Mwanda wa 108

Mwishinda dya ku Damase

OUKU uno muntu mulale mu nsenga? Nyi Saule. Tentekyesha kalolo, nnaye baadi alama bikotshi bya bantu babaadi abaasa Etshyene mabwe. Tala dino etaata dikata! Nkinyi kikwete kukitshika?

Kunyima kwa kwipayibwa kwa Etshyene, Saule baadi muntu a kumpala pabitale kubingabinga kwa balondji ba Yesu. Baadi atwele ku nshibo na nshibo bwa kwibakwata na kwibela mu lukano. Balondji bebungi abaadi basukye mu bingi bibundji na bababangile kulungula “mukandu wibuwa” kwakwa. Kadi Saule baadi ende mu bingi bibundji bwa kukwata balondji ba Yesu. Pano pomono Saule e mwishinda dya ku Damase. Kadi, pabaadi mwishinda, mwanda umune wa kukanya ubakitshikile:

Musango umune etaata dikata dibayikile mwiyilu dyefunyisha Saule. Baponene mu nsenga, bu byomono pano. Paapa eyi dibapushikile, adyo nkwamba shi: “Saule, Saule, ommwesha aa malwa bwakinyi?” Bantu babaadi na Saule abamwene etaata na babapushile eyi, kadi tababapushishe kibadidi adyamba nya.

Saule bayipwishe shi: “Mwanana, nnoobe’nyi?”

Eyi dibambile shi: ‘Nee Yesu, nnaami oomwesha malwa.’ Yesu bakwile bino mwanda pabaadi Saule kwete kukyengyesha balongi baaye, Yesu baadi apusha bu’ye kwete kumukyengyesha aye nabeene.

Saule bamwipwishe shi: ‘Mwanana, abitungu nkite kinyi?’

Yesu bamulungwile shi: ‘Ebwe, otwele mu Damase, mwamwa abakulungula kyoodi na kya kukita.’ Pabebwele Saule bwimane na pababulwile meso, tabaadi amono dingi nya. Baadi mpofu! Byabya bantu babaadi nabo abamukwatshile ku mboko bamukunkusha mpa na ku Damase.

Paapa Yesu besambile na umune a ku bafubi baaye ba mu Damase abetanyinaa bu Ananii. Bamulungwile shi: ‘Ananii, ebwe. Wende mu museese wabetanyinaa bu museese “Ululame,” oyipushe mu nshibo ya Yuudase, muntu sh’eshina’shi Saule. Ne mumusangule bwashi ekale mufubi ande mukata.’

Ananii bayile. Pabafikile kwi Saule, bamutentekyele maboko ku mutwe na bambile shi: ‘Mwanana bantumu bwashi omone, na wekale muwule na kikudi kiselele.’ Musango umune bintu bi bu maamba bibaponene mu meso a Saule, aye nkubanga kumona dingi.

Yesu baadi mupe Saule mudimo na bukome bwa kupalakasha mukandu wibuwa mu maumbo ebungi. Bafikile mu kuwukibwa bu Mpoolo mutumibwa, na atukyebe kulonga ingi myanda yaaye ibungi. Kadi kumpala kwa byabya, tubande kutala kibaadi Efile Mukulu mutume Mpyeele bwa kukita.

Bikitshino 8:1-4; 9:1-20; 22:6-16; 26:8-20.