yehowa bwa kwitukwasha bwatudya kunyingamana mu nkalakashi, mmulee bwa ‘kwitupa kipaso kya kwimutuuka.’ (Badika 1 Beena-Kodinda 10:13.) Ebikitaa naminyi? Ingi nsaa e kukatusha kitompwanga. Kadi bwa misango ibungi, etupeyaa bukome bwatudya kushala “banyingamane mu byoso na lwishinko.” (Beena-Kolose 1:11) Bu byauku kalolo mbidi yetu, binangu na pemeene ngobesha yetu ya kunangushena, Yehowa takatadiila musango su ngumune nkalakashi bwayidya kwitukutshisha kushala na lulamato kwadi.

7. Tuusha kileshesho akileesha bwakinyi twi na lukalo lwa bidiibwa bya mu kikudi bwa kunyingiila.

⁷ Leka bidiibwa bya mu kikudi binyingishe lukumiino loobe. Bwakinyi bidiibwa bya mu kikudi bi na muulo? Twate kileshesho: Bwa kukaamina mwengye ula, abitungu’shi muntu adye bidiibwa bya mafuku asatu sunga ananka mu efuku dimune. Mu mushindo umune, twi na lukalo lwa bidiibwa bya mu kikudi bibungi. Abitungu twikale na kitshibilo kya kwata nsaa ya kwilongyela na kutwela mu bisangilo. Kukita ino midimo akwitupa bukome bwatudya kulama lukumiino lwetu lunyingye.​—Yowano 6:27.

8, 9. (a) Muyiile mukanda wa Yoobo 2:4, 5, nkalakashi yeetu ngitale kinyi? (b) Poodi mu bitompwanga, mmwanda kinyi oodi mulombeene kumona mu binangu?

⁸ Tetenkyesha lulamato loobe kwi Efile Mukulu. Patudi mu bitompwanga, kwi myanda ibungi i mu kutompibwa kukila makyenga atudi nao. Lulamato lwetu kwi Yehowa lwi mu kutompibwa. Kipaso kyatukitshi apetukwa bitompwanga akilesha su tukwete kumona Yehowa bu Nfumu a eyilu na nsenga. Mu mushindo kinyi? Satana mmwishikwanyi a Efile Mukulu baadi mutombokyele bukunkushi bwaye p’aye koolomona Yehowa’shi bantu abamufubila penda bwa buwa bwabo. Satana bambile’shi: “Kyooso kiinakyo muntu, ekipaana bwa muwa waye.” Satana baakwile dingi pabitale Yoobo’shi: “Kumiina kwol’eyaasa, okume ku mifufwa yaaye na ku mbidi yaaye. Nakushinkamiisha’shi akutshipi patooka.” (Yoobo 2:4, 5) Satana mmushintulukye kasha akula ano mayi su? Nya! Pabaabadi bamubingye mwiyilu kunyima kwa bipwa bibungi, baadi mutungunukye na kufunda bafubi b’Efile Mukulu baasha lulamato. (Kibafumbwilwe 12:10) Lelo uno, Satana kwete kutungunuka na kwakula’shi bantu bakwete kulangwila Efile Mukulu mwanda wa buwa bwa’bo. Akumiina kwitumona kwatusumbula matalwa a Efile Mukulu a kumunana na kupela kumufubila.

⁹ Nsaa Ayikukyengesha kitompwanga, kimba bya kumona mu binangu uno mwanda: Satana na bademo be ku lwabo lupese. Abatala kyokyebe kukita mwanda abamba’shi okooko. Ku lungi lupese namu, kwi Yehowa, Nfumwetu Yesu Kidishitu, bediibwe mwimu bapwe kusanguka be mwiyilu na binunu bya miikeyilu. Bakwete nkumona byokwete kwitatshisha, kadi abakukankamika! Be na muloo wa kumona’shi we mulombeene kunyingamana na kushaala na lulamato kwi Yehowa. Kunyima opusha Yehowa akulungula’shi: “Ikala sha-binangu, mwan’ande, eshimba dyande disangale, dingi Neekala mulombeene kwaluula ampeesha.”​—Nkindji 27:11.

10. We kwambula Yesu pa kutuula binangu ku efuto bwa kunyingiila naminyi?

¹⁰ Tuula binangu ku efuto di kumpala. Pwandjikisha’shi we mu lwendo. Munkatshi mw’eshinda, abitungu otambukye kipindji mu eshinda dya muushi mwa nsenga. Mwi mufito mpese yooso. Kadi ouku’shi su bootungunuka na kwenda mw’ishinda dya muushi mwa nsenga, p’okemutuuku okamono dingi etaata. Nshaleelo eetu e nka bu lwalwa lwendo. We mulombeene kutwela mu bipungo bi bukopo, na kupusha myanda bu ibakukambila. Mpa na Yesu bapushishe byabya. Nsaa ibabaaba abamwipaa ku mutshi wa makyenga, abaadi bamubepuule na kumukyengyesha ngofu. Uno nyi mwanda ukile bukopo ubaadi mupete mu muwa waye! Nkinyi kibamukwashishe bwa kunyingamana? Bible akula’shi baadi atala “muloo ubaadi umutuudilwe kumpala.” (Beena-Ebelu 12:2, 3, Kilombeno kipya 2014) Yesu baadi mwimeene p’efuto dya kunyingamana kwaye, na mwanda wi na muulo, baadi na kya kukwatshisheena mu kwikasha kw’eshina dy’Efile Mukulu bu dya kishila na kukwatshisheena matalwa aaye a kumunana. Baadi auku’shi dikyenga ndya kapindji kapeela na’shi efuto dyakapete mwiyilu ndya ikalaika. Lelo uno, we na nkalakashi ilombeene nkutabukila na nkukyengyesha, kadi tentekyesha’shi i kwanka bwa kapindji kapeela.

“BANTU ABÁDI BANYINGAMANE”

11. Bwakinyi abitungu tutaluule bileshesho bya “bantu abádi banyingamane”?

¹¹ Tatwi bupenka mu kunyingiila mu bitompwanga nya. Bwa kukankamika beena Kidishitu bwa kunyingiila ku bitompwanga bya Satana, Mpoolo mutumiibwa bafundjile’shi: “Mushinamineeyi, nunyingye mu lukumiino, nwikale bawukye’shi bakwenu bee pa nsenga bee mu mpombo yaa mumune.” (1 Mpyeele 5:9) Bileshesho bya “bantu abádi banyingamane” abitulongyesha byatudya kushaala na lulamato, abitushinkamiisha’shi twi bya kutshokola, na abitutentekyesha’shi atukapete afuto kukidila ku lulamato lwetu. (Shake 5:11, EEM) Tubandeyi kutaluula bileshesho bipeela.^[1]​—Tala mayi e ku nfudiilo.

12. Nkinyi akitulongyesha kileshesho kya ba kerubime mu Edene?

¹² Ba kerubime mba mikeyilu be kunundu kwa bangi. Kunyima kwa Adame na Eeva kukita mulwisho, Yehowa bapeele bangi ba Kerubime ungi mudimo pa nsenga. Ubaadi wilekeene ngofu na ubaabadi nao mwiyilu. Kileshesho kyabo akitulongyesha byatudi balombeene kunyingiila patudi na mudimo wi na nkalakashi. Bible akula’shi Yehowa: Baatudile “ba kerubime dya kutunduka-nguba kwa lupango lwa Edene, na mwele wa ndimi ya kaalo bwa kulam’eshinda dya ku mutshi wa muuwa.”^[2] (Tala mayi e ku nfudiilo.) (Kibangilo 3:24) Bible taakula’shi ba kerubime babaadi batompole sunga kupusha bu be na muulo kukila bangi bwa mudimo upya ubabapetele. Tababaadi bakookye sunga kuleka mudimo wabo nya. Anka babasheele ku mudimo wabo mpa nka na paubapwile, pangi ubapwile mu mafuku a Mpeshi a kyeeshi kunyima kwa bipwa 1 600!

13. Nkinyi kibapeele Yoobo bukome bwa kunyingiila nkalakashi?

¹³ Yoobo muntu sha lulamato. We kufiita munda ingi nsaa mwanda wa kuuku sunga mwina kifuko bakulungula mwanda aukukookyesha. Pangi namu we kwikala na mukumbo wibukopo sunga kwikala na kinyongwa bwa mukwenu a kifulo baafu. Sunga ofumankana na mwanda wi naminyi, we kupeta kunyingishibwa ku kileshesho kya Yoobo. (Yoobo 1:18, 19; 2:7, 9; 19:1-3) Yoobo tabaadi auku bwakinyi baadi akyenge sunga kwikala na bitompwanga bibungi, anka, tabaadi mubofule nya. Nkinyi kibamukwashile bwa kunyingiila? Kya kumpala, baadi mufule Yehowa na kukita abimusangasha. (Yoobo 1:1) Yoobo baadi akumiina kusangasha Yehowa mu bipungo bibukopo na mu bipungo bibuwa. Na dingi, Yehowa bakwashishe Yoobo bwadya kumona bukome Bwaye paye kumulungula pabitale myanda ya kukanya Yadi mupangye. Bino bibaadi binyiishe kushinkamiisha Yoobo’shi Yehowa mmulombeene kupwa makyenga aaye mu kipungo kilombane. (Yoobo 42:1, 2) Na bino nyi bibaadi bikitshikye. “Yehowa baalwishe Yoobo bupeta bwaye nguba abakyenganga, Aye nkumwalwisha bwanka misusa ibidi. Yoobo bafwile mununu bibi mulaale mafuku eebungi.”​—Yoobo 42:10, 17.

14. Muyiile 2 Beena-Kodinda 1:6, kunyingiila kwa Mpoolo kubaadi kukwashe bangi mu kipaso kinyi?

¹⁴ Mpoolo mutumiibwa. Okwete kukyengyeshibwa sunga kubingwabingwa su? Su we mukulu mu kakongye sunga mukunkushi a kifunda, okwete kupusha’shi we na midimo ikile bungi? Su mbyabya, kileshesho kya Mpoolo nkilombeene nkukwasha. Mpoolo baadi mubingwebingwe, kadi baadi ekalakasha bwa bakwabo mu kakongye. (2 Beena-Kodinda 11:23-29) Anka efuku su ndimune Mpoolo tamukookye nya, na kileshesho kyaye kibaadi kinyingishe bangi. (Badika 2 Beena-Kodinda 1:6.) Kunyingiila koobe nkulombeene kunyingisha bangi bwabadya kunyingiila namu.

OKATADIILA KUNYINGAMANA BWAKUDYA ‘KULOMBASHA MUFUBO WÂKO’ MOODI SU?

15, 16. (a) “Mmufubo” kinyi autungu’shi kunyingamana kulombashe? (b) Tuusha kileshesho akileesha byatudi balombeene kuleka “kunyingamana kulombashe mufubo wako.”

¹⁵ Mulongi Shake bafundile ku bukwashi bwa kikudi kiselele’shi: “Abitungu’shi kwakwa kunyingamana kulombashe mufubo wâko munda mwenu, bwanudya kwikala bantu balombanyinyîne, bashi balobeshe kintu.” (Shake 1:4, EEM) Kunyingamana nkulombeene kulombasha “mufubo” wako mwatudi naminyi? Nsaa yatudi mu nkalakashi, twiukye’shi abitungu twikale na lwishinko lwibungi, kusangeela ingi myanda sunga kwikala na kifulo. Bu byatukwete kunyingiila bitompwanga, atulongo bya kunyisha kuleesha ino ngikashi, na bino abitukwasha bwa kulumbuula bwina Kidishitu bwetu.

¹⁶ Bu bikale’shi kunyingiila kwi kwitwikasha beena Nkidishitu bebuwa, tatwi balombeene kwipa mwiya wa Yehowa bwatudya kupudisha lukalakashi lwetu. Bu kileshesho, su okwete kulwa ngoshi na binangu bibubi, tokitanga mwanda wa nkutwesha mu kutompibwa nya! Teka Yehowa akukwashe bodya kuleka kwela binangu bibubi. We na muntu a mu kifuko kwete nkubingabinga su? Tobofulanga nya! Ata kitshibilo kya kuyididiila na kufubila Yehowa. Byabya, okanyingisha lukulupilo loobe mwi Yehowa. Tentekyesha’shi: Bwa kukuminyibwa n’Efile Mukulu abitutungu tunyingiile.​—Beena-Looma 5:3-5; Shake 1:12.

17, 18. (a) Tuusha kileshesho akileesha bwakinyi bi na muulo bwa kunyingiila mpa na ku nfudiilo. (b) Bu byatunyisha kwifubwila ku nfudiilo, abitungu twikale na lukulupilo kinyi?

¹⁷ Abitungu tunyingiile mpa na ku nfudiilo, kushii penda bwa kapindji kapeela. Banda kupwadikisha’shi mashuwa a mema akwete kwiyina. Bwa kupanda abitungu’shi bantu be mwanka bayowe mu meema mpa na ku kyeese. Su muntu balekye kuyowa afu. Mu mushindo umune, su muntu bakooko dingi kumpala kwa kufika ku kyeese afu naye namu. Su atukumiina kutwela mu nsenga ipya, abitungu tuyididiile na kunyingiila. Byabya, tulondeyi kileshesho kya Mpoolo mutumibwa bakwileshi: “Tatubofula ku mashimba.”​—2 Beena-Kodinda 4:1, 16.

¹⁸ Nka bu Mpoolo twi bashinkamishe kalolo’shi Yehowa etukwasha bwa kunyingiila mpa na ku nfudiilo. Mpoolo bafundjile’shi: “Twi na ngobesha mwi uno mwitufule. Oolo ne mushinkamishe’shi: Sunga ndufu, sunga muuwa, sunga miikeyilu, sunga mafumu, sunga byaa-binobino, sung’abifiki, sunga matalwa, sunga makome a mwiyilu, sunga a muushi mwa nsenga, sunga kingi kipangwa kampanda, takwi kintu kilombeene kwitulamuuna ku kifulo ky’Efile Mukulu kitufumbwilwe mu Yesu Kidishitu, Nfumwetu.” (Beena-Looma 8:37-39) Eyendo’shi ingi nsaa atufikaa mu kukooka. Anka twambuleyi Gideone na basalayi baye. Sunga byekala’shi abaadi bakookye, tababaadi babofule nya. “Babaadi abende na kwibingeena na balwishi” baabo!​—Bansushi 8:4.