Ambula kunyingila kua Yehowa

1-2. Mayi a Yehowa e mu Yeeshaya 65:16,17 aetunyingisha bua kupela kukoka naminyi?

MUTUE wa muanda wa kikongeno kia mafuku asatu kia mu 2017 ubadi awamba’shi, “TOKOOKANGA!” Programe badi muituleshe bia kunyingila nkalakashi yetu. Kubapu kukila bipua binanka, anka tukuete kutungunuka ka kunyingila nshalelo a mu uno ndumbuluilo e bubi.

² Nkalakashi kinyi y’okuete kunyingila binobino? Lufu lua muina kifuko nobe su ndua kuuku obe a p’eshimba? We na mukumbo wi bukopo su? Nkalakashi ya bununu su? Masaku aatukila ku bintu bipangibue, buntomboshi, su kubinguabingua? Sunga’shi okuete kukienga pa muanda wa mukumbo bu kipupa kia COVID-19, sunga kingi? Tukuete kutengiela n’eshimba kuiyilu efuku adikapu bino bioso, diatukebilua, na diabish’abikitshika dingi!​—Badika Yeeshaya 65:16, 17.

3. Nkinyi akitungu tukite kubanga binobino, na buakinyi?

³ Nshalelo mu uno ndumbuluilo e bukopo, anka pangi atukapete ikile bukopo mu mafuku aafiki. (Mat. 24:21) Biabia, abitungu tunyishe kunyingila. Buakinyi? Muanda Yesu bakuile’shi: “Ikalai banyingamane, mwanda mu kyakya kipaso anukalama myuwa yenu.” (Luk. 21:19) Atuikala na ngobesha ya kunyingila su atunangushena ku bileshesho bia bangi abanyingila nkalakashi imumune na yetu.

4. Buakinyi atuamba’shi Yehowa nyi kileshesho ki buwa kia kunyingila?

⁴ Nkileshesho kinyi ki buwa kia kunyingila? Kia Yehowa Efile Mukulu. Pangi luno lualulo lubakukanyisha. Anka su onangushena pa luanka, opusha kalolo. Ino nsenga i ku bukunkushi bua Diabulu, na ngiule na nkalakashi. Yehowa e na bukome bua kuiyipudisha binobino, kadi kuete kutengiela bua kuibikita mu mafuku aafiki. (Lom. 9:22) Anka Efile Mukulu kuete kunyingila mpa na efuku di’akabutula uno ndumbuluilo. Tutalulei mianda kitema ailesha buakinyi Yehowa kuete kunyingila.

NKINYI KIKUETE KUNYINGILA YEHOWA?

5. Mushindo kinyi ubadi usabulue eshina di’Efile Mukulu, na obe opusha naminyi?

⁵ Kusabulua ku’eshina diaye. Yehowa mufule eshina diaye, na akumina’shi muntu oso edinemekie. (Yesh. 42:8) Eshina diaye di buwa, ndisabulue takudi bipua bifikie ku binunu bisamombo. (Mis. 74:10, 18, 23) Bino bibabangile mu lupango lua Edene nsaa ibadi Diabulu (eshina adipushisha’shi “muntu adimbilaa bantu myanda”) mudimbile Efile Mukulu’shi t’akumina’shi Adama na Eva bekale na kintu kiabadi nakio lukalo bua kuikala na muloo. (Kib. 3:1-5) Kubanga nka paapa, Yehowa bakuete kumudimbila’shi, t’akumina kupa bantu kiakia kiabadi nakio lukalo. Yesu badi akalakashua ngofu, pabadi eshina dia Nshaye, kubadi. Nyi buakinyi, Yesu badi mulongieshe balongi baye buabadia kuteka’shi: “Shetu e mwiulu, eshina diobe dikale dia kishila.”​—Mat. 6:9, Kilombeeno kipya 2014.

6. Buakinyi Yehowa mulekie nsaa i bungi kumpala kua kulesha’shi aye nyi e na matalua a kumunana muyilu na pa nsenga?

⁶ Kutombokiela matalua aye a kumunana. Nka penda Yehowa nyi e na matalua a kumunana muiyilu na pa nsenga, na mushindo waye wa kumunana ngukile buwa. (Kibaf. 4:11) Anka Diabulu badi mutakule ba mikeyilu na bantu mu kuela binangu’shi Efile Mukulu te na aa matalua. Bibadia kuata mafuku e bungi bua kulesha patoka’shi Yehowa e na matalua a kumunana na’shi Mfumu e buwa. Nyi buakinyi, Efile Mukulu mutadile bua’shi bantu bakunkushe munda mua mafuku e bungi, buabadia kumona’shi ta mbalombene kobesha kushi kutemesha Mupangi. (Yel. 10:23) Pa muanda wa luishinko luaye, muntu su ngumune t’elesha mpaka’shi Efile Mukulu nyi e na matalua a kumunana muiyilu na pa nsenga. Bantu boso abakashikamisha’shi mushindo wa kumunana wa Yehowa ngukile buwa, na’shi nkapenda Bufumu buaye nyi abukatuesha butale bua binyibinyi na kuiyikela pa nsenga.

7. Mbananyi batombokiele Yehowa, na nkinyi kia kebakitshi?

⁷ Kutomboka kua bangi bana baye. Yehowa badi mupangie bamikeyilu na bantu, boso bapuidikie. Anka umune a ku ba mikeyilu baye; Satana (eshina adipushisha’shi “Muishikuanyi”) badi mutakule Adama na Eva bantu bapuidikie mu kutombokiela Yehowa. Bangi ba mikeyilu na bantu abaadi bamulonde mu buntomboshi buaye. (Yu. 6) Kunyima kua mafuku, mpa na bena Isaleele, babadi Efile Mukulu musangule bu muilo waye, abadi bamusumbushene na abo nkubanga kulanguila b’efile ba madimi. (Yesh. 63:8, 10) Kushi mpaka, bino bibadi bitonde Yehowa. Anka, badi munyingile, na atungunuka na kunyingila mpa na apakalombana nsaa ya kubutula boso ba ntomboshi. Akupu, Yehowa na boso bamulamate abakekala na muloo, muanda tabekala dingi na kia kunyingila uno ndumbuluilo e bubi!

8-9. Mianda kinyi ya madimi yabakuete kulongiesha pabitale Yehowa, na nkinyi kiatudia kukita?

⁸ Madimi a Diabulu. Satana badi mudimbile Yobo mufubi mululame a Yehowa, pa kuamba’shi bafubi boso ba sha lulamato b’Efile Mukulu, abamufubila penda bua buwa buabo. (Yob. 1:8-11; 2:3-5) Diabulu ki’atungunuka na kuibikita mpa na lelo uno. (Kibaf. 12:10) Atukuasha mu kulesha patoka’shi Satana sha madimi pa kunyingila nkalakashi na pa kushala na lulamato kui Yehowa muanda tui bamufule. Nka bu Yobo, Yehowa aketuelela miabi muanda wa kunyingila kuetu.​—Shak. 5:11.

⁹ Satana kuete kufubisha bakata ba bipuilo bia madimi bua kulongiesha’shi Yehowa ntomboshi, na’shi naye nsulo ya makienga a bantu. Bangi abamba’shi, nsaa ayifu muana, Efile Mukulu nyi bamuata muanda e na lukalo lua bangi ba mikeyilu muiyilu. Kuno nyi nkukutua kua kanemo bu’Efile Mukulu! Anka atuuku kalolo’shi Yehowa nyi Nshe-bana sha kifulo. T’atutopekanga Efile Mukulu nsaa y’atudi na mukumbo wi bukopo sunga nsaa y’atufuisha muntu atudi bafule. Kadi, tui na lukumino’shi dingi efuku, akapasha ba sha mikumbo na kusangula bantu bafue. Na atulungula muntu oso etutemesha’shi Yehowa nyi Efile Mukulu sha kifulo. Bino abikuasha Yehowa bua kualula uno kuete kumolomona.​—Nki. 27:11.

10. Mukanda wa Misambo 22:24, 25, aulesha kinyi pabitale Yehowa?

¹⁰ Kukienga kua bafubi baye badi mufule. Yehowa nyi Efile Mukulu sha lusa. Enyongolaa nsaa y’etumono atukiengie, pangi muanda wa kubinguabingua, maladi sunga kukutua kuetu kua kupuidika. (Badika Misambo 22:24, 25.) Yehowa auku nkalakashi yetu, akumina kuiyimika, na eyimika. (Puandjikisha na Efilu 3:7, 8; Yeeshaya 63:9.) Akukafiki efuku ‘di’aketukumuna mpolo yoso. T’akukekalanyi lufu, sunga mmâlo, sunga nkutompola, sunga mmitanyo.’​—Kibaf. 21:4, EEM.

11. Yehowa apushaa naminyi pabitale bafubi baye ba sha lulamato bapue kufua?

¹¹ Lufu lua ba kuuku baye. Yehowa apushaa naminyi pabitale balume na bakashi ba sha lulamoto bapue kufua? E na lukalo lua kuibamona dingi! (Yob. 14:15) Banda kunangushena lukalo luinalo Yehowa lua kumona dingi kuuku aye Abrahama! (Shak. 2:23) Sunga Moyise, abadi muisambe naye ‘mpala kua mpala’? (Efi. 33:11) Na mushindo w’atengiela kupusha Davide na tungi tuyiba, kuatuyimbi ngono i buwa ya kumutumbisha! (Mis. 104:33) Sunga biabidi’shi bano ba kuuku b’Efile Mukulu mbapue kufua, Yehowa tamuibailue. (Yesh. 49:15) Atentekiesha ka muanda koso pabibatale. Bible amba’shi, “kwadi’ye booso bee na muwa.” (Luk. 20:38, Kilombeeno kipya 2014) Dingi efuku akebasangula, na akupusha dingi nteko yabo aikatukila kuishimba na kukumina lulanguilo luabo. Su wemufuishe muntu odi mufule, ano mayi ngalombene kunyingisha.

12. Nkinyi akikamba kukalakasha Yehowa ngofu mu ano mafuku e bubi?

¹² Bantu abakiengiesha bangi. Nsaa ibadi buntomboshi bubangie mu Edene, Yehowa badi auku’shi mianda ainyisha kuluila kumpala kua’shi ilumbulukie. Yehowa mmushikue bukitekite, kukutua kua kululama, na buntomboshi bi mu nsenga lelo uno. Apasukilaa boso babofule, bashi na muntu a kuibakaluila bu bana ba nshiye na bakashi ba mulufuila. (Sek. 7:9, 10) Yehowa akalakashua ngofu, bikishekishe nsaa y’amono abakiengiesha bafubi baye ba sha lulamato na kuibela mu nkano. Ikala mushinkamishe’shi, mufule boso abanyingila naye pamune.

13. Muikelo kinyi wi bubi ukuete kumona Efile Mukulu munkatshi mua bantu, na nkinyi kiakakitshi?

¹³ Bantu mbafule muwa wa lusandi bikilekile. Bantu mbapangibue bua kuambula Efile Mukulu, anka Satana akumina’shi bakite mianda i butete. Nsaa ibadi Efile Mukulu ‘mumone’shi bubi bua bantu bubaady’abwend’abufiimanga,’ mu mafuku a Nowa, “Yehowa nkwikalashena bwa pabadi mupangye muntu pa nsenga. Pa wawa mwanda, aye nkwinyongola.” (Kib. 6:5, 6, 11) Mianda ngilumbulukie kubanga paapa su? Nya! Diabulu e na muloo p’amono bantu abakitshi mianda i butete mu mishindo yoso, bu kutambuka lusandi kua bantu bashi beyibakishene na kua balume na balume sunga bakashi na bakashi! (Ef. 4:18, 19) Satana e na muloo wi bungi, nsaa i balanguidi ba Yehowa abakitshi muluisho ukata. Nsaa ayikapu luishinko lua Yehowa, akalesha’shi mmushikue bantu ba sha muikelo wi butete bash’abakumina ku shintuluka.

14. Bantu bakuete abakitshi nsenga na nyema kinyi?

¹⁴ Kuluisha kua bipangua. Muntu takuete penda ‘kutonta muinaye bua kumumuesha malwa’ nya, anka kuete dingi kuluisha nsenga na kukiengiesha nyema imupe Yehowa bua kuiyipasukila. (Mul. 8:9, EEM; Kib. 1:28) Bangi bena sianse abalesha’shi, bintu abikitshi bantu mbilombene kushimisha mudiyo umune wa nyema ilekene na mitshi munda mua bipua bipela kumpala. Mbibofule kupusha buakinyi bantu abekalakasha pabitale abiluila bintu bipangibue! Yehowa mmulee’shi ‘akabutula baba abaluisha nsenga’ na kuikasha nsenga mpaladiso.​—Kibaf. 11:18; Yesh. 35:1.

AKITULONGIESHA KUNYINGILA KUA YEHOWA

15-16. Nkinyi akitutakula bua kunyingila pamune na Yehowa? Tusha kileshesho.

¹⁵ Banda kunangushena nkalakashi bungi inyingile Nshetu e muiyilu munda mua bipua binunu. (Tala kashibo akamba’shi: “Mianda ikuete kunyingila Yehowa.”) Yehowa mulombene kufudisha uno ndumbuluilo e bubi nsaa yoso y’akumina. Anka luishinko luaye nduitukuashe ngofu! Banda kupuandikisha uno muanda. Abalungula ungi mulume na mukashi’shi, muan’abo ki munda, atandikua na mukumbo na’shi nshalelo aye t’ekala mubofule nya, na dingi afu nka aye ki mukinga. Sunga mbiabia, be na muloo nsaa ibatandikua yawa muana sunga abibelela bukopo bua kukusha yawa muana. Pa muanda wa kifulo bua muana abo, abanyingila lukalakashi loso nka bua’shi ekale na nshalelo e buwa.

¹⁶ Mushindo umune, bana boso ba Adama na Eva mbakutue kupuidika nsaa ibabadi batandikue. Anka, Yehowa muibafule na ebapasukila. (1 Yo. 4:19) Mukuilekena na baledi ba tutemunanga mu kileshesho, Yehowa mulombene kukita kintu kampanda. Mutshibe nsaa y’akafudisha makienga oso a bantu. (Mat. 24:36) Abitungu kifulo kia Yehowa kitutakule bua kunyingila naye pamune mafuku oso aatungu kunyingila.

17. Buakinyi bino biabadi baleshe Yesu mu Bena-Ebelu 12:2, 3, abitukuasha bua kutungunuka na kunyingila?

¹⁷ Yehowa nyi nkileshesho kipuidikie kia kunyingila. Yesu muambule kunyingila kua Nshaye. Pabadi pa nsenga, Yesu badi munyingile buufu, na mutshi wa makienga pa muanda wetu. (Badika Bena-Ebelu 12:2, 3.) Kushi mpaka, kileshesho kia kunyingila kia Yehowa, kibadi kikuashe Yesu bua kunyingila. Nkilombene kuitunyingisha n’atwe namu.

18. Mukanda wa 2 Mpyeele 3:9, awitukuasha naminyi bu kumona kikuete kukita luishinko lua Yehowa?

¹⁸ Badika 2 Mpyeele 3:9. Yehowa auku nsaa i buwa ya kufudisha uno ndumbuluilo e bubi. Pa muanda wa luishinko luaye, bantu be bungi mbafikie mu kumuiuka, na lelo uno kui kibumbu kikata kia bantu midiyo kikuete kumulanguila. Boso buabo be na lutumbu muanda Yehowa mwindile kipindi kila bua’shi batandikue, balongie bua kumufula, na belambule kuadi. Kitshibilo kia Yehowa kia kunyingila akikamueka patoka, nsaa y’akelela midiyo ya bantu banyingile mpa na ku nfudilo miabi!

19. Abitungu tuikale na kitshibilo kia kukita kinyi, na efuto kinyi di’atupete?

¹⁹ Tubalongo ku kileshesho kia Yehowa bua kunyingila na muloo. Sunga biakudi kinyongua na makienga afwisha Satana, Yehowa e’nka “Efile Mukulu a muloo.” (1 Tim. 1:11, Kilombeeno kipya 2014) Natue namu, tui kushala na muloo patuki’atutengiela’shi Yehowa atooshe eshina diaye, kulesha patoka matalua aye a kumunana, kufudisha buntomboshi, na kupudisha nkalakashi yatudi nayo lelo uno. Tuatei kitshibilo kia kunyingila pa kuuka’shi Nshetu e muiyilu kuete naye kunyingila. Su tubakitshi bino, ano mayi aafiki abinyi bua muntu oso. Amba’shi: “Su muntu mmukankamane [munyingile] pô p’amono malwa, e na wa kusepêla. Mwanda, ê pa kukambila kwakwa kutombibwa, akatambula kilongo kya ngobesha, kwamba’shi mûwa wa ikalaika ubalaile Yehowa kwi baba bamufule.”​—Shak. 1:12, EEM.