Mwanda wa 56

Saule nfumu a kwibedi mu Isaleele

TALA kwete kupongoola mwimu ku mutwe wa mwana mulume. Bino nyi byababaadi abakitshi bwa kulesha shi uno muntu mbamusangule bu nfumu. Yehowa balungwile Samwele bwa kwela Saule mwimu ku mutwe. Uno ubaadi mwimu wa mapembwe ebuwa.

Saule tabaadi mupwandikishe shi mukumbeene kwikala bu nfumu. Balungwile Samwele shi: ‘Ami ne mwina Benyamine a mu kimune kya ku bisamba bikile bupela mu Isaleele. Bwakinyi ondungula shi nyikale bu nfumu?’ Yehowa baadi mufule Saule mwanda tabaadi eata aye nabeene bu muntu mukata na ena kinemo kikile. Nyi bwakinyi Yehowa baadi mumusangule bwa kwikala nfumu.

Kadi Saule tabaadi mulanda sunga muntu a bisumanga nya. Baadi a mu kifuko ki na kantu ku maasa na dingi baadi muntu a kipambe na mulongame. Baadi mukile bantu booso ba mu Isaleele bula! Na dingi baadi lubilo na bukome bukile. Mwilo ubasangala mwanda Yehowa basangula Saule bwa kwikala nfumu. Ababanga kwela misase shi: ‘Nfumu ekale kwanka bwa mafuku ebungi!’

Beshikwanyi na beena Isaleele be bukome bukile. Bakya bakalakasha beena Isaleele. Mafuku apela kunyima kwa kutuula Saule mu bufumu, beena Amenone abafikile mu kulwisha beena Isaleele ngoshi. Kadi Saule babungile kisaka kikata kya beena ngoshi na aye nkutshokola beena Amenone. Bino bibaadi bisangashe mwilo pawo kupeta Saule bu nfumu.

Pabaadi bipwa abyende na kukila, Saule baadi mukunkushe beena Isaleele abo nkutshokola ngoshi ibungi ku mpala kwa beshikwanyi. Saule dingi baadi na mwana e n’eshimba di bukopo abaabadi abetanyina bu Yonatane. Yonatane dingi baadi mukwashe beena Isaleele misango ibungi bwashi batshokole ngoshi. Beena Filistina bakii beshikwanyi bakile bubi ba beena Isaleele. Dingi efuku binunu na binunu bya beena Filistina bibafikile mu kulwa ngoshi na beena Isaleele.

Samwele balungwile Saule bwashi atengyele mpa na pakyebe kufika bwa kulambula Yehowa mulambu. Kadi Samwele baadi kwete kunyengakana. Saule baadi atshiinyi beena Filistina tala babanga ngoshi, nyi aye nkwenda mu kulambula aye nabeene. Ku nfudiilo pa balukiile Samwele, balungwile Saule shi bakutwa kukokyela. Samwele bamulungwile shi: ‘Yehowa akyebe kusangula ungi muntu bwashi ekale nfumu a kukunkusha beena Isaleele.’

Akupu Saule bakutshile dingi kukokyela. Ndjo Samwele nkumulungula shi: ‘Kukokyela Yehowa kwi buwa kukila mulambu wa mukooko ukile buwa. Bu byoshi mukokyele Yehowa, aye namu takyebe nkulama dingi bu nfumu a Isaleele nya.’

Uno mwanda ngulombeene kwitupa elango dibuwa. Awitulesha shi kukokyela Yehowa misusa yooso kwi na muulo. Na dingi, awitulesha shi, muntu ebuwa bu bibaadi Saule mukumbeene kushintuluka na afika muntu ebubi. Tatukumanga kwikala efuku sunga dimune bu bantu bebubi, tanabyo su?

1 Samwele shapitre 9 mpa na ku 11; 13:5-14; 14:47-52; 15:1-35; 2 Samwele 1:23.