Bwakinyi abitungu kwibunga bwa kulangwila?

1-3. (a) Beena Kidishitu mbaleeshe naminyi’shi abakumiinaa kutwela mu bisangilo? (Tala kifwatulo ki kumbangilo.) (b) Nkinyi kyatutaluula mu uno mwisambo?

PABAADI Corinna na bipwa 17, abaadi bakwate nyin’aye bamutuma mu lukano mubaabadi abebafubisha midimo ibukopo. Kunyima, Corinna baadi mukwatshibwe abo nkumutuma mu bilometre binunu na kwabo mu mbalo yabetanyina bu Siberia. Pabaadi kwakwa, baadi adimi mafuba na kumufubisha nka bu mpika. Ingi nsaa abaadi abamufubisha mu mashika ebukopo a milemba kushii kumupa bilamba bya kwibwikila. Sunga mbyabya, Corinna na ungi mukwetu mukashi abaatshile kitshibilo kya kukita mwabo mooso bwa kwenda mu bisangilo bya kakongye.

² Corinna bambile’shi: “Tubaadi atukatuka mbalo ya mudimo ku kyoolwa na kutambuka bilometre 25 bwa kufika pa mbalo ya kwata mashuwa a ndjandja. Mashuwa abaadi akatukye pa nsaa ya kabidi, atwe nkutambuka munda mwa nsaa isamombo kumpala kwa kufika, akupu atwe nkutambuka dingi bilometre ekumi bwa kufika pa mbalo ya bisangilo.” Corinna baadi na muloo ukile wa kukita luno lwendo. Bambile’shi: “Ku bisangilo, tubalongyele Kitenta kya Mulami na kuyimba ngono ya Bufumu. Bibaadi bitukankamikye na kunyingisha lukumiino lwetu.” Bano bakwetu babidi abalukiile kunyima kwa mafuku asatu, kadi mukata a mafuba tabaadi sunga mushinguule’shi abayile mu bisangilo.

³ Bafubi ba Yehowa abakumiinaa kwibunga na bangi. Bu kileshesho, beena Kidishitu ba mu siekele a kumpala abaadi na muloo wa kwibunga pamune bwa kulangwila Yehowa na kulonga myanda imutale. (Bikitshino 2:42) Oolo, noobe naamu okumiinaa kwenda mu bisangilo. Kadi, nka bu bangi bakwetu balume na bakashi, we kumona’shi bi lukalakashi bwa kwikala mu bisangilo byoso. Pangi okumiina kufuba nsaa ibungi sunga’shi we na midimo ibungi ya kukita sunga kupusha mbidi kukooka. Kadi nkinyi kilombeene kwitukwasha bwa kukita kyoso akitungu bwa kwikala mu bisangilo?^[1] (Tala mayi e ku nfudiilo.) Twi kunyingisha balongi beetu ba Bible bwabadya kutwela mu bisangilo pa kyubishi naminyi? Uno mwisambo aupatuula bwakinyi kutwela kwa mu bisangilo (1) akwitukwasha, (2) akukwasha bangi, na (3) kusangasha Yehowa.^[2]​—Tala mayi e ku nfudiilo.

KUTWELA MU BISANGILO AKWITUKWASHA

4. Kwibunga pamune akwitukwasha bwa kulonga pabitale Yehowa mu kipaso kinyi?

⁴ Mu bisangilo abetulongyeshaa. Kisangilo kyooso akitukwashaa bwa kulonga bibungi pabitale Yehowa. Bu kileshesho, tukongye twibungi ntukatukye mu kulonga binobino mukanda wa Efubwile pepi na Yehowa mu kulonga kwa Bible mu kakongye. Opushiishe naminyi patulongyele ngikashi ya Yehowa na apaakulanga bakwenu byabapusha pabimutale? Kushi mpaka, mbino mbikutakule bwa kunyiisha kufula Yehowa. Mu bisangilo, atulongaa dingi myanda ya mu Bible pa kuteemesha miisambo na bileshesho na kupusha kalolo p’ababadika Bible. (Neemi 8:8) Banda kutentekyesha myanda ibungi yatushinguula patubadika Bible na kupusha bantu kwabakula malongyesha abadi bapete.

5. Bisangilo mbikukwashe bwa kufubisha miiya ya mu Bible na kulumbuula mudimo oobe wa bulungudi naminyi?

⁵ Bisangilo abitulongyesha bwa kufubisha byabya byatukwete kulonga mu Bible mu nshalelo eetu. (1 Beena-Tesalonika 4:9, 10) Bu kileshesho, we mupwe kutwela mu kulonga kwa Kitenta kya Mulami kukutakule bwa kukita bibungi mu mufubo wa Yehowa, bwa kulumbuula nteko yobe sunga bwa kufwila bakwetu balume na bakashi lusa su? Bisangilo bya munkatshi mwa lubingo abitulongyesha byatudya kulungula mukandu wibuwa na kwitulongyesha byatudi balombeene kukwasha bangi bwabadya kupusha bya binyibinyi bya mu Bible.​—Mateo 28:19, 20.

6. Bisangilo byetu abitukankamikaa na kwitukwasha bwa kwikala banyingye naminyi?

⁶ Kutwela mu bisangilo akwitukankamikaa. Ndumbulwilo a Satana kwete kukimba kubofusha lukumiino lwetu, akupu e kwitupa kingyongwa kwishimba sunga kwitubofusha mbidi. Anka bisangilo byetu abitunyingisha na kwitupa bukome bwatudya kutungunuka na kufubila Yehowa. (Badika Bikitshino 15:30-32.) Twi besambile misango ibungi mushindo ulombane matemuki e mu Bible. Bino mbilombeene kwitukwasha bwa kunyiisha kushinkamisha’shi milayilo ya Yehowa bwa mafuku e kumpala ayikalombana. Bakwetu balume na bakashi tabetunyingishaa nka penda pabakitshi miisambo nya, abetunyingishaa dingi pabatuusha myaluulo na pabatumbisha Yehowa mu kuyimbanga ngono n’eshimba dimune. (1 Beena-Kodinda 14:26) Patwisamba na bakwetu kumpala na kunyima kwa bisangilo, atunyingishibwa mwanda atwisamba na bakuuku bebungi betufule.​—1 Beena-Kodinda 16:17, 18.

7. Bwakinyi bi na muulo bwa kwikala mu bisangilo byetu?

⁷ Mu bisangilo atupetaa bukwashi bwa kikudi kiselele ky’Efile Mukulu. Yesu kwete kufuba na kikudi kiselele bwa kukunkusha kakongye. Mmwitulungule bwatudya ‘kupusha akyakula kikudi kwi tukongye.’ (Kibafumbwilwe 2:7, Kilombeno kipya 2014) Kikudi kiselele ki kwitukwasha bwa kunyingiila bitompwanga na kulungula mukandu wibuwa kushi kutshiina. Ki kwitukwasha dingi bwa kwata bitshibilo bibuwa. Nyi bwakinyi abitungu twikale atukitshi mwetu mooso bwatudya kutwela mu bisangilo bwa kupeta bukwashi bwa kikudi kiselele ky’Efile Mukulu.

ATUKWASHA BANGI MU BISANGILO

8. Nsaa yabetumono kwi bakwetu mu bisangilo, yabapusha kwatutuusha myaluula na kwatuyimbi, abibakwasha naminyi? (Tala dingi kashibo akamba’shi: “Akatukaa misango yooso na muloo.”)

⁸ Mu bisangilo, twi na mushindo wa kuleesha bakwetu’shi twi bebafule. Bebungi mu bisangilo byetu bakwete kunyingiila nkalakashi i bukopo. Mpoolo mutumibwa bafundjile’shi: “Twikwatshisheeneeyi ku muntu na muntu.” (Beena-Ebelu 10:24, 25) Twi kuleesha’shi atwitatshisha bwa bakwetu p’atwe kwibunga bwa kwinyingisheena nabo. Patwende ku bisangilo, atuleesha bakwetu’shi atukumiina kwikala nabo, kwisamba nabo na kwata myanda yabo na muulo. Atwibanyingisha dingi pabapusha kwatutuusha myaluulo na kuyimba ngono ayikatukila kwishimba.​—Beena-Kolose 3:16.

9, 10. (a) Leesha bi mayi a Yesu e mu Yowano 10:16 aetutakula bwa kupusha bwakinyi bi na muulo bwatudya kwibunga na bakwetu. (b) Su atutwelaa mu bisangilo pa kyubishi, twi kukwasha muntu abadi basumbushene kwi kifuko kyaye naminyi?

⁹ Patwende mu bisangilo, atukwasha kakongye bwakadya kushala mu buumune. (Badika Yowano 10:16.) Yesu baadi mwipwandjikishe aye nabeene bu mulami a mikooko na balondji baaye bu lombe lwa mikooko. Banda kunangushena uno mwanda: Su mikooko ibidi i pa mwengye, ingi ibidi i mwibanda ungi mukooko namu wi ingi mbalo, twi kwamba’shi ino mikooko itano i mu lombe su? Nya, mwanda mu lombe lwa mikooko, mikooko ayikalaa pamune na kulonda mulami aayo. Mu kipaso kimune, tabitungu twikale kula na bakwetu p’atwe kupela kufika mu bisangilo. Abitungu twikale atwibungu pamune bwatudya kwikala “lombe lumune” na kulonda “mulami umune.”

¹⁰ Bisangilo abitukwasha bwatudya kwikala mu buumune bu beena kifuko befuleene. (Misambo 133:1) Bangi mu kakongye mbebasumbushene kwi be batande sunga bakwabo ba mu kifuko. Anka, Yesu mmwibalee bwa kwibapa kifuko ki na kya kwibafula na kwibapasukila. (Maako 10:29, 30) Su okwete kutwela mu bisangilo pa kyubishi, we kufika nshaye, nyina, mukwabo mukashi sunga mukwabo mulume a ungi muntu mu kakongye. Nsaa yatunangusheena bino, atukumiina kukita mwetu mooso bwa kwikala kalolo na bantu booso ku bisangilo.

ATUSANGASHA YEHOWA

11. Kutwela kwa mu bisangilo akwitukwasha bwa kupa Yehowa kyakya kimulombeene naminyi?

¹¹ Mu bisangilo, atupa Yehowa kyakya kimulombeene. Bu byadi mupangi eetu, abitungu kumutumbula, kumunemeka na kumutumbisha. (Badika Kibafumbwilwe 7:12.) Twi balombeene kukita bino ku bisangilo nsaa yatutekye Yehowa, yatumuyimbila na yatwisambila myanda imutale. Twi na kineemo ki kashaa kya kutumbisha Yehowa lubingo looso!

12. Yehowa apusha naminyi nsaa yatukookyela ku mwiya waye wa kutwela mu bisangilo?

¹² Yehowa nyi mwitupangye, abitungu tumukookyele. Mwitwelele mwiya wa kuyididiila na kwibunga pamune, bikishekishe bu abiifubwila nfudiilo peepi. Byabya, atusangasha Yehowa su atukookyela ku wawa mwiya. (1 Yowano 3:22) Kwete kumona byatwitatshisha bwa kwenda mu bisangilo na aata na muulo kwikitshisha kwetu.​—Beena-Ebelu 6:10.

13, 14. Mu bisangilo atwifubwilaa peepi na Yehowa mpa na Yesu mu kipaso kinyi?

¹³ Patwende mu bisangilo, atuleesha’shi atukumiina kwifubwila kwi Yehowa na kwi Mwan’aye. Mu bisangilo atulongaa Bible, na Yehowa etulongyeshaa akitungu’shi tukite na nshaleelo atudya kwikala naaye. (Yeeshaya 30:20, 21) Sunga nsaa ayifikaa bantu bashabalangwila Yehowa ku bisangilo, abamonaa’shi Efile Mukulu kwete kwitukunkusha. (1 Beena-Kodinda 14:23-25) Yehowa kwete kukunkusha bisangilo byetu na kikudi kyaye kiselele, na byooso byatulongaa mwanka abituukilaa kwadi. Byabya nsaa yatukwete kwenda ku bisangilo, atuteemesha abyakula Yehowa, atupusha byadi mwitufule na atwifubwila peepi naye.

¹⁴ Yesu, Nfumu a kakongye bambile’shi: “Pebungye babidi sunga basatu mwishina dyande, ami nee munkatshi mwabo.” (Mateo 18:20) Bible akula dingi’shi Yesu “atambuka munkatshi” mwa tukongye. (Kibafumbwilwe 1:20–2:1, Kilombeno kipya 2014) Abimweneka kalolo’shi Yehowa na Yesu be neetu na bakwete kwitunyingisha mu bisangilo byetu. Omono’shi Yehowa apushaa naminyi pa nkumono okitshi moobe mooso bwa kwifubwila pepi naye na Mwan’aye?

15. Kwenda mu bisangilo akuleesha’shi atukumiina kukookyela Efile Mukulu naminyi?

¹⁵ Nsaa yatwende ku bisangilo atuleesha Yehowa’shi atukumiina kumukookyela. Yehowa t’etukitshisha pa bukopo bwa kumukookyela nya. (Yeeshaya 43:23) Byabya, nsaa yatusangula bwa kutumikila mwiya waye wa kutwela mu bisangilo, atuleesha’shi twi bamufule na atukumiina’shi e na matalwa a kwitulungula kya kukita. (Beena-Looma 6:17) Bu kileshesho, twi kukita naminyi su mukata eetu a mudimo etutekye bwa kufuba ngofu mu mushindo watushii bya kutwela mu bisangilo lubingo looso? Pangi mbulamatadi e kwamba’shi muntu ooso ebungu bwa kulangwila Yehowa, abamutshibila kibawo, bamwele mu lukano, sunga kumunyooka bibukopo. Sunga’shi ingi nsaa twi kukumiina kukita ungi mudimo pamutwe pa kwenda mu bisangilo. Mu ino myanda yooso, abitungu twiatshile kitshibilo kya kukita. (Bikitshino 5:29) Kadi nsaa yooso yatusangula bwa kukookyela Yehowa, atumusankisha.​—Myeele 27:11.

IDIDIILA NA KWIBUNGA NA BAKWENU

16, 17. (a) Atuuku naminyi’shi bisangilo bibaabdi na muulo ukata kwi beena Kidishitu ba mu siekele a kumpala? (b) Mukwetu George Gangas baadi apusha naminyi pabitale bisangilo bya beena Kidishitu?

¹⁶ Kunyima kwa’bo kwibunga pamune mu Pantekote a mu kipwa kya 33, beena Kidishitu abaadi abebungu lubingo looso bwa kulangwila Yehowa. “Babaadi na katshintshi ku bulambukishi bwa batumiibwa na [kwibunga] mu kipwano kya bwina-muntu.” (Bikitshino 2:42) Nta mbeemikye kwibunga pamune mpa na pabaabadi ababingwabingwa kwi mbulamatadi a beena Looma na kwi bakata ba bipwilo bya beena Yuuda nya. Sunga mbibaabidi bukopo, babaadi abakitshi mwabo mooso bwa kutungunuka na kwibunga pamune.

¹⁷ Na lelo uno namu, bafubi ba Yehowa abapusha’shi be na mwabi ukata wa kutwela mu bisangilo na be na muloo wa kwimutwela. George Gangas, ungi mukwetu baadi mu Kasaka ka Bakunkushi Bakulu munda mwa bipwa bikile pa 22, bambile’shi: “Bwande’mi, kwibunga pamune na bakwetu nyi mmwanda wa muloo ukata mu muwa aunkankamikaa ngofu. Nakuminaa kwikala ku Nshibo ya Bufumu kumpala kwa nsaa, na kukatuka kunyima su ne na mushindo. Napushaa muloo nsaa yanesamba na bafubi b’Efile Mukulu. Pandi munkatshi mwabo napusha nka bu’mi e ku nshibo na kifuko kyande, mu mpaladiiso a mu kikudi.” Akula dingi’shi: “Lukalo lukata lwi mu binangu na mwishimba dyande ndwa kutwela mu bisangilo.”

18. Opushaa naminyi bwa bisangilo byetu, na nkitshibilo kinyi kyodi nakyo?

¹⁸ Obe namu opushaa byabya pabitale kulangwila Yehowa su? Su mbyabya, ididiila na kukita kyooso akitungu bwa kwikala na bakwenu ku bisangilo, sunga byakwikeela bukopo ingi nsaa. Leesha Yehowa’shi opushaa nka bu Nfumu Daavide bakwile’shi: “Ne mufule nshibo yoodi mushaale.”​—Misambo 26:8.